ᐃᒪᓐᓇᐃᑎᓪᓗᒍ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᒍᑎᖃᕐᒪᑕ ᐊᕐᕌᒍᖃᓕᕐᓂᕐᒥᓂᒃ 50ᓂᒃ ᐊᕐᕌᒍᔪᒥ ᑕᒫᓂ 2025, ᑕᑯᒃᓴᐅᑎᑦᑎᓂᐊᕋᑦᑕ ᑭᖑᓂᑦᑎᓐᓂ, ᒫᓇᐅᔪᕐᒃ ᑲᑎᒪᔨᐅᔪᓂᒃ ᐊᒻᒪᓗ ᐊᖓᔪᖄᖑᔪᓂᒃ ᐃᑭᐊᕿᕕᒃᑯᑦ ᖃᕋᓴᐅᔭᒃᑯᓪᓗ ᑕᑯᒃᓴᐅᕝᕕᒋᕙᒃᑕᑦᑎᒍᑦ.
ᖁᔭᓕᕗᒍᑦ ᑖᑯᐊ ᐱᕕᖃᕐᒃᑎᑦᑎᕙᓚᐅᕐᑐᕐᒃ ᐊᒻᒪᓗ ᑐᓴᕈᒥᓇᖅᑐᓂᒃ ᐅᖃᐅᓯᖃᖅᐸᓚᐅᖅᑐᑦ ᖃᓄᕐᒃ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒋᐊᓚᐅᖅᓯᒪᖕᒪᖔᑕ ᐊᒻᒪᓗ ᖃᓄᑎᒋ ᐱᕈᕐᓯᒪᓕᕐᒪᖔᑦ ᑕᐃᒪᖓᓂᑦ ᐱᒋᐊᖓᓚᐅᕐᓯᒪᑎᓪᓗᒋᑦ.
ᐅᖃᓕᒫᑦᑎᐊᕐᓂᕐᐊᐳᓯ!
ᓚᐃᓴ ᓂᖏᐅᖅ – ᐊᐅᓱᐃᑦᑐᖅ
ᓚᐃᓴ ᓂᖏᐅᖅ ᐃᓚᒋᔭᐅᒋᐊᕐᖓᓚᐅᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓂ ᐱᒋᐊᓕᓵᐸᓗᒃᑎᓪᓗᒋᑦ, ᑲᑎᒪᔨᐅᖃᑦᑕᖅᖢᓂ. ᑕᐃᔅᓱᒪᓂ ᓂᕈᐊᖅᑕᐅᑎᓪᓗᒍ, ᐊᒻᒪᓗ ᐊᓯᖏᓐᓂᑦ ᐊᕐᕌᒍᓂ ᓄᖅᑲᖓᑲᐃᓐᓇᖃᑦᑕᖅᖢᓂ, ᑭᓯᐊᓂ ᐊᒃᓱᕈᖃᑦᑕᕐᓂᖓ ᐃᓄᖕᓂᒃ ᑭᒡᒐᖅᑐᐃᔨᖃᕆᐊᖃᕐᓂᕐᒥᒃ ᐊᒻᒪᓗ ᐊᔭᐅᖅᑐᐃᖃᑦᑕᖅᓯᒪᓂᖓ ᐅᓪᓗᒥᒧᑦ ᑲᔪᓯᑎᓯᒪᔭᖏᑦ.
ᓚᐃᓴ ᐊᕐᓇᑑᓪᓗᓂ ᑲᑎᒪᔨᐅᓯᒪᔪᖅ ᕿᑭᖅᑕᓃᒃᑯᑦ ᓯᕗᓕᖅᑏᑦ ᑲᑎᒪᔨᓂᑦ ᐊᒻᒪᓗ ᓯᑕᒪᓂᒃ ᐱᓕᕆᐊᒃᓴᓂ ᓯᕗᓕᓚᐅᖅᖢᓂ, ᐃᒃᓯᕙᐅᑕᐅᓪᓗᓂ ᐃᓅᓯᕐᓅᖓᔪᓂᒃ ᑲᑎᒪᔨᕋᓛᓂ. ᐃᖅᑲᐅᒪᔪᖅ ᕿᑭᖅᑕᓃᒃᑯᑦ ᐊᖏᓪᓕᓚᐅᙱᑎᓪᓗᒋᑦ ᐊᐅᓚᓂᕐᒧᑦ ᑮᓇᐅᔭᖅᑑᑎᒃᓴᑦ ᖃᔅᓰᓐᓇᐅᕐᓂᖏᓐᓂᒃ ᐊᒻᒪᓗ ᐃᑲᔫᑎᒃᓴᖅᑕᖃᑦᑎᐊᕐᓇᓂ. ᑕᐅᑐᒃᖢᒍ ᕿᑭᖅᑕᓃᒃᑯᑦ ᐱᕈᖅᐸᓪᓕᓂᐊᖓ ᐊᕐᕌᒍᓂ ᖄᖏᖅᓯᒪᔪᓂᑦ ᓴᙱᒧᑦ ᐊᒻᒪᓗ ᐃᒃᐱᒋᔭᐅᑦᑎᐊᖅᖢᓂ ᑎᒥᐅᓂᕐᒧᑦ ᑕᒪᑐᒥᖓ ᐊᒃᓱᐋᓗᒃ ᐅᐱᒍᓱᒃᓯᒪᔪᖅ.
ᐊᕐᕌᒍᓂ ᓯᕗᓪᓕᕐᓂᑦ, ᑲᑎᒪᔩᑦ ᑭᒡᒐᖅᑐᑐᐃᓐᓇᖃᑦᑕᓚᐅᖅᑐᑦ ᓄᓇᓕᒋᔭᖏᓐᓂ, ᓴᖅᑭᑎᑎᕙᒃᖢᑎᒃ ᓄᓇᓕᖕᓂᙶᖅᑐᓂᑦ ᐃᓱᒫᓘᑎᓂᑦ. ᖃᖓᐅᓕᖅᑎᓪᓗᒍ ᕿᑭᖅᑕᓃᒃᑯᑦ ᐱᓕᕆᐊᒃᓴᖏᑦ ᐊᖏᓪᓕᓚᐅᖅᑐᑦ, ᐊᒻᒪᓗ ᑲᑎᒪᔩᑦ ᑭᒡᒐᖅᑐᖔᓕᖅᖢᑎᒃ ᐃᓄᓕᒫᓂᒃ ᕿᑭᖅᑖᓗᖕᒥ. ᓚᐃᓴ ᐅᖃᖅᑐᖅᑕᒪᓐᓇ ᐊᓯᔾᔨᓚᐅᕐᒪᑦ ᓴᙱᓕᖅᑎᑕᐅᔪᒪᓪᓗᓂ ᕿᑭᖅᑕᓃᒃᑯᑦ ᐱᓕᕆᐊᕆᕙᒃᑕᖏᓐᓂᑦ, ᐊᒻᒪᓗ ᐅᓪᓗᒥ ᑖᓐᓇ ᑎᒥᐅᔪᖅ ᓯᕗᓕᖅᑐᖅ ᑭᒡᒐᖅᑐᐃᓂᖏᓐᓂᑦ ᐃᓄᖕᓂᒃ ᓯᕗᒧᐊᕈᓐᓇᖁᓪᓗᒋᑦ ᐊᑐᖅᑕᐅᓗᓂ ᐱᕙᓪᓕᐊᔪᓕᕆᔨᒋᔭᐅᔪᒧᑦ ᕿᑭᖅᑖᓗᒃ ᑯᐊᐸᕇᓴᒃᑯᑦ, ᐊᒻᒪᓗ ᐃᓕᓐᓂᐊᕐᓂᕐᒧᑦ ᐃᖅᑲᓇᐃᔭᖅᑐᓕᕆᓂᕐᒥᓗ ᐱᓕᕆᐊᓖᑦ ᑎᒥᖁᑎᖓ ᑲᑭᕙᒃ ᑲᑐᔾᔨᖃᑎᒌᖏᑦ.
ᑕᑯᓯᒪᔪᖅ ᓇᖕᒥᓂᖅ ᖃᓄᖅ ᕿᑭᖅᑕᓃᒃᑯᑦ ᐊᖏᓪᓕᓯᒪᖕᒪᑖᒃ ᐊᒻᒪᓗ ᐱᓕᕆᐊᖏᑦ − ᓱᕐᓗ ᑖᒃᑯᐊ ᓇᐅᑦᑎᓱᖅᑏᑦ —ᐃᑲᔪᓪᓚᕆᖃᑦᑕᕐᓂᖏᑦ ᓄᓇᓕᖕᓂᑦ ᐱᓗᐊᖅᑐᒥᒃ ᖁᑦᑎᒃᑐᒥ. ᓇᓗᓇᐃᖅᓯᓪᓗᓂ ᕿᑭᖅᑕᓃᒃᑯᑦ ᐃᓚᐅᓂᕆᔭᖓᓂᑦ ᐱᓕᕆᐊᖃᕐᓂᖏᓐᓂᒃ ᓄᓇᕗᒥ ᐃᓪᓗᑭᒃᓴᕐᓂᐅᔪᒥᒃ ᑖᓐᓇᓗ ᐱᒻᒪᕆᐅᖃᑕᐅᖕᒪᑦ ᓯᕗᒧᐊᖅᐸᓪᓕᐊᓂᕐᒥᒃ ᐱᐅᓯᑎᑦᑎᒐᓱᐊᖅᖢᑎᒃ ᐃᓄᐃᑦ ᖃᓄᐃᙱᑦᑎᐊᖁᓪᓗᒋᑦ.
ᓚᐃᓴ ᐅᖃᖅᑐᖅ ᖃᓄᖅ ᐱᒻᒪᕆᐅᑎᒋᖕᒪᖔᑦ ᐊᕐᓇᐃᑦ ᐃᓚᒋᔭᐅᖃᑦᑕᕐᓂᖏᑦ ᑲᑎᒪᔨᓂᑦ ᐅᖃᒃᑲᓐᓂᖅᖢᓂ ᑖᒃᑯᐊ ᐃᓄᐃᑦ ᐊᕐᓇᖏᑦ ᐊᖑᑎᖏᓪᓗ ᐃᓱᒪᐅᓯᖏᑦ ᐊᔾᔨᒌᙱᓐᓂᖏᓐᓄᑦ, ᑭᓯᐊᓂ ᐊᑕᐅᑦᓯᒃᑯᑦ ᑲᔪᓯᑎᑦᑎᔪᓐᓇᖅᑐᑦ ᐊᒥᓱᓂᒃ. ᒪᒃᑯᒃᑐᓂᒃ ᐱᕕᖃᒃᑲᓐᓂᖁᔪᖅ ᐃᓚᐅᖃᑕᐅᔪᓐᓇᕐᓗᑎᒃ ᕿᑭᖅᑕᓃᒃᑯᑦ ᐱᓕᕆᐊᖏᓐᓂᒃ ᐊᒻᒪᓗ ᑲᔪᓯᖏᖅᓴᐃᓪᓗᓂ ᓴᐱᓕᖃᑦᑕᖁᓇᒋᑦ ᐃᓕᓐᓂᐊᑦᑎᐊᖅᓯᒪᙱᒃᑲᓗᐊᖅᑎᓪᓗᒋᑦ: “ᐱᔪᒪᓂᖅᑕᖃᑐᐊᖅᐸᑦ, ᐃᓄᐃᑦ ᐱᓕᕆᔪᓐᓇᑦᑎᐊᖅᑐᑦ ᐃᑲᔪᖅᑎᒌᑦᑎᐊᕐᓗᑎ”.
ᐅᒃᐱᕆᔭᖃᖅᑐᖅ ᐃᖅᑲᓇᐃᔮᒃᓴᖅᑕᖃᒃᑲᓐᓂᕆᐊᓕᒃ ᐃᓕᓐᓂᐊᒐᒃᓴᓂᓪᓗ ᐃᓄᖕᓄᑦ ᑐᕌᖓᔪᓄᑦ, ᐃᖅᑲᓇᐃᔭᖅᑎᑦᑎᙱᓐᓂᖅᓴᐅᓗᑎᒃ ᓄᓇᕘᑉ ᓯᓚᑖᓂᙶᖅᑐᓄᑦ. ᐊᒥᓱᐃᓗᐊᖅᖢᑎᒃ, ᐅᖃᖅᑐᖅ, ᑖᒃᑯᐊ ᖃᓪᓗᓈᓂᙵᖅᑐᓂᒃ ᐊᐅᓚᑦᑎᔾᔪᑎᖃᖃᑦᑕᕐᓂᖓᓂᒃ ᐊᒻᒪᓗ ᐃᖅᑲᓇᐃᔭᖅᑖᖅᑎᑦᑎᖃᑦᑕᕐᓂᖏᓪᓗ ᑕᒪᒃᑯᐊᓗ ᑐᓗᖅᑕᕈᑎᒋᔭᐅᖃᑦᑕᖅᖢᑎᒃ ᐃᓄᖕᓄᑦ ᐃᖅᑲᓇᐃᔭᕈᓐᓇᕋᓗᐊᖅᑐᓂᒃ. ᑎᓕᓯᕗᖅ ᓱᑲᑎᖅᓯᒪᙱᑦᑐᓂᒃ ᑐᕌᒐᖃᖁᔨᓪᓗᓂ ᐃᓕᓴᖅᓯᓯᒪᓂᐊᖅᑐᒥᒃ ᓴᙱᓐᓂᕆᔭᐅᔪᓂᒃ ᐊᒻᒪᓗ ᖃᐅᔨᒪᓂᕆᔭᐅᔪᓂᒃ.
ᓚᐃᓴ ᓇᓗᓇᐃᖅᓯᔪᖅ ᐃᓄᐃᑦ ᓇᖕᒥᓂᖅᓱᖃᑦᑕᖅᓯᒪᔪᑦ, ᓇᖕᒥᓂᕐᓗ ᓯᕗᓕᖅᑎᖃᖃᑦᑕᖅᖢᑎᒃ, ᐊᐅᓚᑦᑎᔾᔪᑎᖃᖅᖢᑎᒃ, ᐊᒻᒪᓗ ᐃᓅᓕᓴᖅᑕᐅᖃᑦᑕᕈᓐᓇᖅᖢᑎᒃ ᓱᕐᓗ ᐃᕐᓂᓱᒃᓰᓂᕐᒥᒃ. ᑕᒪᒃᑯᐊ ᖃᐅᔨᒪᔭᐅᔪᑦ ᐲᔭᖅᑕᐅᓯᒪᖕᒪᑕ, ᑭᓯᐊᓂ ᐅᖃᕈᒪᔪᖅ ᐊᑐᓕᖅᑎᑕᐅᒃᑲᓐᓂᕆᐊᓕᒃ ᐃᓐᓇᖅᑕᖃᖅᑎᓪᓗᒍ ᐃᓕᓐᓂᐊᖅᑎᑦᑎᔪᓐᓇᖅᑐᓂᒃ ᐃᓄᐃᑦ ᒪᓕᒐᖏᓐᓂᒃ ᐃᓕᓐᓂᐊᕈᓯᕆᔭᖏᓐᓂᓗ. ᐅᖃᕐᒥᔪᖅ ᑕᒪᒃᑯᐊ ᑲᑎᒪᔨᐅᕝᕕᐅᔪᑦ ᓱᕐᓗᑐᑦ ᐅᑯᐊ ᐃᓅᓯᓕᕆᔩᑦ, ᐱᓕᕆᐊᖃᓚᐅᖅᑐᓂᒃ ᐃᓅᓯᕐᓅᖓᔪᓂᒃ, ᓴᖅᑭᑕᐅᒃᑲᓐᓂᕐᓗᓂ, ᐱᒻᒪᕆᐅᔪᒥᒃ ᐃᑲᔪᕈᓐᓇᕐᒪᑕ ᐃᓄᖕᓂᒃ ᐊᒃᓱᕈᕐᓇᖅᑐᒃᑰᖅᑐᓂᒃ ᓱᕐᓗ ᑎᒍᔭᐅᓯᒪᔪᑦ ᐅᕝᕙᓘᓐᓃᑦ ᐊᖏᕐᕋᖃᙱᓐᓂᕐᒥᒃ.
ᑕᒪᒃᑯᐊᖑᒐᓗᐊᖅᑎᓪᓗᒋ, ᓚᐃᓴ ᐃᑲᔪᖅᑐᐃᖏᓐᓇᖅᑐᖅ ᕿᑭᖅᑕᓃᒃᑯᑦ ᐱᓕᕆᐊᖏᓐᓂᒃ ᑭᒡᒐᖅᑐᐃᔨᐃᑎᓪᓗᒋᑦ ᐃᓄᖕᓂᒃ: “ᕿᑭᖅᑕᓃᒃᑯᑦ ᑲᑎᒪᔨᖏᑦ ᐃᖅᑲᓇᐃᔭᖃᑎᒌᑦᑎᐊᖃᑦᑕᖅᐸᑕ, ᐱᐅᔪᓂᒃ ᓴᖅᑭᑦᑐᖃᕈᓐᓇᕐᒪᑦ.”
