ᓇᐃᓈᕐᓯᒪᓪᓗᒋᑦ: ᕿᑭᖅᑕᓂᒃᑯᓐᓄᑦ−ᐊᑭᓕᖅᑕᐅᓯᒪᔪᖅ ᓂᔾᔭᐅᑎ ᔫᓅᒥᒃ ᓂᕈᐊᕋᔅᓴᓕᐊᖑᕗᖅ

ᓇᐃᓈᕐᓯᒪᓪᓗᒋᑦ: ᕿᑭᖅᑕᓂᒃᑯᓐᓄᑦ−ᐊᑭᓕᖅᑕᐅᓯᒪᔪᖅ ᓂᔾᔭᐅᑎ ᔫᓅᒥᒃ ᓂᕈᐊᕋᔅᓴᓕᐊᖑᕗᖅ

 In blog-inuk

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒃᑯᒍᓱᑉᐳᑦ ᑐᓴᕆᐊᔅᓴᖅ ᑎᐅᕆ ᐅᔭᕋᐅᑉ ᓂᐱᖁᑎᖓ, ᓄᓇᕐᔪᐊ ᐃᓱᓕᙱᓐᓂᐊᓂ, ᓂᕈᐊᒐᐅᓯᒪᒻᒪᑦ ᓄᓇᖃᖅᑐᑐᖃᕐᓂᑦ ᐃᙱᖅᑎᐅᔪᓂᑦ ᐅᕝᕙᓘᓐᓃᑦ ᓂᔾᔭᐅᓯᔭᖅᑎᐅᔪᓂᑦ ᐊᕐᕌᒍᒥ ᔫᓅᒃᑯᓐᓂᒃ ᐃᓕᓴᕐᓯᔾᔪᑕᐅᕙᑦᑐᓂᑦ.

ᐅᔭᕋᒃ ᐅᖃᐅᔾᔨᓚᐅᖅᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓕᕆᔨᓂᑦ ᖁᖓᐃᓐᓇᑦᑎᐊᓕᓚᐅᕋᒥᒎᖅ ᓂᐱᓕᐅᖅᑎᒋᓯᒪᔭᖏᑦ, ᐋᑯᓗᒃ ᓂᔾᔭᐅᓯᔭᖅᑏᑦ, ᐅᖃᐅᔾᔨᒻᒪᑕ ᑖᔅᓱᒥᖓ ᑕᒪᑐᒪ ᒥᔅᓵᓄᑦ.

“ᑲᒪᓇᓪᓚᑦᑖᖅᑐᕐᓖᓛᒃ,” ᐅᖃᖅᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓕᕆᔨᓄᑦ.

ᐅᖃᓕᒫᕈᒪᒍᕕᐅᒃ ᐅᓂᒃᑳᓕᐊᖑᓯᒪᔪᖅ, ᐅᓇ ᓇᕿᓪᓗᒍ.

ᐅᔭᕋᒃ, ᐃᒡᓗᓕᒻᒥᐅᑕᖅ, ᓴᖅᑭᑎᑦᑎᔪᔪᖅ ᑖᔅᓱᒥᖓ ᓄᓇᕐᔪᐊ ᐃᓱᓕᙱᓐᓂᐊᓂ ᐅᑐᐱᕆᐅᑎᓪᓗᒍ, 2020.

ᐊᖅᑯᑎᒋᓪᓗᒋᑦ ᐃᓚᒌᒃᑐᓄᑦ ᑮᓇᐅᔭᑦ, ᕿᑭᖅᑕᓂᒃᑯᑦ ᑮᓇᐅᔭᖃᖅᑎᑦᑎᔪᔪᑦ ᓴᓇᔭᐅᓂᕆᓂᐊᖅᑕᖓᓄᑦ, ᑐᓴᕐᓴᐅᑎᑕᐅᖃᑦᑕᓂᐊᕐᓂᖓᓄᑦ ᓴᖅᑭᖅᑕᐅᓂᕆᐊᖅᑕᖓᓄᓪᓗ ᐅᔭᕋᐅᑉ ᓂᐱᓕᐊᕆᓯᒪᔭᖏᓐᓂᒃ.

ᐃᓚᒌᒃᑐᓄᑦ ᓄᓇᓕᓐᓄᓪᓗ ᐱᕙᓪᓕᐊᔾᔪᑎᔅᓴᐃᑦ ᑮᓇᐅᔭᑦ ᐋᖅᑭᑦᑕᐅᓚᐅᕐᓯᒪᒻᒪᑕ ᐊᖅᑯᑎᒋᓪᓗᖑ ᐃᓛᒃᑯᑦ 12  ᑖᒃᑯᓇᓃᑦᑐᖅ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ  ᑖᒃᑯᓇᙵᑦ ᕿᑭᖅᑕᓂᒃᑯᓐᓂᑦ ᐊᒻᒪᓗ ᐹᕕᓐᓛᓐ ᓴᕕᕋᔭᔅᓴᓂᑦ ᐅᔭᕋᓐᓂᐊᖅᑏᑦ. ᕿᑭᖅᑕᓂᒃᑯᑦ ᐋᖅᑭᔅᓱᐃᓚᐅᕐᓯᒪᔪᑦ ᑮᓇᐅᔭᖃᖅᑎᑦᑎᒍᑕᐅᖃᑦᑕᓂᐊᖅᑐᓂᑦ, ᐊᒻᒪᓗ ᑲᒪᒋᔭᖃᕐᐸᑦᑐᑎᒃ ᑖᒃᑯᓂᖓ.

ᑮᓇᐅᔭᖅᑕᓕᒃ ᐱᓇᓱᐊᕋᔅᓴᓂᑦ ᑭᒃᑯᑐᐃᓐᓇᕐᓄᑦ ᓄᓇᓕᐅᔪᓂᑦ ᑕᓪᓕᒪᓂᑦ ᐊᑑᑎᕕᐅᓂᕐᐹᓂᑦ ᐋᕕᓐᓛᓐᑯᑦ ᓄᓘᔮᓐᓂ ᐅᔭᕋᓐᓂᐊᕐᕕᖓᓐᓂ−ᒥᑦᑎᒪᑕᓕᒃ, ᑲᖏᖅᑐᒑᐱᒃ, ᐃᒃᐱᐊᕐᔪᒃ, ᐃᒡᓗᓕᒃ ᐊᒻᒪ ᓴᓂᕋᔭᒃ.

ᑮᓇᐅᔭᑦ ᐃᑲᔫᑕᐅᕙᑦᑐᑦ ᐱᓕᕆᐊᖑᓂᐊᖅᑐᓄᑦ ᓈᒻᒪᑦᑐᒥᒃ ᐊᑑᑎᓂᖃᕐᓂᐊᖅᑐᓄᑦ ᐃᓄᓐᓄᑦ ᒪᑭᒪᑦᑎᐊᖁᓪᓗᒋᑦ ᓄᓇᓕᐅᔪᑦ, ᐃᓚᒌᓐᓂᖃᑦᑎᐊᖁᓪᓗᒋᑦ ᐊᒻᒪᓗ ᐃᖅᑲᓇᐃᔮᔅᓴᓄᑦ ᐅᐸᓗᖓᐃᕐᓯᒪᔪᓐᓇᖁᓪᓗᒋᑦ.

ᐃᓚᒋᔭᐅᒻᒥᔪᖅ ᓂᐱᖁᑎᓕᐅᖅᑎᓪᓗᒍ, ᐃᓚᒌᒃᑐᓄᑦ ᑮᓇᐅᔭᑦ ᐊᑐᕈᒫᕐᓂᐊᕐᓯᒪᓚᐅᖅᑕᖏᑦ ᐅᔭᕋᐅᑉ ᑕᕐᕆᔮᔅᓴᓕᐅᕐᓯᓐᓈᕐᓂᐊᕐᖓᑦ ᕿᒧᔅᓯᖃᑦᑕᕐᓂᐅᑉ ᒥᔅᓴᓄᑦ ᓂᐅᕐᕈᑎᒋᒃᑲᓐᓂᕈᓐᓇᓛᕐᖓᒋᑦ ᓂᐱᖁᑎᖓᓄᑦ, ᐊᒻᒪᓗ ᓴᓇᔾᔪᑕᐅᓛᕐᖓᑕ ᑐᓂᓯᐅᖅᑲᐃᔾᔪᑕᐅᓛᕐᖓᑕᓗ 2000ᓂᑦ ᓂᐱᖁᑎᓕᐊᖑᔪᓂᑦ.

ᐃᓱᒪᒋᔭᐅᓯᒪᔪᕐᓕ ᓂᐱᖁᑎᒧᑦ ᐅᔭᕋᐅᑉ ᓂᐱᖁᑎᓕᐊᕆᓯᒪᔭᖏᓐᓄᑦ ᑐᓵᔭᐅᒃᑲᓐᓂᖃᑦᑕᖁᓪᓗᒋᑦ ᐃᓄᒃᑎᑑᖓᔪᑦ ᓂᐱᔅᓴᐃᑦ ᓄᓇᓕᐅᔪᓂᑦ ᕿᑭᖅᑕᓂ, ᐊᒻᒪᓗ ᐱᔪᒐᕐᓴᐃᑲᓐᓂᕈᒪᓪᓗᑎᒃ ᐃᓄᓐᓂᑦ ᐅᐱᒍᓱᖁᓪᓗᒋᑦ ᐅᖃᐅᓯᖏᓐᓂᒃ ᐃᓕᓴᕐᓇᕈᑎᖏᓐᓂᓪᓗ ᐃᓅᓂᖏᓐᓂᒃ. ᓴᖅᑭᔮᖅᑎᑦᑎᒋᐊᒃᑲᓐᓂᕈᑕᐅᓪᓗᓂᓗ ᐊᒻᒪᓗ ᑲᔪᖏᕐᓴᐅᑕᐅᓪᓗᓂ ᕿᒧᔅᓯᖃᑦᑕᑲᓐᓂᖁᔨᓪᓗᑎᒃ, ᐊᒻᒪᓗ ᒪᑭᒋᐊᒃᑲᓐᓂᖁᓪᓗᒍ ᓂᔾᔭᐅᓯᔭᖃᑦᑕᕐᓂᖅ ᐃᓕᖅᑯᓯᓕᕆᖃᑦᑕᓂᕐᓪᓗ ᕿᑭᖅᑕᓂ ᓄᓇᓕᐅᔪᓂᑦ.

 

 

 

 

 

Recent Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ