ᐅᓪᓗᒥ ᐅᓪᓗᕆᔭᐅᖕᒪᑦ ᓄᓇᖃᖄᕐᑐᕕᓂᕐᓄᑦ ᐅᓇᑕᕐᒃᑐᕐᒃᓴᐅᓚᐅᕐᓯᒪᔪᓄᑦ ᑲᓇᑕᒥ. ᑖᓇ ᐅᓪᓗᕐᒃ ᐃᖃᐅᒪᔭᐅᑎᓪᓗᒍ ᕿᑭᕐᒃᑕᓂᒃᑯᑦ ᐅᓂᒃᑳᓕᐅᕐᓯᒪᕗᑦ ᐱᓪᓗᒍ ᓯᑏᕕ ᐊᐅᓪᓚᕿᐊᕐᒃ ᕿᕿᕐᑕᕐᔪᐊᕐᒥᐅᑕᕐᒃ
ᓯᑏᕕ ᐊᐅᓚᕿᐊᕐᒃ ᓯᕗᓪᓕᖅᐹᒥᒃ ᐅᓇᓕᒃᓴᕋᓛᖑᓚᐅᖅᓯᒪᔪᕐᒃ ᐅᑭᐅᖑᑎᓪᓗᒍ 1974, ᑲᓇᑕᒥ ᐅᓇᑕᖅᑐᒃᓴᖏᑦ ᐊᔪᕈᓐᓃᖅᓴᕆᐊᖅᑐᕐᓂᐊᖅᑎᓪᓗᒋᑦ ᐅᓇᑕᕐᓂᕐᒧᑦ ᕿᑭᖅᑕᕐᔪᐊᕐᒃ ᖃᓂᒋᔭᖓᓂ.
ᐅᓇᑕᖅᑐᒃᓴᒃᑯᑦ ᑐᒃᓯᕋᓚᐅᖅᓯᒪᖕᒪᑕ ᒪᕐᕉᓂᒃ ᓄᓇᓕᖕᒥᐅᑕᓂᒃ ᐃᑲᔪᖁᔨᓪᓗᑎᒃ ᐊᔪᕈᓐᓃᖅᓴᓕᖅᐸᑕ.
ᓯᑏᕕᓗ ᐊᒻᒪᓗ ᑯᐊᓕ ᑯᓂᓘᓯ ᐊᑎᓕᐅᖃᑕᐅᔪᑑᓚᐅᖅᓯᒪᔫᒃ.
ᐃᑦᑕᕋᓕᖕᒧᑦ ᐊᐅᓪᓚᖅᑎᑕᐅᓚᐅᖅᓯᒪᔪᑦ ᖃᖓᑕᓲᕋᓛᒃᑯᑦ ᐃᓛᓐᓂᒃᑯᑦ ᐅᓗᕐᒃ ᐃᑲᕋᖏᓐᓂᒃ 15−ᓄᑦ ᑎᑭᑉᐸᓚᐅᖅᓯᒪᔪᑦ ᓯᓂᓚᐅᖅᓯᒪᓇᑎᒃ ᐃᑲᔪᖅᖢᑎᒃ ᐅᓇᑕᖅᑐᒃᓴᓂᒃ.
ᐱᓕᕆᔭᕆᐊᖃᖅᐸᓪᓚᐅᖅᓯᒪᔭᖏᑦ ᐃᓚᖏᑦ ᐊᐃᒃᓯᖅᐸᒃᖢᑎᒃ ᖃᒧᑕᐅᔭᕐᓂᒃ ᐊᒻᒪᓗ ᐅᖅᓱᒃᓴᐃᕙᒃᖢᑎᒃ ᐃᓛᓐᓂᒃᑯᑦ ᐃᒡᓗᕕᒐᓕᐅᖅᐸᒃᓱᑎᒃ. ᑕᐃᒪᖓᐅᑎᓪᓗᒍ ᓯᑏᕕ ᑐᓂᔭᐅᓚᐅᖅᓯᒪᔪᕐᒃ ᐊᖓᔪᖄᖑᓂᕐᒥᒃ ᐅᓇᓕᒃᓴᕋᓛᓄᑦ ᐱᓯᒪᓪᓗᓂᐅᒡᓗ ᐊᕐᕌᒍᓄᑦ ᐊᕙᑎᓪᓗᐊᓄᑦ.
ᓯᑏᕕ ᐅᖃᓚᐅᖅᑐᕐᒃ ᒪᕐᕈᐃᓐᓇᐅᓚᐅᖅᓯᒪᔫᒃ ᐊᕐᕌᒍᓪᓗᐊᓄᑦ ᒪᕐᕉᓄᑦ ᑭᓯᐊᓂ ᐅᖃᐅᔾᔭᐅᖕᒪᑕ ᐅᓇᑕᖅᑐᒃᓴᒃᑯᓐᓂᒃ ᐸᕐᓇᕐᓂᕐᒥᓄᑦ ᑲᑕᒃᑎᑕᐅᔾᔪᑎᒥᒃ ᐊᑐᕐᓗᑎᒃ ᐊᔪᕈᓐᓃᖅᓴᕐᓂᐊᕐᓂᕐᒥᓂᒃ. ᐅᖃᐅᔾᔭᐅᓗᑎᒡᓗ ᐃᓄᖕᓂᒃ ᒥᓇᖅᓯᖁᔭᐅᓪᓗᑎᒃ ᐃᑲᔪᕐᓂᐊᖅᑐᓂᒃ ᐊᒻᒪᓗ 11−ᓂᒃ ᐃᓄᖕᓂᒃ ᐃᑲᔪᕈᓐᓇᕐᓂᐊᖅᑐᓂᒃ ᐱᔪᓐᓇᖅᓯᓚᐅᖅᑐᑦ ᐊᑎᓕᐅᖃᑕᐅᔪᓂᒃ.
ᓯᑏᕕ ᐅᖃᓚᐅᖅᑐᕐᒃ ᖁᕕᐊᒋᓯᒪᓪᓗᓂᐅᒃ ᐱᖃᑕᐅᓂᕐᒥᓂᒃ ᐅᓇᓕᒃᓴᕋᓛᓄᑦ ᐃᓕᓂᐊᖅᑎᑕᐅᕙᖕᒪᑕ ᐃᓕᓐᓂᐊᕋᔭᓚᐅᙱᑕᒥᓂᒃ ᓲᕐᓗ ᐊᓐᓇᐅᒪᓇᓱᖕᓂᕐᒥᒃ, ᐱᐅᓕᔭᐃᓂᕐᒥᒃ, ᐊᒻᒪᓗ ᐊᑐᕈᓐᓇᖅᓯᓂᕐᒥᒃ ᑕᒻᒪᕇᒃᑯᑎᓂᒃ ᐊᒻᒪᓗ ᓇᒧᖓᐅᔾᔪᑎᓂᒃ.
ᐃᑲᔪᙱᑦᑕᕌᖓᒥᒃ ᐅᓇᑕᖅᑐᒃᓴᓂᒃ, ᐃᔨᒋᔭᐅᕙᒃᑐᑦ ᓯᐅᑎᒋᔭᐅᓪᓗᑎᒡᓗ ᐅᔾᔨᖅᓱᕆᐊᖃᕆᓪᓗᑎᒃ ᐃᓕᑕᕐᓇᙱᑦᑐᓂᒃ ᐅᒥᐊᕐᔪᐊᖅᑕᖃᒻᒪᖔᑦ ᓲᓪᓗ ᐊᖅᑲᐅᒪᔫᓂᒃ ᐅᕝᕙᓘᓐᓃᑦ ᐅᒥᐊᕐᔪᐊᓂᒃ ᐊᔾᔨᒌᙱᑦᑐᓂᒃ ᓴᐃᒪᑎᖃᖅᑐᓂᒃ. ᑲᒪᔭᕆᐊᖃᓲᖑᖕᒥᔪᑦ ᖃᐅᔨᓴᕈᑎᓂᒃ ᐅᑭᐅᖅᑕᖅᑐᒥᒃ ᐃᓕᔭᐅᓯᒪᔪᓂᒃ ᕿᑭᕐᒃᑕᕐᔪᐊᕐᒃ ᖃᓂᒋᔭᖓᓂ ᓯᑕᒪᐃᖅᓱᖅᖢᑎᒃ ᐊᕐᕌᒎᑉ ᐃᓗᐊᓂ ᖃᐅᔨᒋᐊᓲᖑᔪᑦ ᐊᐅᓚᑦᑎᐊᕋᓗᐊᕐᒪᖔᑕ ᐊᒻᒪᓗ ᐅᖅᓱᐊᓗᖕᒥ ᑯᕕᔪᖃᙱᒃᑲᓗᐊᕐᒪᖔᑦ ᐅᕝᕙᓘᓐᓃᑦ ᐊᐱᓯᒪᓗᐊᙱᒃᑲᓗᐊᕐᒪᖔᑕ.
ᓯᑏᕕ ᐱᖃᑕᐅᓯᒪᓂᑰᓕᖅᑐᕐᒃ ᓯᑕᒪᐅᔪᖅᑐᓂᒃ ᐊᔪᕈᓃᖅᓴᖅᑐᓂᒃ ᐅᓇᑕᖅᑐᒃᓴᓂᒃ ᐃᖃᓗᑦᑑᑎᐊᕐᒥ, ᔫᑳᓐ, ᐊᓘᑦ, ᖃᐅᓱᐃᑐᖅ ᒪᕐᕈᐊᑎᖅᖢᓂ ᖃᐅᓱᐃᑦᑐᒧᐊᖅᓯᒪᓕᖅᑐᕐᒃ ᐊᔪᕈᓃᖅᓴᖃᑕᐅᓂᕐᒧᑦ. ᖃᖓᑦᑎᐊᕐᒃ ᐱᖃᑕᐅᓚᐅᕐᒥᔪᕐᒃ ᐊᔪᕈᓐᓃᖅᓴᖅᑐᓂᒃ ᕖᕝᕗᐊᕆ ᐊᒻᒪᓗ ᒫᔾᔨ. ᐅᖃᓚᐅᖅᑐᕐᒃ ᑖᒃᑯᐊ ᐅᓇᓕᒃᓴᔭᕋᓛᑦ ᓯᕗᒃᑲᖅᑕᐃᓚᐅᖅᑐᑦ ᐅᓇᑕᖅᑐᒃᓴᒃᑯᓐᓂᑦ ᓇᒧᙱᕆᐊᖃᖅᑎᓪᓗᒋᑦ. ᐃᒡᓗᕕᒐᓕᐅᖃᑦᑕᕐᒥᔪᑦ ᐊᒻᒪᓗ ᐃᖃᓗᒐᓱᒃᐸᒃᖢᑎᒃ, ᓇᑦᑎᕋᓱᒃᐸᒃᖢᑎᒡᓗ ᑖᒃᑯᐊ ᐅᓇᑕᖅᑐᒃᓴᒃᑯᑦ ᐃᓕᓐᓂᐊᕐᒪᑕ ᐃᓄᐃᑦ ᐃᓕᖁᓯᖏᓐᓂᒃ.
ᓯᑎᐱᕆᐅᑎᓪᓗᒍ, ᓯᑏᕕ ᑯᐸᐃᒃ ᓄᓇᓕᐸᐅᔭᖓᓄᑦ ᐊᐅᓪᓚᓚᐅᖅᑐᕐᒃ ᐊᐃᑉᐸᖓᓗ ᐃᓚᐅᓪᓗᓂ, ᑐᓂᔭᐅᔭᖅᑐᕐᒃᖢᓂ ᑭᖕ ᓵᓕ ᑭᙳᖅᑎᑕᐅᓚᐅᖅᓯᒪᓂᖓᑕ ᖃᕿᖅᑯᐊᕐᒥᒃ ᐃᓕᓴᕆᔭᐅᓪᓗᓂ ᐊᕐᕌᒍᓄᑦ 50ᓄᑦ ᐅᓇᓕᒃᓴᔭᕋᓛᖑᓕᕐᓂᖓᓄᑦ. ᐅᖃᓪᓚᐅᖅᑐᕐᒃ ᑕᐸᐃᓚᐅᕐᓂᕐᒥᓂᒃ ᐊᒻᒪᓗ ᓂᕆᐅᓚᐅᖏᓐᓂᕐᒥᓂᒃ ᐃᓚᓴᕆᔭᐅᓂᐊᕐᓂᕐᒥᓂᒃ.
ᓯᑏᕕ ᐅᖃᐅᓚᐅᖅᑐᕐᒃ ᑲᓇᑕᒥ ᐅᓇᓕᒃᓴᔭᕋᓛᑦ ᐊᑐᕐᒃᑐᒻᒪᕆᐅᓂᖏᓐᓂᒃ ᐅᓇᑕᖅᑐᒃᓴᐃᑦ ᐱᓪᓗᒋᑦ ᐊᒻᒪᓗ ᑲᔪᖏᕐᓴᐃᕗᕐᒃ ᐅᕕᒃᑲᓂᒃ ᐃᓚᐅᖁᔨᓪᓗᓂ. ᐅᓇᓕᒃᓴᔭᕈᓛᑦ ᐃᑲᔪᖃᕐᑕᕆᕗᑦ ᐊᑭᓕᖅᓱᖅᑕᐅᓇᑎᒃ ᐊᒻᒪᓗ ᐃᑲᔪᖃᑦᑕᕆᓪᓗᑎᒃ ᕿᓂᖅᑎᓂᒃ ᐊᒻᒪᓗ ᐅᓇᑕᖅᑐᒃᓴᓂᒃ ᓱᖏᐅᖓᖏᑦᑐᓂᒃ ᐅᑭᐊᖅᑕᖅᑐᒥᒃ ᐊᒻᒪᓗ ᓯᓚᖓᓐᓂᒃ. ᓯᑏᕕ ᐅᖃᐅᓚᐅᖅᑐᕐᒃ ᐱᖃᑕᐅᖏᓐᓇᕐᓂᐊᕐᓂᕐᒥᓂᒃ ᐊᔪᖏᓂᓕᒫᒥᓂᒃ.
ᐊᔾᔨᓕᐅᕐᑕᐅᓯᒪᔪᕐᒃ ᐅᓇᑕᕐᑐᒃᓴᒃᑯᑦ ᑲᑐᔾᔨᔨᖏᑦ ᐅᑭᐊᕐᑕᕐᑐᒥ − ᔭᓗᓇᐃ, ᓄᓇᑦᓯᐊᕐᒃ
ᐊᔾᔨᓕᐅᕐᑕᐅᓯᒪᔪᕐᒃ ᐅᓇᑕᕐᑐᒃᓴᒃᑯᑦ ᑲᑐᔾᔨᔨᖏᑦ ᐅᑭᐊᕐᑕᕐᑐᒥ − ᔭᓗᓇᐃ, ᓄᓇᑦᓯᐊᕐᒃ
ᐊᔾᔨᓕᐅᕐᑕᐅᓯᒪᔪᕐᒃ ᐅᓇᑕᕐᑐᒃᓴᒃᑯᑦ ᑲᑐᔾᔨᔨᖏᑦ ᐅᑭᐊᕐᑕᕐᑐᒥ − ᔭᓗᓇᐃ, ᓄᓇᑦᓯᐊᕐᒃ
ᐊᔾᔨᓕᐅᕐᒃᑕᐅᔪᕐᒃ ᑭᖕ ᑭᒡᒐᕐᑐᐃᔨᖓᑕ ᑲᓇᑕᒥ ᐊᓪᓚᕕᖓᓂᑦ
