ᓄᓇᕗᑦ ᑐᙵᕕᒃᑯᑦ ᑐᓴᒐᒃᓴᖏᑦ ᓴᖅᑭᑕᐅᓯᒪᔪᑦ: ᓄᓇᖅᑲᑎᒥᓄᑦ ᐊᖑᓇᓱᒍᔾᔨᓂᕐᒧᑦ ᑮᓇᐅᔭᖃᕈᑎᑦ ᑕᒪᐃᓐᓄᑦ ᓄᓇᓕᖕᓂ ᐊᖑᓇᓱᑏᑦ ᑲᑐᔾᔨᖃᑎᒌᖏᓐᓄᑦ ᓄᓇᕗᖕᒥ ᓄᕙᒡᔪᐊᕐᓇᖅ−19 ᐱᓪᓗᒍ
ᐱᓂᐊᕐᓂᕋᐅᑎᕗᑦ : “ᐃᓄᖕᓄᑦ ᐱᕚᓪᓕᕈᑎᒃᓴᐅᔪᑦ ᐃᓅᓯᒃᑯᑦ, ᐱᖅᑯᓯᑐᖃᒃᑯᑦ, ᐱᕙᓪᓕᐊᔪᓕᕆᓂᒃᑯᑦ ᐊᖏᖃᑎᒌᒍᑦ ᐊᑐᕐᓗᒍ”
ᑐ ᓴᒐ ᑦ ᓴᓐ ᖑ ᑎ ᑕ ᐅ ᔪ ᖅ
ᐃᕐᖐᓐᓈᖅ ᓴᖅᑭᖅᑕᐅᒋᐊᓕᒃ
ᓄᓇᖅᑲᑎᒥᓄᑦ ᐊᖑᓇᓱᒍᔾᔨᓂᕐᒧᑦ ᑮᓇᐅᔭᖃᕈᑎᑦ ᑕᒪᐃᓐᓄᑦ ᓄᓇᓕᖕᓂ ᐊᖑᓇᓱᑏᑦ ᑲᑐᔾᔨᖃᑎᒌᖏᓐᓄᑦ ᓄᓇᕗᖕᒥ ᓄᕙᒡᔪᐊᕐᓇᖅ−19 ᐱᓪᓗᒍ
ᐃᓄᐃᑦ ᑎᒥᑯᑎᖏᑦ ᐱᑕᖃᖅᑎᑦᑎᓂᐊᕐᑐᑦ $10,000−ᓂᒃ ᐊᖑᓇᓱᒃᑏᑦ ᑲᑐᓱᔾᔨᖃᑎᒌᖏᓐᓄᑦ ᓄᓇᕗᖕᒥ ᐃᑲᔪᕈᑕᐅᓂᐊᕐᓗᑎᒃ ᓄᓇᖅᑲᑎᒥᓄᑦ ᐊᖑᓇᓱᒍᔾᔨᓂᐊᕐᑎᓪᓗᒋᑦ ᐊᒻᒪ ᐃᑲᔪᕐᓯᔪᓐᓇᖁᓪᓗᒍ ᐊᑦᑐᐃᓗᐊᕐᑕᐃᓕᒪᑎᑕᐅᓂᖓᓄᑦ ᓄᕙᒡᔪᐊᕐᓇᖅ-19 ᐃᓄᖕᓂᑦ ᑮᓇᐅᔭᑎᒍᑦ ᐊᒻᒪ ᓂᕿᒃᓴᖃᑦᑎᐊᖏᓐᓂᕐᒧᑦ ᐊᒃᓱᕈᓐᓇᑐᒃᑰᑎᓪᓗᑕ.
“ᑕᒪᑦᑕ ᐱᒻᒪᕆᐅᔪᒥᒃ ᓯᐊᒻᒪᕐᑕᐃᓕᒪᖃᑕᐅᔭᕆᐊᖃᕋᑦᑕ ᓄᕙᒡᔪᐊᕐᓇᖅ−19-ᒥᒃ,” ᐅᖃᖅᑐᖅ ᓄᓇᕗᑦ ᑐᙵᕕᒃᑯᑦ (ᑐᙵᕕᒃᑯᑦ) ᐊᖓᔪᖅᑳᖓ ᐊᓗᑭ ᑰᑦᑎᖅ. “ᓂᕿᑦᑎᐊᕙᓂᒃ ᓂᕆᖃᑦᑕᕐᓂᖅ, ᓂᕿᒃᓴᖃᑦᑎᐊᕐᓂᖅ ᐊᒻᒪ ᐊᑐᐃᓐᓇᖃᕆᐊᖃᓐᓂᖅ ᑎᒥᒧᑦ ᓂᕿᑦᑎᐊᕙᓂᒃ ᓂᕿᓪᓚᑦᑖᓂᒃ ᐆᒪᔪᒥᓂᕐᓂᒃ, ᐃᓚᒌᓄᑦ ᐊᒻᒪ ᓄᓇᓕᖕᓄᑦ ᐃᑲᔪᓐᓂᖃᕈᓐᓇᕐᒪᑦ ᑎᒥᑦᑕ ᐋᓐᓂᐊᑖᕐᑕᐃᓕᒪᒍᑎᖏᓐᓄᑦ ᓂᕿᑦᑎᐊᕙᓂᒃ ᓂᕿᖃᕈᑦᑕ.”
“ᐃᓄᐃᑦ ᓄᓇᖅᑲᑎᒌᑦᑎᐊᒐᔪᖕᒪᑕ, ᐱᒪᑐᓲᖑᓪᓗᑕ ᓴᓂᓪᓕᑎᓐᓂᒃ ᐊᒻᒪ ᐃᓐᓇᕆᔭᑦᑎᓐᓂᒃ ᐱᒪᑐᑦᑎᐊᕆᐊᖃᓕᕋᐃᒐᑦᑕ,” ᐅᖅᑲᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓ ᐱᔭᐃ ᐊᕿᐊᕈᖅ. “ᑕᐃᒪᓐᓇ ᓄᓇᖅᑲᑎᒥᓄᑦ ᐊᖑᓇᓱᒍᔾᔨᓂᒃᑯᑦ ᐃᑲᔪᓐᓂᖃᓐᓂᐊᕐᒪᑦ ᐃᓄᖕᓂᒃ ᓂᕿᒃᓴᖃᑦᑎᐊᐸᙱᑦᑐᓂᒃ ᑕᒪᓐᓇᐅᓕᕐᑎᓪᓗᒍ ᓄᕙᒡᔪᐊᕐᓇᖅ−19, ᑭᓯᐊᓂᑦᑕᐅᖅ ᐊᖑᓇᓱᒃᑎᐅᔪᓂᒃ ᖃᓂᒃᓴᓗᐊᕐᑕᐃᓕᒪᒍᑕᐅᓂᐊᕐᒥᒻᒪᑦ ᐃᓅᖃᑎᒥᓂᒃ ᓄᓇᒥ ᐊᐅᓪᓚᕐᓯᒪᓗᑎᒃ.”
ᓄᓇᓕᖕᓂ ᐊᖑᓇᓱᒃᑎᓄᑦ ᑲᑐᔾᔨᖃᑎᒌᑦ ᑲᐅᔨᒪᑦᑎᐊᕐᒪᑕ ᓄᓇᒥᖕᓂᒃ ᐊᒻᒪ ᖃᐅᔨᒪᓪᓗᑎᒃ ᐊᑲᐅᓂᕐᐹᒥᒃ ᑐᓂᐅᖅᑲᐃᓗᑎᒃ ᓱᓇᒃᑯᑎᓂᒃ ᐃᑲᔪᕐᓯᓂᖃᕈᓐᓇᕐᑐᓂᒃ ᓄᓇᖅᑲᑎᒥᓄᑦ ᐊᖑᓇᓱᒍᔾᔨᓂᐊᕐᑎᓪᓗᒋᑦ. ᓄᓇᓕᖕᒥ ᐊᖑᓇᓱᒃᑏᑦ ᑲᑐᔾᔨᖃᑎᒌᖏᑦ ᓂᕈᐊᒐᖃᑦᑕᓂᐊᕐᒪᑕ ᐊᖑᓇᓱᒃᑎᐅᓂᐊᕐᑐᓂᒃ, ᐊᒻᒪᓗ ᑐᓂᐅᖃᖅᐃᓕᖅᑲᑕ ᑮᓇᐅᔭᓂᒃ ᐅᕐᓱᒃᓴᑖᕈᑎᒃᓴᓂᒃ ᐊᒻᒪᓗ ᐊᓯᖏᓐᓂ ᑮᓇᐅᔭᐃᕈᑕᐅᔭᕆᐊᓕᖕᓂ ᐊᖑᓇᓱᒃᑎᑦᑎᓂᐊᕐᑎᓪᓗᒋᑦ. ᐆᒪᔪᖅᑕᐅᔪᑦ
ᐸᔪᒍᑎᐅᓂᐊᕐᓗᑎᒃ ᐃᓐᓇᕐᓄᑦ, ᐅᐃᒡᒐᓂᕐᓄᑦ, ᓄᓖᖅᓯᒪᔪᓄᑦ, ᐊᒻᒪᓗ ᓇᖕᒥᓂᖅ ᐊᓂᑦᑕᐃᓕᑎᓯᒪᔪᓄᑦ ᐅᕝᕙᓗ ᐊᓂᑦᑕᐃᓕᑎᑕᐅᔪᓄᑦ ᓄᓇᓕᖕᓂ.
ᓄᓇᕐᔪᐊᕐᒥ ᐋᓐᓂᐊᖃᑦᑕᐃᓕᒪᓂᕐᒧᑦ ᑎᒥᐅᔪᑦ ᓇᓗᓇᐃᕆᔾᔪᑎᖃᓚᐅᕐᑎᓪᓗᒋᑦ ᓄᕙᒡᔪᐊᕐᓇᖅ−19 ᓄᓇᕐᔪᐊᕐᒥ ᓯᐊᒻᒪᐸᓪᓕᐊᓂᖓᓂᖑᒃ, ᐃᓄᐃᑦ ᑎᒥᖁᑎᖏᑦ ᑲᒪᒋᐊᕈᑎᖃᕐᒪᑕ, ᐅᑕᖅᑭᑐᐃᓐᓇᕈᑎᖃᕋᑎᒃ ᓯᐊᒻᒪᐸᓪᓕᐊᑦᑕᐃᓕᒪᒍᑎᐅᔪᓐᓇᕐᑐᓂᒃ ᓄᕙᒡᔪᐊᕐᓇᕐᒥᒃ ᓄᓇᕗᖕᒥ. ᑐᙵᕕᒃᑯᑦ ᐱᑕᖃᖅᑎᑦᑎᕗᑦ $5,000−ᓂᒃ ᐊᑐᓂᑦ ᓄᓇᓕᖕᓂ ᐊᖑᓇᓱᒃᑏᑦ ᑲᑐᔾᔨᖃᑎᒌᖏᓐᓄᑦ ᓇᑉᐸᓪᓗᐊᖏᑦ ᐱᔭᐅᓂᐊᕐᓗᑎᒃ ᑮᓇᐅᔭᖃᕈᑏᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ.
-30-
ᑐᑭᓯᒋᐊᒃᑲᓐᓂᕈᒪᒍᕕᑦ, ᑐᑭᓯᒋᐊᒃᑲᓐᓂᕈᓐᓇᕐᐳᑎᑦ ᐅᕗᖓ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᐅᑲᐃᓐᓇᕐᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867)-222-1443
ᖃᔮᖅ ᐃᐊᓪᖦᒍᑦ ᑐᓴᐅᒪᔭᐅᔭᕆᐊᖃᖅᑐᓂᒃ ᖃᐅᔨᒪᔨ ᑎᑎᕋᕐᕕᖓ ᐊᖓᔪᖅᑳᑉ ᐊᓗᑭ ᑰᑦᑎᖅ ᐅᖄᓚᐅᑖ: (867) 222-3939
ᐊᕐᓇᐅᔪᖅ ᖃᐅᒪᒃ
ᑐᑭᒧᐊᒃᑎᑦᑎᔨ ᐃᓄᐃᑦ ᐃᑲᔪᖅᑕᐅᔾᔪᑎᖏᓐᓄᑦ ᐊᒻᒪᓗ ᐱᔨᑦᑎᕋᕈᑎᓄᑦ ᓄᓇᕗᑦ ᑐᙵᕕᒃ ᑎᒥᖓ
