ᑲᑭᕙᒃᑯᑦ ᐋᖅᑭᓯᒃᑲᓂᖅᑐᑦ ᓄᕙᕐᔪᐊᓇᖅᑐᖅ−19 ᐃᖅᑲᓇᐃᔭᕐᕕᓐᓄᑦ ᐃᑲᔫᑎᓂᑦ ᐃᑲᔪᖅᑕᐅᓪᓗᑎᒃ ᕿᑭᖅᑕᓂᒃᑯᓐᓂᑦ

ᑲᑭᕙᒃᑯᑦ ᐋᖅᑭᓯᒃᑲᓂᖅᑐᑦ ᓄᕙᕐᔪᐊᓇᖅᑐᖅ−19 ᐃᖅᑲᓇᐃᔭᕐᕕᓐᓄᑦ ᐃᑲᔫᑎᓂᑦ ᐃᑲᔪᖅᑕᐅᓪᓗᑎᒃ ᕿᑭᖅᑕᓂᒃᑯᓐᓂᑦ

 In media-releases-inuk

ᐃᖃᓗᐃᑦ, ᓄᓇᕗᑦᒪᐃ 11, 2021 – ᐃᑲᔪᖅᑎᖃᖅᑐᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ (ᕿᑭᖅᑕᓂᒃᑯᓐᓂᑦ), ᑲᑭᕙᒃ ᑲᑐᔾᔨᖃᑎᒌᑦ ᐋᖅᑭᓯᒃᑲᓂᖅᑐᑦ ᕿᑭᖅᑕᓂ ᓄᕙᕐᔪᐊᓇᖅᑐᖅ−19 ᐱᔾᔪᑎᒋᓪᓗᒍ ᐃᖅᑲᓇᐃᔭᕐᑯᓐᓄᑦ ᐃᑲᔫᑎᓂᑦ. ᐃᒪᓐᓇᑲᓐᓃᑦ $500,000 ᐊᖏᖅᑕᐅᓯᒪᒻᒪᑕ ᐋᖅᑭᑦᑕᐅᑲᓐᓂᖁᓪᓗᒋᑦ ᑖᒃᑯᐊ ᐃᑲᔫᑏᑦ, ᒫᓐᓇ ᑲᑎᑦᑐᒋᑦ $1 ᒥᓕᐊᓐ ᐃᑲᔫᑎᐅᓂᐊᖅᑐᑦ ᐃᓚᖏᓐᓄᑦ ᒥᑭᔫᑕᐅᓂᕐᓴᓄᑦ, ᖃᓄᐃᓴᕋᐃᒍᓐᓇᓂᕐᓴᓄᑦ ᐃᖅᑲᓇᐃᔭᕐᕕᓐᓄᑦ ᕿᑭᖅᑕᓂ ᓄᓇᓕᐅᔪᓃᑦᑐᓂᑦ.

“ᒥᑭᓂᕐᓴᐃᑦ ᐃᓄᓐᓄᑦ−ᓇᒻᒥᓂᕆᔭᐅᔪᑦ ᐃᖅᑲᓇᐃᔭᕐᕕᖁᑏᑦ ᑐᙵᕕᓪᓚᕆᐅᕙᒻᒪᑕ ᓄᓇᑦᑎᓐᓂ ᒪᑭᒪᓇᓱᐊᕈᑕᐅᕙᑦᑐᓄᑦ ᕿᑭᖅᑕᓂ ᓄᓇᓕᐅᔪᓂᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ, ᐸᐅᓗᓯ ᐊᕿᐊᕈᖅ. “ᓈᒻᒪᔅᓯᑎᑦᑎᔭᕆᐊᖃᕋᑦᑕ ᐊᑐᕈᓐᓇᑕᑦᑎᓐᓂᒃ ᐃᑲᔪᕐᓗᒋᑦ ᒪᑭᑕᒍᓐᓇᖁᓪᓗᒋᑦ ᐊᒻᒪᓗ ᐃᖅᑲᓇᐃᔭᖅᑎᖃᐃᓐᓇᕈᓐᓇᖁᓪᓗᒋᑦ ᐃᓄᓐᓄᑦ ᖃᓂᒪᓇᖅᑐᖅᑕᖃᕐᓂᖓᓂ ᓄᓇᕐᔪᐊᔪᓕᒫᒥ. “ᐱᒃᑯᒍᓱᑉᐳᒍᑦ ᐃᑲᔪᕆᐊᔅᓴᖅ ᐃᓄᓐᓄᑦ−ᓇᒻᒥᓂᕆᔭᐅᔪᓂᑦ ᐃᖅᑲᓇᐃᔭᕐᕕᖁᑎᒋᔭᐅᔪᓂᑦ ᐃᖅᑲᓇᐃᔮᔅᓴᖃᖅᑎᑦᑎᕙᑦᑐᓂᑦ ᐱᔨᑦᑎᕋᐅᑎᖃᕐᐸᑦᑕᓂᓪᓗ ᕿᑭᖅᑕᓂ ᓄᓇᓕᖏᓐᓄᑦ.”

“ᖃᓂᒪᓇᖅᑐᖅ ᓄᕙᕐᔪᐊᓇᖅᑐᖅ−19 ᐊᑑᑎᓂᖃᑲᒻᒪᔅᓯᒪᒻᒪᑦ ᐃᓄᓐᓄᑦ−ᓇᒻᒥᓂᕆᔭᐅᔪᑦ ᐃᖅᑲᓇᐃᔭᕐᕕᖁᑎᒋᔭᐅᔪᓄᑦ ᐊᕐᕌᒎᑉ ᐅᖓᑖᓂ ᐊᒻᒪᓗ ᒫᓐᓇ ᖃᓂᒪᓇᖅᑐᖅᑕᖃᓕᖅᑐᓂ ᓄᓇᑦᑎᓐᓂ ᐃᑲᔪᖅᑕᐅᒋᐊᒃᑲᓐᓂᕆᐊᖃᕐᓂᕐᓴᐅᓕᕐᖓᑕ ᐅᕙᑦᑎᓐᓄᑦ ᒫᓐᓇ,” ᐅᖃᖅᑐᖅ ᔨᐅᕋᒥ ᑑᕐᖔᓗᒃ, ᐃᒃᓯᕙᐅᑕᖅ, ᑲᑭᕙᒃ ᑲᑐᔾᔨᖃᑎᒌᒃᑯᓐᓂᑦ. “ᖁᕕᐊᓱᑦᑐᖓ ᐊᑐᕈᓐᓇᕋᑦᑎᒍ ᑖᒃᑯᐊ ᑮᓇᐅᔭᑦ ᐃᓄᐃᑦ ᐊᐅᓚᑕᖏᓐᓃᙶᖅᑐᑦ ᐃᑲᔫᑎᖃᕐᓂᐊᕐᖓᑕ ᐃᓄᓐᓄᑦ−ᓇᒻᒥᓂᕆᔭᐅᔪᓄᑦ ᐃᖅᑲᓇᐃᔭᕐᕕᐅᔪᓄᑦ.”

ᕿᑭᖅᑕᓂᒃᑯᑦ ᖃᓂᒪᓇᖅᑐᖅ ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᑎᖏᑦ ᐅᑎᖅᑎᒋᐊᖃᙱᓪᓗᑎᒃ ᐃᑲᔫᑎᐅᓂᐊᕐᖓᑕ ᐊᒥᓲᓂᓕᓐᓄᑦ ᑎᑭᐅᒪᔪᓄᑦ ᐃᒪᓐᓇᓄᑦ $25,000 ᐊᑐᓂᑦ ᐃᑲᔫᓯᐊᖅᑖᖃᑕᐅᔪᓐᓇᖅᑐᓄᑦ.

ᐃᓱᒪᒋᔭᐅᒋᐊᕈᒪᔪᑦ ᐃᑲᔫᓯᐊᔅᓴᓄᑦ ᑐᔅᓯᕋᖃᑦᑕᓂᐊᖅᑐᑦ ᑕᑯᑎᑦᑎᔭᕆᐊᓖᑦ ᐃᑲᔪᖅᑕᐅᔭᕆᐊᖃᕐᓂᖏᓐᓂᒃ ᑐᓂᓯᓗᑎᒃ ᓇᓗᓇᐃᔭᕐᓯᒪᑦᑎᐊᖅᑐᓂᑦ ᒫᓐᓇ ᖃᓄᐃᓕᖓᓂᖏᑕ ᒥᔅᓵᓅᖓᔪᓂᑦ ᐃᖅᑲᓇᐃᔭᕐᕕᖁᑎᖏᑕ ᐊᒻᒪᓗᑦᑕᐅᖅ ᑐᑭᓯᐅᒪᔾᔪᑎᔅᓴᓂᑦ ᐋᖅᑭᓯᒪᓂᕆᒐᔪᓲᖏᓐᓂᒃ ᐊᐅᓚᓂᖏᓐᓄᑦ ᐊᑭᖏᑕ ᐃᖅᑲᓇᐃᔭᕐᕕᖁᑎᖏᑕ, ᓲᕐᓗ ᒪᑯᐊ:

  • ᐊᑐᖅᑐᐊᕈᑏᑦ
  • ᐅᖅᑰᓴᐅᑎᓯᐅᑏᑦ
  • ᐊᐅᓚᐅᑎᓯᐅᑏᑦ
  • ᑐᓴᐅᒪᖃᑦᑕᐅᑎᔾᔪᑏᑦ
  • ᓚᐃᓴᐃᑦ ᓇᓪᓕᐅᒃᑯᒫᓪᓗ

ᐊᑐᓂᑦ ᑐᔅᓯᕋᖅᑐᑦ ᑐᓂᓯᖃᑦᑕᕆᐊᖃᕐᓂᐊᖅᑐᑦ ᐱᔭᕇᕐᓯᒪᑦᑎᐊᖅᑐᓂᑦ ᑐᔅᓯᕋᐅᓯᐅᕈᑎᖏᓐᓂᒃ ᐊᒻᒪᓗᑦᑕᐅᖅ ᑐᓂᔭᕆᐊᓕᖏᓐᓂᒃ ᐃᑲᔪᕐᓯᕆᐊᕈᑎᖏᓐᓂᒃ ᑎᑎᖅᑲᓂᑦ.

ᑮᓇᐅᔭᑦ ᕿᑭᖅᑕᓂ ᓄᕙᕐᔪᐊᓇᖅᑐᖅ−19 ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᑎᓄᑦ ᐅᕙᙶᕐᓯᒪᔪᑦ ᓴᓂᕐᕙᖅᑕᐅᓯᒪᔪᓂᑦ ᐊᑐᖅᑕᐅᓯᒪᙱᑦᑐᓂᑦ ᓯᕗᒧᑦ ᑮᓇᐅᔭᓄᑦ ᑐᓂᔭᐅᓯᒪᔪᓂᑦ ᑲᑭᕙᒃᑯᓐᓄᑦ ᕿᑭᖅᑕᓂᒃᑯᓐᓂᑦ.

ᑐᔅᓯᕋᐅᓯᐅᕈᑏᑦ ᐊᒻᒪᓗ ᐃᑲᔫᓯᐊᔅᓴᓄᑦ ᐊᑐᐊᒐᑦ ᑕᑯᔭᔅᓴᐅᕗᑦ ᐅᕙᙵᑦ:

ᕿᑭᖅᑕᓂ ᓄᕙᕐᔪᐊᓇᖅᑐᖅ−19 ᐱᔾᔪᑎᒋᓪᓗᒍ ᐃᖅᑲᓇᐃᔭᕐᕕᓐᓄᑦ ᐃᑲᔫᑏᑦ www.kakivak.ca

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ ᐅᓇ:

ᐅᐃᓪ Hᐊᑉᑭᓐᔅ,
ᑭᖑᕝᕕᐅᑎᓯᒪᑲᐃᓐᓇᖅᑐᖅ ᑐᑭᒧᐊᑦᑎᑦᑎᔨᖓᓐᓄᑦ ᑐᓴᐅᒪᖃᑦᑕᐅᑎᑦᑎᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
whopkins@qia.ca
867.975.8413/1.800.667.2742

ᒋᓕᓐ ᑲᓯᓐᔅ,
ᐊᖏᔪᖅᑳᖅ, ᑲᑐᔾᔨᖃᑎᒌᓐᓂᕐᒧᑦ ᐸᕐᓇᐃᓂᕐᒧᓪᓗ
ᑲᑭᕙᒃ ᑲᑐᔾᔨᖃᑎᒌᒃᑯᓐᓂᑦ
gcousins@kakivak.ca
867.222-1528/1.800.561.0911

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ