ᑕᓪᓗᕈᑎᐅᑉ ᐃᒪᖓᓂ ᐅᐊᑦᑎᔩᑦ ᐃᖅᑲᓇᐃᔭᓕᖅᑐᑦ

ᑕᓪᓗᕈᑎᐅᑉ ᐃᒪᖓᓂ ᐅᐊᑦᑎᔩᑦ ᐃᖅᑲᓇᐃᔭᓕᖅᑐᑦ

 In blog-inuk

ᕿᑭᖅᑕᓃᒃᑯᑦ ᐳᓛᕆᐊᓚᐅᕐᒪᑕ ᐃᒃᐱᐊᕐᔪᖕᒧᑦ ᐄᐳᓪᒥ ᑲᑎᒪᖃᑎᖃᕆᐊᖅᑐᖅᖢᑎᒃ ᑕᓪᓗᕈᑎᐅᑉ ᐃᒪᖓᓂᒃ ᐅᐊᑦᑎᔨᓂ.  ᑖᓐᓇ ᓇᐅᑦᓯᖅᑐᕐᓂᕐᒧᑦ ᐱᓕᕆᐊᖓ ᓯᕗᓂᐊᒍᑦ ᐃᑲᔫᓯᐊᖑᔪᖅ ᑕᓪᓗᕈᑎᐅᑉ ᐃᒪᖓᓂᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᖅᑖᕐᓂᖏᓐᓄᑦ ᐊᖏᕈᑎᓂᑦ ᑐᓂᔭᐅᔪᓂᑦ ᑲᓇᑕᒥ ᒥᕐᖑᐃᖅᓯᕝᕕᓕᕆᔨᒃᑯᓐᓄᑦ.  

ᐱᖓᓲᔪᖅᑐᔪᓂ ᐅᐊᑦᑎᔨᓂ ᐃᖅᑲᓇᐃᔭᓕᖅᑐᑦ ᐃᒃᐱᐊᕐᔪᖕᒥ ᐊᐅᓚᑦᑎᓂᐊᖅᑐᓂᒃ ᐊᒻᒪᓗ ᓇᐅᑦᓯᖅᑐᕐᓗᑎᒃ ᑕᓪᓗᕈᑎᐅᑉ ᐃᒪᖓᓂ.  ᑖᒃᑯᐊ ᐅᐊᑦᑎᔩᑦ ᐊᔾᔨᒌᓐᖏᑦᑐᓂᒃ ᐱᓕᕆᐊᒃᓴᖃᖅᑐᑦ; ᓇᐅᑦᓯᖅᑐᕐᓂᕐᒥᒃ ᑕᕆᐅᕐᒥ ᓯᑰᑉ ᖃᓄᐃᓐᓂᕆᔭᖏᓐᓂᒃ, ᑎᑎᕋᖅᐸᓪᓕᐊᓗᒋᑦ ᐃᓕᖅᑯᓯᖃᕐᕕᐅᔪᓂᑦ ᓄᓇᒋᔭᐅᔪᕕᓂᕐᓂ ᐊᒻᒪᓗ ᐃᑲᔪᕐᓂᕐᒥᒃ ᕿᓂᖅᑎᓂᒃ.  ᐃᓚᒋᓪᓗᒋᑦ ᐱᓕᕆᐊᖏᓐᓂᒃ, ᐃᖃᓗᒐᓱᖃᑦᑕᖅᖢᑎᒃ ᓇᑦᑎᕋᓱᖃᑦᑕᖅᖢᑎᓪᓗ ᓄᐊᓴᐃᒍᒪᓪᓗᑎᒃ ᑐᑭᓯᒋᐊᕈᑎᓂᒃ ᐃᒪᕐᒥᐅᑕᐅᔪᓂᑦ.  ᐊᖑᔭᖏᑦ, ᓄᓇᓕᖕᒥᐅᓄᑦ ᓂᕆᕕᔾᔪᐊᕈᑕᐅᓲᖑᓪᓗᑎᒃ.  

ᐃᑲᔪᕐᓂᐊᕐᓗᓂ ᖃᓄᑎᒋ ᐱᒻᒪᕆᐅᑎᒋᔭᐅᓂᖏᑦ ᐃᓄᐃᑦ ᓂᕿᖏᑦ ᐊᒻᒪᓗ ᑖᓐᓇ ᐱᓕᕆᐊᖑᔪᖅ, ᑖᒃᑯᐊ ᐅᐊᑦᑎᔩᑦ ᐅᒪᔪᖃᑦᑕᖅᑐᑦ ᓂᕿᒃᓴᕆᔭᐅᓂᐊᖅᑐᓄᑦ ᐃᓄᐃᑦ ᑕᐱᕇᑦ ᑲᓇᑕᒃᑯᑦ ᐅᑭᐅᖅᑕᖅᑐᒻᒥᓐᖔᖅᑐᓂᒃ ᓂᕿᖏᓐᓂᒃ ᖃᓄᐃᓕᐅᕐᓂᐅᔪᒥᒃ ᐊᑐᕚᒥ ᒪᐃᖑᓕᖅᐸᑦ.

ᑖᓐᓇ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᒃᓴᖏᓐᓄᑦ ᐊᖏᕈᑎ ᐱᔭᕇᖅᓯᒪᓕᖅᑎᓪᓗᒍ ᑕᓪᓗᕈᑎᐅᑉ ᐃᒪᖓᓄᑦ ᐃᒪᕐᒥᐅᑕᐃᑦ ᓴᐳᔾᔨᕕᖓᓄᑦ ᐊᖏᓂᖅᐹᖑᓂᐊᖅᑐᖅ ᓴᐳᒻᒥᔭᐅᓯᒪᔪᒥᒃ ᐃᒪᓂᒃ ᑲᓇᑕᒥ.  ᐃᒃᐱᐊᕐᔪᒃ ᓄᓇᓕᐅᖃᑕᐅᔪᖅ ᑕᓪᓕᒪᐅᔪᓂᑦ ᓄᓇᓕᐅᔪᓂᑦ ᐊᑭᒋᔭᖃᖅᑐᓄᑦ ᑕᓪᓗᕈᑎᐅᑉ ᐃᒪᖓᓂ.  ᑕᐃᒃᑯᐊ ᐊᓯᖏᑦ ᓄᓇᓖᑦ ᐊᑭᒋᔭᖃᖃᑕᐅᔪᑦ ᑕᓪᓗᕈᑎᐅᑉ ᐃᒪᖓᓂ ᐊᐅᓱᐃᑦᑐᖅ, ᖃᐅᓱᐃᑦᑐᖅ, ᒥᑦᑎᒪᑕᓕᒃ ᐊᒻᒪᓗ ᑲᖏᖅᑐᒑᐱᒃ.  ᕿᑭᖅᑕᓃᒃᑯᑦ ᓂᕆᐅᒋᔭᖃᖅᑐᑦ ᑕᐃᒃᑯᐊᑦᑕᐅᖅ ᑕᓪᓕᒪᐅᔪᑦ ᓄᓇᓖᑦ ᐅᐊᑦᑎᔨᑖᕈᓐᓇᖅᓯᓛᕐᓂᖏᑦ ᓯᕗᓂᕐᒥᒃ.

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ