ᑎᒥᖁᑎᒋᔭᐅᔫᑉ ᐃᓗᐊᓂ
ᓯᓚᑖᓄᓪᓗ ᐱᔫᒥᓵᕈᑎ
ᑖᓐᓇ ᐃᖅᑲᓇᐃᔮᒃᓴᖅ ᐱᓕᕆᐊᒃᓴᖃᖅᑐᑦ ᑐᑭᒧᐊᒍᑎᒃᓴᓕᐅᕐᓂᕐᒥᒃ ᑕᑯᓐᓇᖑᐊᖅᑕᐅᔪᓂᒃ ᐊᒻᒪᓗ ᓯᕗᒃᑲᖅᑎᒋᔭᐅᓂᐊᖅᖢᓂ ᐱᓕᕆᕕᖕᒧᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᓕᕆᓂᕐᒥᒃ ᐊᒻᒪᓗ ᓄᓇᓖᑦ ᐃᓚᐅᑎᑕᐅᓂᖏᓐᓄᑦ, ᖃᐅᔨᓴᕐᓂᕐᒧᑦ ᐊᒻᒪᓗ ᓇᐅᑦᑎᖅᓱᕐᓂᕐᒧᑦ ᐊᒻᒪᓗ ᐆᒥᖓ ᓴᐳᔾᔨᕕᓕᕆᓂᕐᒧᑦ ᐱᕙᓪᓕᐊᔾᔪᑎᒃᓴᓂ (ᐸᕐᓇᐃᓂᖅ ᐊᒻᒪᓗ ᐅᒪᔪᓕᕆᓂᖅ). ᑖᓐᓇ ᐃᖅᑲᓇᐃᔮᒃᓴᖅ ᐊᖏᔪᖅᑲᐅᑎᓂᑦ ᐊᐅᓚᑦᑎᕕᖕᒥ ᐃᓚᒋᔭᐅᔪᖅ ᐊᔾᔨᒌᙱᑦᑐᓂᒃ ᐱᓕᕆᐊᒃᓴᖃᕐᓂᐊᖅᖢᓂ ᑎᒥᐅᔪᒧᑦ ᑲᔪᓯᑎᑕᐅᓗᑎᒃ ᓯᕗᓪᓕᐅᑎᑕᐅᔪᒪᔪᑦ, ᑎᓕᐅᖅᑕᐅᓯᒪᑎᓪᓗᒋᑦ ᓯᕗᓕᖅᑎᐅᑉ ᐃᖅᑲᓇᐃᔭᖅᑎᓄᑦ ᑐᖏᓕᐊᓄᑦ ᐊᐅᓚᑦᑎᓂᕐᒧᑦ ᐊᒻᒪᓗ ᐃᑲᔫᓯᐊᒃᓴᓂᓪᓗ. ᑖᓐᓇ ᓯᕗᓕᖅᑎ ᐃᖅᑲᓇᐃᔭᖅᑎᓄᑦ ᑎᓕᓯᖃᑦᑕᕐᓂᐊᖅᑐᖅ ᓯᕗᒃᑲᖅᑎᒥᒃ ᐱᓕᕆᕕᖕᒥ ᐊᖓᔪᖅᑳᖃᕐᓂᐊᖅᑐᖅ ᓯᕗᓕᖅᑎᐅᑉ ᐃᖅᑲᓇᐃᔭᖅᑎᓄᑦ ᑐᖏᓕᐊᓄᑦ ᐊᐅᓚᑦᑎᓂᕐᒥᒃ ᐊᒻᒪᓗ ᐃᑲᔫᓯᐊᒃᓴᓂᓗ ᓇᓗᓇᐃᔭᖃᑦᑕᕐᓂᐊᕐᒪᑕ ᑲᔪᓯᑎᑕᐅᑦᓯᐊᕐᓂᖏᑦ ᑕᒻᒪᖅᓯᒪᙱᓪᓗᑎᒃ, ᐊᒻᒪᓗ ᖃᓄᐃᙱᑦᓯᐊᕐᓗᑎᒃ ᐱᓕᕆᐊᖑᔪᓂᒃ. ᓯᕗᒃᑲᖅᑎᐅᓂᖅ ᐱᖃᓯᐅᑎᓯᒪᔪᖅ ᒥᐊᓂᖅᓯᓂᕐᒥᒃ ᐱᓕᕆᕕᖕᒥ ᐃᓄᐃᑦ ᖃᐅᔨᒪᔭᑎᖃᖏᓐᓂᒃ ᐊᒻᒪ ᐃᑲᔫᓯᐊᒃᓴᓂᓗ ᐅᕝᕙᓘᓐᓃᑦ ᐊᓯᖏᓐᓂᑦ ᐱᓕᕆᐊᒃᓴᓂᒃ ᑭᒡᒐᖅᑐᕐᓗᒍ ᓯᕗᓕᖅᑎ ᐃᑲᖅᓇᐃᔭᖅᑎᓄᑦ.
ᑐᑭᒧᐊᒃᑎᑦᓯᔨ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪ ᐃᓚᐅᑎᑦᓯᓂᕐᒧᓪᓗ ᓯᕗᒃᑲᖅᑎᒋᔭᐅᖃᑦᑕᕐᓂᐊᖅᑐᖅ ᐱᓕᕆᐊᒃᓴᓂ ᑎᓕᔭᐅᓯᒪᔪᓂᑦ, ᓇᓗᓇᐃᔭᖃᑦᑕᕐᓗᓂᒋᑦ ᐊᑐᐊᒐᐃᑦ, ᒪᓕᒐᒃᓴᐃᑦ ᐊᒻᒪᓗ ᖃᓄᐃᓕᐅᕈᑎᑦ ᐋᖅᑭᒃᓯᒪᓂᖏᓐᓄᑦ ᐊᒻᒪᓗ ᒪᓕᒃᑕᐅᑦᓯᐊᕐᓂᖏᓐᓄᑦ ᑲᔪᓯᓂᖃᑦᓯᐊᖁᓪᓗᒍ ᑎᒥᐅᔫᑉ ᐱᓕᕆᐊᒃᓴᖏᑦ. ᑖᓐᓇ ᑐᑭᓯᐊᒃᑎᑦᓯᔨ ᐱᓕᕆᐊᒃᓴᖃᑕᐅᓂᐊᖅᑐᖅ ᐃᑲᔪᕐᓗᒋᑦ ᐃᖅᑲᓇᐃᔭᖅᑎᖏᑦ ᐋᖅᑭᒃᓯᓂᕐᒥᒃ ᐊᑲᐅᙱᓕᐅᕈᑎᓂ, ᐊᔾᔨᒌᙱᑦᑐᓂᒃ ᐱᓕᕆᕕᖕᓂ ᐱᓕᕆᐊᒃᓴᓂ ᑐᑭᒧᐊᕆᔨᐅᓂᕐᒥᒃ, ᐸᕐᓇᐃᓂᕐᒥᒃ ᐊᒻᒪᓗ ᖃᐅᑕᒫᖅᓯᐅᑎᓂᒃ ᐱᓕᕆᐊᒃᓴᓂ ᐊᑐᓕᖅᑎᑦᓯᕙᓪᓕᐊᓂᕐᒧᑦ ᑭᒡᒐᖅᑐᕐᓗᒋᑦ ᓯᕗᓕᖅᑏᑦ ᐊᐅᓚᑦᑎᕕᐊ. ᑖᓐᓇ ᑐᑭᒧᐊᒃᑎᑦᓯᔨ ᐋᖅᑭᒃᓱᐃᖃᑦᑕᕐᓗᓂ ᐱᔨᑦᓯᕋᕈᑎᒋᔭᐅᔪᓂᒃ ᐊᓪᕕᖕᒥᑦ ᐊᓯᖏᓐᓄᑦ ᕿᑭᖅᑕᓃᒃᑯᑦ ᐱᓕᕆᕕᒋᔭᖏᓐᓂᑦ. ᓇᐅᑦᑎᖅᓱᕐᓂᕐᒥᒃ ᓄᖅᑲᖓᔾᔪᑎᓂᒃ ᐅᐸᓂᕋᐃᔾᔪᑎᓂᒃ ᐃᖅᑲᓇᐃᔭᖅᑎᖏᓐᓂᒃ ᐱᓕᕆᐊᒃᓴᐅᓂᐊᕐᒥᔪᑦ.
ᑐᑭᒧᐊᒃᑎᑦᓯᔨ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᐃᓚᐅᑎᑦᓯᓂᖅ ᑎᓕᔭᐅᓯᒪᒃᐸᑦ ᐊᐅᓚᑦᑎᔪᓐᓇᖅᑐᖅ ᑎᒥᐅᔪᒥᒃ, ᐊᐅᓚᑦᑎᓂᕐᒥᒃ ᐊᒻᒪᓗ ᑲᔪᓯᑎᑕᐅᓂᖏᑦ ᕿᑭᖅᑕᓃᒃᑯᑦ ᑲᑎᒪᔨᕋᓛᖏᑦ. ᑖᒃᑯᐊ ᐱᓕᕆᐊᒃᓴᐃᑦ ᐱᖃᓯᐅᑎᔪᑦ ᒪᓕᖕᓂᕐᒥᒃ ᕿᑭᖅᑕᓃᒃᑯᑦ ᑲᑎᒪᔨᕋᓛᖏᑕ ᖃᓄᐃᓕᐅᕈᑎᖏᑦ ᐊᒻᒪᓗ ᓇᓗᓇᐃᖅᓯᓂᕐᒥᒃ ᑖᒃᑯᐊ ᑲᑎᒪᔨᕋᓛᖑᔪᑦ ᑐᓂᔭᐅᓯᒪᑦᑎᐊᖃᑦᑕᕐᓂᖏᓐᓂᒃ ᑐᑭᓯᒍᑎᓂᒃ ᑕᒻᒪᖅᓯᒪᙱᑦᑐᓂᒃ ᑭᖑᕙᖅᓯᒪᙱᑦᑐᓂᓗ ᑐᑭᓯᒍᑎᒃᓴᓂ. ᖃᖓᑐᐃᓐᓇᖅ, ᑐᒃᓯᕋᖅᑐᖃᖅᑎᓪᓗᒍ, ᑖᓐᓇ ᑐᑭᒧᐊᒃᑎᑦᓯᔨ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᐃᓚᐅᑎᑦᓯᓂᕐᒧᑦ ᐃᑲᔪᕐᓂᐊᖅᑐᑦ ᓯᕗᓕᖅᑎᓂ ᓇᓗᓇᐃᔭᖃᑦᑕᕐᓗᓂᒋᑦ ᑖᒃᑯᐊ ᑎᓕᐅᕈᑕᐅᔪᑦ, ᐱᒋᐊᕈᑎᒋᔭᐅᔪᑦ ᐊᒻᒪᓗ ᖃᓄᐃᓕᐅᕆᐊᖁᔭᐅᔪᑦ ᑲᑎᒪᔨᓂᑦ ᐊᒻᒪᓗ ᓯᕗᓕᖅᑏᑦ ᑲᑎᒪᔨᓂᑦ ᑲᔪᓯᑎᑕᐅᓂᖏᓐᓄᑦ ᕿᑭᖅᑕᓃᒃᑯᑦ ᐃᖅᑲᓇᐃᔭᕐᕕᖏᓐᓄᑦ ᐃᖅᑲᓇᐃᔭᖅᑎᓄᓪᓗ.
ᑐᑭᒧᐊᒃᑎᑦᓯᔨ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᐃᓚᐅᑎᑦᓯᓂᕐᒥᒃ ᐱᕙᓪᓕᐊᑎᑦᓯᓂᐊᖅᑐᖅ ᐊᒻᒪᓗ ᐱᓕᕆᐊᒃᓴᖃᕐᓗᓂ ᐊᑐᓕᖅᑎᑦᓯᕙᓪᓕᐊᓂᕐᒥᒃ ᐱᓕᕆᕕᐅᑉ ᑐᕌᒐᕆᔭᖏᓐᓂᒃ ᐱᕙᓪᓕᐊᑎᑦᓯᓂᕐᒥᒃ ᐃᖅᑲᓇᐃᔭᖃᑎᒋᔭᐅᔪᓐᓇᖅᑐᓂᒃ, ᑲᑐᔾᔨᖃᑎᖃᕐᓂᕐᒥᒃ ᐊᒻᒪᓗ ᐃᖅᑲᓇᐃᔭᖃᑎᖃᕐᓂᕐᒥᒃ ᐃᓚᒋᔭᐅᔪᓄᑦ ᐱᖃᓯᐅᑎᓗᒋᑦ ᓄᓇᕗᑦ ᑐᙵᕕᒃᑯᑦ, ᕼᐊᒻᓚᒃᑯᑦ, ᐅᒪᔪᓕᕆᓂᕐᒧᑦ ᑲᑎᒪᔨᖏᑦ, ᐅᒪᔪᕐᓂᐊᖅᑏᑦ ᑲᑎᒪᔨᖏᑦ, ᕿᑭᖅᑕᓂ ᓄᓇᓕᖏᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑲᑎᒪᔨᕋᓛᓂᒃ, ᓄᓇᕗᑦ ᒐᕙᒪᒃᑯᑦ ᐊᒻᒪᓗ ᒐᕙᒪᑐᖃᒃᑯᑦ.
ᑖᓐᓇ ᐃᖅᑲᓇᐃᔮᒃᓴᖅ ᓯᓚᑦᑐᖅᓴᕐᕕᖕᒥᑦ ᓇᓗᓇᐃᒃᑯᑕᖅᑖᖅᓯᒪᔭᕆᐊᓕᒃ ᐃᓕᓐᓂᐊᕐᓂᕐᒥᒃ ᐃᓅᓯᓂᕐᒥᒃ ᖃᐅᔨᓴᕐᓂᕐᒥᒃ, ᓄᓇᒦᓐᖔᖅᑐᓂᒃ ᐊᐅᓚᑦᑎᓂᕐᒥᒃ, ᓄᓇᖃᖅᑐᑐᖃᐃᑦ ᒥᒃᓵᓄᑦ ᐃᓕᓐᓂᐊᕐᓂᖓᓂᒃ, ᓄᓇᐃᑦ ᓇᒦᓐᓂᖏᓐᓂᒃ, ᐃᓅᓰᑦ ᒥᒃᓵᓄᑦ ᐅᕝᕙᓘᓐᓃᑦ ᐊᔾᔨᒋᔭᖏᓐᓂᒃ ᐃᓕᓐᓂᐊᕐᓂᕐᒥᒃ. ᑲᑎᓯᒪᔪᓂᒃ ᐃᓕᓐᓂᐊᕐᓂᖃᕈᓐᓇᖅᑐᖅ ᐊᒻᒪᓗ/ᐅᕝᕙᓘᓐᓃᑦ ᐱᔪᓐᓇᕐᓂᖃᕈᓐᓇᖅᖢᓂ ᐃᓱᒪᒋᔭᐅᔭᕆᐊᖃᑐᐃᓐᓇᖅᑐᓄᑦ.
ᐱᕋᔭᒃᓯᒪᙱᒃᑲᓗᐊᕐᒪᖔᖅ ᐸᓖᓯᒃᑯᓐᓄᑦ ᖃᐅᔨᓴᖅᑕᐅᒋᐊᖃᓛᖅᑐᑦ.
ᐃᓄᒃᑎᑑᕈᓐᓇᕆᐊᓕᒃ ᖃᓪᓗᓈᑎᑐᓪᓗ, ᖃᕆᓴᐅᔭᓕᕆᔪᓐᓇᑦᓯᐊᕐᓂᕐᒥᒃ, ᐊᒻᒪᓗ ᐊᐅᓪᓚᖃᑦᑕᕆᐊᖃᖃᑦᑕᕐᓂᐊᖅᖢᓂ ᐃᖅᑲᓇᐃᔮᕆᔭᖓᓂ ᐱᔾᔪᑎᒋᓪᓗᒍ.
ᐃᓕᓂᐊᖅᐸᐃᑦ ᐱᔾᔪᑎᖓᓂ ᐃᕐᖐᓐᓈᖅᑕᐅᑎᒃᑯᑦ ᓇᒃᓯᐅᔾᔭᐅᔪᑦ ᐃᒪᐃᓕᖓᔪᒥᒃ: ᑐᑭᒧᐊᒃᑎᑦᓯᔨ, ᐃᓄᐃᑦ ᖃᐅᔨᒪᔭᑐᖃᖏᓐᓂᓕᕆᓂᕐᒧᑦ ᐊᒻᒪ ᐃᓚᐅᑎᑦᑎᓂᕐᒧᓪᓗ
ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᑕᐃᕕᑦ ᒪᒃᐋᑕᒻᔅ
ᑐᑭᒧᐊᒃᑎᑦᓯᔨ, ᐃᖅᑲᓇᐃᔭᖅᑐᓕᕆᓂᕐᒧᑦ
ᐃᕐᖐᓐᓈᖅᑕᐅᑖ: resumes@qia.ca
ᓱᑲᑦᑐᒃᑯᑦ: (867) 979-3238
ᐅᖄᓚᐅᑖ: (867) 975-8400
ᑎᑎᖅᑲᒃᑯᕕᐊ 1340
ᐃᖃᓗᐃᑦ, ᓄᓇᕗᑦ X0A 0H0
ᒪᑐᕝᕕᖓ:
ᐊᒡᓚᕝᕕᖕᒥ: ᑎᓯᐱᕆ 7, 2019
ᓯᓚᑖᓂ: ᑎᓯᐱᕆ 13, 2019
ᑕᐃᒃᑯᐊ ᑭᓯᒥ ᐊᐱᖅᓱᖅᑕᐅᔪᒪᔪᑦ ᖃᐅᔨᒋᐊᖅᑕᐅᓛᖅᑐᑦ.
