ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐱᔭᕆᐊᑭᓪᓕᑎᑦᑎᔨᑦ

ᓴᐃᒻᒪᖃᑎᒋᓐᓂᕐᒧᑦ ᐱᔭᕆᐊᑭᓪᓕᑎᑦᑎᔩᑦ ᑲᒪᒋᔭᖃᕐᐸᑦᑐᓄᑦ ᐊᑐᓕᖁᔨᔾᔪᑕᐅᓯᒪᔪᓂᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓂᑦ ᑲᒪᒋᔭᐅᕙᑦᑐᖅ ᐊᒻᒪᓗ ᑐᑭᒧᐊᑦᑎᑕᐅᕙᑦᑐᖅ ᑲᑐᔾᔨᖃᑎᒌᒃᑯᓐᓂᑦ).

“ᓴᐃᒻᒪᕐᓗᓂ” ᓴᐃᒪᓂᕐᒧᑦ ᑎᑭᐅᑎᓇᕐᖓᑦ ᓇᒻᒥᓂᖅ; ᐊᒻᒪᓗ “ᓴᐃᒻᒪᖃᑎᒌᓐᓂᖅ” ᐱᔾᔪᑎᓕᒃ ᓴᐃᒻᒪᕈᑎᖃᕐᓂᕐᒥᒃ ᐊᑲᐅᙱᓕᐅᕈᑎᖃᓚᐅᖅᑎᓪᓗᒋᒃ ᒪᕐᕉᒃ ᐅᕝᕙᓘᓐᓃᑦ ᐊᒥᓲᓂᕐᓴᐃᑦ, ᐅᕝᕙᓘᓐᓃᑦ ᐊᑕᐅᑦᑎᒦᖃᑎᒌᑦ. ᐃᓱᒪᒋᔪᓐᓇᐃᖅᑎᒌᓲᖑᒻᒪᑕ ᐅᐊᑦᑎᐊᕈ ᐊᑭᓕᕇᒥᓃᑦ ᑲᑎᔭᕋᐃᒻᒪᑕ, ᓵᙵᖃᑦᑕᐅᑎᓕᖅᑐᑎᒃ, ᓴᐃᒻᒪᕈᑎᖃᕐᓂᐊᕐᖓᑕ ᐊᓂᒍᐃᑎᑦᑎᓗᑎᒃ.

ᑭᓪᓕᓯᓂᐊᖅᑏᑦ ᑭᖑᓪᓕᕐᐹᒥ ᐅᓂᒃᑳᖏᑦ ᑲᔪᓯᑎᑦᑎᓂᖅ ᓴᐃᒻᒪᖃᑎᒌᓐᓂᕐᒥᒃ ᑲᑐᔾᔨᖃᑎᒌᒃᑯᓐᓂ ᐃᒪᐃᓕᐅᖁᔨᓯᒪᒻᒪᑕ, ᐊᒻᒪᓗᑦᑕᐅᖅ ᒐᕙᒪᑐᖃᒃᑯᓐᓂ ᐊᒻᒪᓗ ᓄᓇᕗᒥ ᒐᕙᒪᒃᑯᓐᓂ ᑲᔪᓯᑎᑦᑎᖁᓪᓗᒋᑦ ᐊᒥᓱᓂᑦ ᐊᑐᓕᖁᔨᔾᔪᑕᐅᓯᒪᔪᓂᑦ ᐱᐅᓯᒋᐊᒃᑲᓐᓂᖁᓪᓗᒋᑦ ᐱᔨᑦᑎᕋᐅᑎᒋᕙᑦᑕᖏᑦ ᐃᓄᓐᓄᑦ. ᑲᑐᔾᔨᖃᑎᒌᒃᑯᑦ ᑲᑐᔾᔨᖃᑎᖃᖃᑦᑕᕐᖓᑕ ᑎᒍᒥᐊᖅᑎᐅᖃᑕᐅᔪᓂᑦ ᑲᒪᒋᔭᖃᖅᑐᑎᒃ ᑕᒪᒃᑯᓂᖓ ᐃᖅᑲᓇᐃᔮᖏᓐᓂᒃ, ᐅᓪᓗᒥᒧᑦ ᑎᑭᑦᑐᒍ ᐱᕙᓪᓕᐊᓯᒪᕗᒍᑦ ᐊᒥᓱᓂᑦ ᐊᑐᓕᖁᔨᔾᔪᑕᐅᓯᒪᔪᓂᑦ ᑲᒪᒋᔭᖃᖅᑐᑕ.

ᐅᓪᓗᒥᒧᑦ ᑎᑭᑦᑐᒍ ᐃᓚᖏᑦ ᐃᖅᑲᓇᐃᔮᕆᓯᒪᔭᕗᑦ ᑲᔪᓯᑎᑦᑎᕙᓪᓕᐊᑎᓪᓗᑕ ᑭᓪᓕᓯᓂᐊᖅᑏᑦ ᐊᑐᓕᖁᔨᔾᔪᑎᒋᓯᒪᔭᖏᓐᓂᒃ ᒪᑯᐊᖑᕗᑦ: 

  • ᐃᓄᓐᓂᑦ ᐊᑐᕈᓐᓇᕐᓯᑎᑦᑎᓂᖅ ᑭᓪᓕᓯᓂᐊᖅᑏᑦ ᒥᔅᓵᓄᑦ ᑐᑭᓯᐅᒪᔾᔪᑎᔅᓴᖃᕐᕕᒻᒥᒃ
  • ᑭᓪᓕᓯᓂᐊᖅᑏᑦ ᑕᕐᕆᔮᔅᓴᓕᐊᕆᓯᒪᔭᖏᑦ ᐅᓂᒃᑳᖃᑦᑕᖅᑐᑦ ᑕᑯᔭᔅᓴᕈᖅᑎᓪᓗᒋᑦ ᐃᓄᓕᒫᓄᑦ ᑭᓪᓕᓯᓂᐊᖅᑏᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ ᐅᕙᓂ ᑐᕌᕈᒻᒥ www.qtcommission.ca
  • ᑲᒪᒋᔭᖃᕐᓗᑎᒃ ᐋᖅᑮᓂᐊᕐᖓᑕ ᓴᐃᒻᒪᖃᑎᒌᓐᓂᕐᒧᑦ ᐱᔭᕆᐊᑭᓪᓕᑎᑦᑎᔨᓂᑦ
  • ᐃᖅᑲᓇᐃᔮᖃᕐᓗᑎᒃ ᐸᕐᓇᐅᑎᓂᑦ ᐃᓕᓴᕐᓯᓂᖃᓛᕐᖓᑕ ᐃᓄᓐᓂᑦ ᐸᓖᓯᒥᐅᑕᐅᕙᑦᑐᒥᓂᕐᓂᑦ
  • ᑲᒪᒋᔭᖃᐃᓐᓴᖅᑐᑦ ᓇᓂᓚᕗᑦ ᐱᓕᕆᐊᖓᓐᓂᒃ – ᕿᓂᕐᐸᑦᑐᑎᒃ ᐃᓗᕕᖅᑕᐅᓯᒪᕕᖏᓐᓂᒃ ᐃᓄᐃᑦ ᐅᐊᑦᑎᐊᕈ ᐊᐅᓪᓚᖅᑎᑕᐅᓚᐅᕐᓯᒪᔪᒥᓂᕐᓂᑦ ᓄᓇᑦᑕ ᐊᓯᐊᓄᑦ ᐋᓐᓂᐊᕕᓕᐊᖅᑎᑕᐅᓪᓗᑎᒃ
  • ᐃᖅᑲᓇᐃᔮᖃᖅᑐᑎᒃ ᐸᕐᓇᐅᑎᓂᑦ ᐃᓕᓐᓂᐊᑎᑦᑎᓛᕐᖓᑕ ᐃᓕᖅᑯᓯᓕᕆᓂᕐᒥᒃ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᓄᑦ

ᑭᓪᓕᓯᓂᐊᖅᑏᑦ ᑐᑭᓯᐅᒪᔾᔪᑎᔅᓴᖃᕐᕕᖓᑦ ᐃᓗᖃᕐᖓᑦ ᓂᐱᓕᐅᖅᑕᐅᓯᒪᔪᓂᑦ, ᑕᕐᕆᔮᔅᓴᓕᐊᖑᓯᒪᔪᓂᑦ, ᑎᑎᖅᑲᓂᑦ ᓂᐱᓕᐅᒐᕐᓃᙶᕐᓯᒪᔪᓂᑦ ᐅᓂᒃᑳᒥᓂᖏᓐᓂᒃ ᑭᓪᓕᓯᓂᐊᖅᑏᑦ ᐊᐱᕐᓱᖃᑦᑕᑎᓪᓗᒋᑦ ᐊᒻᒪᓗᑦᑕᐅᖅ ᐃᑦᑕᕐᓂᓴᕐᓂᑦ ᑎᑎᖅᑲᓂᑦ. ᑭᓪᓕᓯᓂᐊᖅᑎᑦ ᑐᑭᓯᒋᐊᕈᑎᖃᕐᕕᖓ ᐱᓕᕆᔾᔪᑎᐅᒻᒪᑦ ᑐᑭᓯᕕᐅᔪᓐᓇᖅᑐᓂ ᑕᐃᒃᑯᓇᙵᑦ ᐅᓂᒃᑳᓚᐅᕐᓯᒪᔪᓂᑦ ᑭᓪᓕᓯᓂᐊᖅᑏᑦ ᓈᓚᓐᓂᖃᖅᑎᓪᓗᒋᑦ ᐊᒻᒪᓗ ᐃᓚᒋᔭᐅᓪᓗᓂ ᑕᒪᓐᓇ ᑲᑐᔾᔨᖃᑎᒌᒃᑯᑦ ᑲᑦᑐᖓᐃᕈᑎᖃᕐᓯᒪᓂᖏᓐᓄᑦ ᐃᖅᑲᓇᐃᔮᕆᓯᒪᔭᖏᑦ ᑭᓪᓕᓯᓂᐊᖅᑏᑦ ᓇᒧᓕᒫᖅ ᐊᑐᐃᓐᓇᖁᓪᓗᒋᑦ. ᐃᓄᐃᑦ ᑕᑯᔪᒪᔪᑦ ᑕᕝᕙᙵᑦ ᑐᑭᓯᐅᒪᔾᔪᑎᔅᓴᖃᕐᑯᒻᒥᑦ ᑎᓕᐅᖅᑕᐅᕗᑦ ᑎᑎᕋᖃᑦᑕᖁᔭᐅᓪᓗᑎᒃ ᑐᔅᓯᕋᐅᒻᒥᑦ ᑕᑯᔪᒪᓂᕐᒧᑦ ᑎᑎᕋᕐᕕᔅᓴᒥᒃ ᑭᓪᓕᓯᓂᐊᖅᑏᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓃᑦᑐᓂᑦ.

ᑕᕐᕆᔮᔅᓴᓕᐊᖑᓯᒪᔪᑦ ᐅᓂᒃᑳᑎᓪᓗᒋᑦ ᑕᑯᔭᔅᓴᐅᒻᒥᔪᑦ ᑭᓪᓕᓯᓂᐊᖅᑏᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ ᐃᓚᒋᔭᐅᓪᓗᓂ ᑲᑐᔾᔨᖃᑎᒌᒃᑯᑦ ᑲᑦᑐᖓᐃᕈᑎᒋᓯᒪᔭᖓᓐᓄᑦ ᐃᖅᑲᓇᐃᔮᕆᓯᒪᔭᖏᑦ ᑭᓪᓕᓯᓂᐊᖅᑏᑦ ᑕᑯᔭᔅᓴᐅᖁᓪᓗᒋᑦ ᑭᒃᑯᓕᒫᑦᑎᐊᓄᑦ.

ᑭᖑᓪᓕᕐᐹᒥ, ᓯᕗᒧᑉᐊᓪᓕᐊᓂᐊᕋᑦᑕ ᑲᔪᓯᑎᑦᑎᕙᓪᓕᐊᓂᕐᒥᒃ ᑭᓪᓕᓯᓂᐊᖅᑎᑦ ᐊᑐᓕᖁᔨᔾᔪᑎᒋᓯᒪᔭᖏᓐᓂᒃ, ᑲᑐᔾᔨᖃᑎᒌᒃᑯᑦ ᓯᕗᓪᓕᕐᐹᒥ ᑲᑎᒪᑎᑦᑎᓛᖅᑐᑦ ᓴᐃᒻᒪᖃᑎᒌᓐᓂᕐᒧᑦ ᐱᔭᕆᐊᑭᓪᓕᑎᑦᑎᔨᓂᑦ, ᑲᑎᑎᑦᑐᓗᑎᒃ ᑎᒍᒥᐊᖅᑎᐅᖃᐅᔪᓂᑦ ᓲᕐᓗ ᒐᕙᒪᑐᖃᒃᑯᓐᓂᑦ, ᑲᓇᑕᒥᐅᑉ ᓄᓇᕘᓪᓗ ᒐᕙᒪᒃᑯᖏᓐᓂᑦ, ᐸᓖᓯᒃᑯᓐᓂᑦ, ᐊᒻᒪᓗ ᐃᓄᐃᑦ ᑕᐱᕇᖏᓐᓂ ᑲᓇᑕᒥ ᐅᖃᐅᓯᖃᖃᑦᑕᓂᐊᕐᖓᑕ ᑲᑐᔾᔨᓗᑎᒃ ᐱᓇᓱᐊᕈᑎᒋᓂᐊᖅᑕᖏᓐᓂᒃ ᑲᔪᓯᑎᑦᑎᕙᓪᓕᐊᓂᕐᒧᑦ ᑕᒪᒃᑯᓂᖓ.

ᑲᑐᔾᔨᖃᑎᒌᒃᑯᑦ ᐱᓕᕆᖃᑎᖃᕐᒥᔪᑦ ᐸᓖᓯᒃᑯᓐᓂᑦ ᐊᒻᒪᓗ ᑎᑎᕋᖅᑎᒥᒃ ᑎᐊᕗᕋ ᑭᒡᔪᒐᓕᒃ ᕙᐃᑉᓯᑕᒥᒃ ᐃᓕᓴᕆᔭᐅᑦᑎᐊᕈᓐᓇᓛᖁᓪᓗᒋᑦ ᐃᖅᑲᓇᐃᔭᖃᑦᑕᕐᓯᒪᓂᖏᑦ ᐃᓄᐃᑦ ᐸᓖᓯᒥᐅᑕᐅᓪᓗᑎᒃ ᓄᓇᑦᑎᓐᓂ ᑕᐃᒫᒃ ᐊᑐᓕᖁᔨᔾᔪᑎᖃᕐᓯᒪᒻᒪᑕ ᑭᓪᓕᓯᓂᐊᖅᑏᑦ ᐅᓂᒃᑳᖏᓐᓂ. ᑲᑐᔾᔨᖃᑎᒌᕝᕕᕗᑦ ᐃᑲᔪᖅᑐᑦ ᑭᒡᔪᒐᓕᒃ ᕙᐃᑉᓯᑕᒥᒃ ᐅᖃᓕᒫᒐᓕᐅᖅᑎᓪᓗᒍ ᐃᓄᐃᑦ ᐸᓖᓯᒥᐅᑦ ᓄᓇᕗᒥ ᒥᔅᓵᓄᑦ ᐃᑲᔪᖅᑐᒍ ᖃᐅᔨᓇᓱᐊᕈᑎᖃᖅᑎᓪᓗᒍ ᕿᑭᖅᑕᓂ ᓄᓇᓕᓐᓂᑦ.

ᑲᑐᔾᔨᖃᑎᒌᒃᑯᑦ ᐊᓯᖏᓪᓗ ᑎᒍᒥᐊᖅᑎᐅᖃᑕᐅᔪᑦ ᐱᓕᕆᖃᑎᖃᕐᓯᒪᔪᑦ ᒐᕙᒪᑐᖃᒃᑯᓐᓂ ᕿᓂᕐᐸᑦᑐᑎᒃ ᐃᓗᕕᖅᑕᐅᓯᒪᕕᖏᓐᓂᒃ ᐃᓚᒋᔭᐅᓚᐅᕐᓯᒪᔪᑦ ᑐᖁᖃᑦᑕᕐᓯᒪᔪᑦ ᖃᓪᓗᓈᑦ ᓄᓇᖓᓐᓂ ᑲᓇᑕᒥ ᐋᓐᓂᐊᕕᓕᐊᕐᓯᒪᓪᓗᑎᒃ ᑕᐃᒫᒃ ᐊᑐᓕᖁᔨᔾᔪᑎᖃᕐᓯᒪᒻᒪᑕ ᑭᓪᓕᓯᓂᐊᖅᑏᑦ ᐅᓂᒃᑳᖏᓐᓂ. ᓇᓂᓚᕗᑦ ᐃᑲᔪᖃᑦᑕᖅᑐᑦ ᕿᓂᖅᑎᓪᓗᒋᑦ ᐃᓚᒥᓂᖏᓐᓂᒃ ᐃᓅᒍᓐᓃᕐᓯᒪᔪᓂᑦ ᐋᓐᓂᐊᕕᓕᐊᕐᓯᒪᑎᓪᓗᒋᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᓄᓇᕗᑦ ᒐᕙᒪᒃᑯᖏᑦ, ᐊᒻᒪᓗ ᒐᕙᒪᑐᖃᒃᑯᑦ ᐱᓕᒻᒪᒃᓴᐃᕕᒃᑯᑦ, ᑲᓇᑕᒥ ᐱᓕᒻᒪᔅᓴᐃᕕᒃ ᐃᓄᐃᑦ ᐃᖅᑲᓇᐃᔮᖅᑖᖃᑦᑕᖁᓪᓗᒋᑦ ᓄᓇᕗᒥ, ᐃᖅᑲᓇᐃᔮᓖᑦ ᐋᖅᑭᔅᓱᐃᓪᓗᑎᒃ ᐊᒻᒪᓗ ᑲᔪᓯᑎᑦᑎᕙᓪᓕᐊᓪᓗᑎᒃ ᐃᓕᖅᑯᓯᓕᕆᓂᕐᒥᒃ ᐃᓕᓐᓂᐊᑎᑦᑎᖃᑦᑕᓂᕐᒥᒃ ᐃᓘᓐᓇᖏᓐᓂᒃ ᐃᖅᑲᓇᐃᔭᖅᑎᐅᔪᓂᑦ ᐃᖅᑲᓇᐃᔮᖃᕐᐸᑦᑐᓂᑦ ᐊᑦᑐᐃᓂᖃᕐᐸᑦᑐᓂᑦ ᐃᓄᓐᓂᑦ ᑕᐃᒫᒃ ᑎᑎᕋᕐᓯᒪᒻᒪᑕ ᑭᓪᓕᓯᓂᐊᖅᑏᑦ ᐊᑐᓕᖁᔨᔾᔪᑎᒋᓯᒪᔭᖏᓐᓂᒃ.

ᐃᓚᖏᑦ ᓯᕗᓪᓕᐸᐅᑦᑎᐅᔾᔭᐅᓯᒪᔪᑦ ᑖᒃᑯᓇᓂ ᑕᒫᓂ ᐊᕐᕌᒍᒥ ᐅᑯᐊᖑᕗᑦ:

  • ᐃᓄᓕᒫᓂᑦ ᐅᔾᔨᕈᓱᑦᑎᑦᑎᒋᐊᕐᓗᑎᒃ ᑐᕌᒐᖃᕐᓗᑎᒃ ᐃᓕᓴᕕᓐᓂᑦ, ᒐᕙᒪᒃᑯᓐᓂ ᐃᖅᑲᓇᔭᐃᖅᑎᓂᑦ, ᐃᓄᐃᑦ ᑲᑐᔾᔨᖃᑎᒌᖏᓐᓂ ᐊᒻᒪᓗ ᓯᕕᑐᓂᓴᕐᒥ ᐃᓄᓕᒫᓂᑦ,
  • ᐱᐅᓯᑎᑦᑎᒋᕐᓗᑎᒃ ᐃᓕᖅᑯᓯᓕᕆᓂᕐᒥᒃ ᐃᓕᓐᓂᐊᑎᑦᑎᖃᑦᑕᓂᕐᒥᒃ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᓂᑦ ᐃᖅᑲᓇᐃᔮᖃᕐᐸᑦᑐᓂᑦ ᐊᑦᑐᐃᓂᖃᕐᐸᑦᑐᓂᑦ ᐃᓄᓐᓂᑦ, ᐊᒻᒪᓗ
  • ᐋᖅᑮᓪᓗᑎᒃ ᐃᓄᐃᑦ ᐊᑐᖃᑦᑕᕐᓯᒪᔭᖏᑕ ᒥᔅᓵᓄᑦ ᑕᖅᑭᖃᖅᑎᑦᑎᖃᑦᑕᓂᕐᒥᒃ

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ