ᐊᖓᔪᖅᑳᒥᒃ ᑐᓴᕋᑦᓴᖅ ᕿᑭᖅᑕᓂᒃ ᑲᑎᒪᔨᖏᓐᓄᑦ

ᐊᖓᔪᖅᑳᒥᒃ ᑐᓴᕋᑦᓴᖅ ᕿᑭᖅᑕᓂᒃ ᑲᑎᒪᔨᖏᓐᓄᑦ

 In Uncategorized

ᐅᓪᓗᒥ ᐱᖕᒪᕆᐅᔪᖅ ᐅᓪᓗᖅ − ᐱᔾᔪᑎᒋᓪᓗᒍ ᓯᕗᓪᓕᕐᐹᖑᒻᒪᑦ ᑲᑎᒪᔩᑦ ᑲᑎᒪᓂᖓ 2018-ᒥ.

ᖃᐅᔨᒪᒐᑦᓯ ᑭᖑᓪᓕᕐᐹᖑᓕᖅᑐᖅ ᐊᕐᕌᒍ ᓂᕈᐊᖅᑕᐅᓯᒪᓂᕐᓄᑦ ᕿᑭᖅᑕᓂᒃᑯᑦ ᐊᖓᔪᖅᑳᖓᓄᑦ − ᐅᐱᒋᓯᒪᔭᕋ ᐃᖅᑲᓇᐃᔭᖃᑎᒋᒋᐊᑦᓴᑦᓯ ᐃᓘᓐᓇᓯ ᐱᖓᓱᓂᒃ ᐊᕐᕌᒎᖅᑲᐅᔪᓂ ᐱᔨᑦᓯᓂᕐᒧᑦ ᐃᓄᐃᑦ ᕿᑭᖅᑕᓂ ᓄᓇᖓᓂ.

2018 ᓇᓗᓇᐃᕐᓯᒪᔪᖅ ᖁᕕᐊᓇᕐᓂᐊᕐᓂᖓᓂᒃ ᐊᕐᕌᒍ ᐱᓕᕆᖃᑎᒌᓐᓂᑎᓐᓄᑦ ᕿᑭᖅᑕᓂᒃᑯᓐᓂ.

ᐊᕐᕌᒍᑦᑎᓐᓂ ᐱᒋᐊᕈᑎᖃᓚᐅᖅᑐᒍᑦ ᐱᔭᒃᓴᓕᒻᒪᕆᐅᓪᓗᑕ ᐳᓚᕋᕐᓂᒃᑯᑦ ᐅᖃᐅᓯᒃᓴᓯᐅᕐᕕᒋᓪᓗᒋᑦ ᑕᓪᓕᒪᑦ ᖁᑦᑎᑐᒥ ᓄᓇᓖᑦ ᐃᓄᐃᑦ ᐊᒃᑐᖅᑕᐅᓂᖓᓄᑦ ᐃᑲᔫᓯᐊᖅᑖᓂᕐᒧᓪᓗ ᐊᖏᕈᑎᓄᑦ ᐊᒃᑐᐊᔪᓄᑦ ᓴᖅᑭᖅᑕᐅᓂᖓᓄᑦ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᓂᖓᓄᑦ.

ᐱᖕᒪᕆᐅᔪᓂᒃ ᐱᓕᕆᔨᖁᑎᕗᑦ ᓄᓇᓕᖕᓄᐊᖃᑦᑕᓚᐅᕐᒥᔪᑦ ᔭᓐᓄᐊᓕᒥ ᒥᑦᑎᑕᒪᓕᒻᒧᑦ, ᐃᒡᓗᓕᒃ, ᑲᖏᕐᖢᒑᐱᒃ ᐊᒻᒪᓗ ᐸᓐᓂᖅᑑᒧᑦ ᐊᐅᓚᑦᓯᒋᐊᖅᑐᖅᑐᑎᒃ ᐊᐃᑉᐹᓂ ᐊᕐᕌᒍᒥ ᑮᓇᐅᔭᓕᕆᔾᔪᑎᓂᒃ ᐃᓕᓐᓂᐊᑎᑦᓯᓂᕐᒥᒃ.

ᓴᓐᖏᔪᒻᒪᕆᓐᓂᒃ ᕿᑭᖅᑕᓂᒃᑯᑦ ᑭᒡᒐᑐᖅᑕᐅᓚᐅᖅᑐᑦ ᐋᑐᕚᒥ ᑕᑯᑦᓴᐅᑎᑦᓯᓂᕐᔪᐊᒥ ᐱᔪᒐᕐᓴᐅᑎᓂᒃ, Northern Lights ᐊᒻᒪᓗ ᐅᑭᐅᖅᑕᖅᑐᒥ ᐱᕕᐊᕐᓇᖅᑐᓂᒃ ᑐᓐᓂᖅᑯᓯᐊᖅᑎᑦᓯᓂᕐᒥ ᐋᑐᕚᒥ ᑕᑉᕙᓂ ᐊᕐᕌᒍᒥ.

ᑖᒃᑯᐊ ᑲᑎᓐᓂᐅᕙᑦᑐᑦ ᑲᑎᓐᖓᒍᑎᒋᔪᓐᓇᓚᐅᖅᑕᕗᑦ ᐊᓯᖏᓐᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᑲᑐᔾᔨᖃᑎᒌᓂᒃ ᐊᒻᒪᓗ ᑲᓲᒪᔾᔪᑎᒃᓴᓂᒃ ᓯᕗᓂᕐᒥ ᐱᓇᓱᐊᖃᑎᒌᒍᑎᒃᓴᓄᑦ ᑲᑐᔾᔨᖃᑎᒌᒍᑎᒃᓴᓂᒃ.

ᐊᕐᕌᒍ ᐱᒋᐊᓕᕋᑖᑕᐃᓐᓇᑎᓪᓗᒍ, ᖃᐅᔨᒪᒌᖅᑐᖓ 12 ᑕᖅᑮᑦ ᓯᕕᑭᑦᑑᓂᐊᕐᓂᖏᓐᓂᒃ ᑲᔪᓯᑎᑦᓯᓇᓱᐊᕆᐊᑦᓴᖅ ᑖᒃᑯᓂᖓᓕᒫᖅ ᐱᓕᕆᐊᓂᒃ, ᐱᓕᕆᐊᒃᓴᓂᒃ ᐊᒻᒪᓗ ᐱᓇᓱᐊᒐᑦᓴᓂᒃ ᐸᕐᓇᓯᒪᔭᑦᑎᓐᓂᒃ 2018-ᒧᑦ.

ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᑦ

ᓄᑖᖅ ᐃᓕᖅᑯᓯᕐᒨᖓᔪᓂᒃ ᐱᓕᕆᐊᒃᓴᖁᑎᕗᑦ ᐊᔪᓐᖏᑎᑕᐅᔪᖅ ᐃᑲᔫᑎᒃᓴᓄᑦ ᑮᓇᐅᔭᖁᑎᑦᑎᓐᓄᑦ ᐊᒻᒪᓗ ᓴᖅᑭᖅᑕᐅᓚᐅᖅᑐᖅ 2017−ᒥ ᐱᓕᕆᐊᒃᓴᓂᒃ ᕿᒥᕐᕈᓂᑦᑎᓐᓄᑦ ᒫᓐᓇ ᐊᐅᓚᔾᔭᐸᓪᓕᐊᓕᖅᑐᖅ. ᓴᖅᑭᓛᖅᑕᕗᑦ ᑐᒃᓯᕋᐅᓯᐅᖁᔨᔾᔪᑎᑦ ᐱᓇᓱᐊᕈᓯᐅᓂᐊᖅᑐᒥ QCAP−ᑯᓐᓄᑦ − ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᑦ. ᕿᓚᓈᕆᔭᒃᑲ ᑭᓱᑦ ᓄᑖᑦ ᓴᖅᑭᖅᑕᐅᓂᐊᕐᒪᖔᑕ ᐊᖑᓇᓱᓐᓂᕐᒧᑦ ᒥᖅᓱᓂᕐᒧᓪᓗ ᐱᓕᕆᐊᓄᑦ ᑐᒃᓯᕋᕈᑕᐅᓂᐊᖅᑐᑦ ᐅᕙᑦᑎᓐᓂᒃ ᕿᑭᖅᑕᓂ ᓄᓇᓕᖏᓐᓂᒃ.

ᓄᓇᕗᒻᒥ ᐃᑦᓴᕐᓂᑕᓕᕆᕕᒃ

ᑕᐃᒪᓐᖓᓂᒃ ᐊᑭᔭᐅᒋᐊᖅᑎᑦᓯᓇᓱᐊᓚᐅᖅᑎᓪᓗᑕ $5 ᒥᓕᔭᓂᒃ ᐃᑲᔫᑎᒃᓴᓂᒃ ᓄᓇᕗᒻᒥ ᐃᑦᑕᓂᕐᓴᖃᕐᕕᖕᒧᑦ, ᑕᑯᓯᒪᔪᒍᑦ ᕿᑲᐅᔾᔭᐅᓲᔭᓚᐅᖅᑐᖅ ᐊᐅᓚᔾᔭᑦᓯᒪᓕᕐᓂᖓᓂᒃ ᐅᑎᖅᑎᑦᓯᖁᓪᓗᑕ ᐃᓄᐃᑦ ᐱᖁᑎᑐᖃᖏᓐᓂᒃ ᐊᖏᕐᕋᐅᔾᔨᒍᑎᒃᓴᑎᓐᓂᒃ. ᒫᓐᓇ ᐃᖅᑲᓇᐃᔮᕆᔭᕗᑦ ᐱᓕᕆᐊᒃᓴᓕᕆᖃᑎᕗᓪᓗ ᐃᓱᒪᒋᔭᐅᔪᑐᖃᖅ ᓴᖅᑭᓚᑦᑖᕈᓐᓇᖁᓪᓗᒍ ᐃᓄᐃᑦ ᓄᓇᖁᑖᓂ.

ᐃᓐᓇᐃᑦ ᐸᖅᑭᔭᐅᕕᑦᓴᖓᓄᑦ ᑐᒃᓯᕋᐅᑦ

ᕿᑭᖅᑕᓂᒃᑯᑦ ᐊᒻᒪᓗ QC−ᑯᑦ ᐊᑎᓕᐅᖃᑎᒌᓚᐅᖅᑑᒃ ᐊᑐᖅᑐᐊᕈᑎᒥᒃ ᓅᕙᐃᒻᕙ 2017−ᒥ ᐋᖅᑭᑦᓲᑎᒃᓴᒥᒃ ᓯᕗᓪᓕᕐᐹᒥ ᓇᖕᒥᓂᖁᑎᒋᔭᐅᔪᒥᒃ ᐊᐅᓚᑕᐅᔪᖅ ᓄᓇᓕᕆᓂᕐᒧᑦ ᐃᖃᓗᐃᑦ ᓄᓇᓕᐸᐅᔭᖓᓂ. ᐃᓄᐃᑦ ᓄᓇᖁᑖ ᐅᑮᕕᒥᓂᓕᐊᕆᐊᒦᑦᑐᖅ.

ᓄᓇᕗᒻᒥ ᐃᑦᑕᕐᓂᓴᓕᕆᕕᖕᒧᑦ ᐊᖏᕐᕋᐅᓂᐊᕐᓂᖓᓄᑦ ᐃᓚᒋᔭᐅᓂᐊᕐᒥᔪᖅ, ᑖᓐᓇ ᐱᓕᕆᐊᖅ ᒪᑐᐃᕐᓯᓂᖓ ᐅᓄᖅᑐᓂᒃ ᒪᑐᓂᒃ ᓄᑖᓂᒃ ᐱᕙᓪᓕᐊᑎᑦᓯᓂᕐᒥᒃ.

ᐃᖅᑲᓇᐃᔭᖃᑎᒋᖃᑦᑕᓚᐅᖅᑕᒃᑲ QC−ᑯᑦ ᐊᖅᑭᑦᓱᐃᓪᓗᑕ ᒪᕐᕉᓐᓂᒃ ᑐᒃᓯᕋᐅᑏᓐᓂᒃ ᐊᐃᑉᐸᖓ ᐃᓄᐃᑦ ᓄᓇᖁᑖᓃᑦᑐᓂ ᐃᖃᓗᓐᓂ ᐊᒻᒪᓗ ᐊᓯᐊᓃᑦᑐᖅ ᐊᐃᑉᐹ ᕿᑭᖅᑕᓂ ᓄᓇᓕᖓᓂ.

ᑖᒃᑯᐊ ᑐᒃᓯᕋᐅᑏᒃ ᑐᓂᔭᐅᓯᒪᓕᖅᑑᒃ ᓄᓇᕗᑦ ᒐᕙᒪᒃᑯᖏᓐᓄᑦ.

ᓯᕗᓪᓕᖅ ᑐᒃᓯᕋᐅᑦ ᐃᓐᓇᕐᓄᑦ ᐸᖅᑭᔭᐅᕕᒃᓴᖅ ᓄᓇᕗᒻᒥ ᐃᓂᑦᓴᓕᐅᖅᑕᐅᓯᒪᔪᖅ ᐃᓄᐃᑦ ᓄᓇᖁᑖᓂ ᐃᖃᓗᓐᓂ.

ᐊᐃᑉᐹ ᐊᕕᑦᑐᕐᓯᒪᓂᕐᒥ ᐃᓐᓇᒃᑯᕕᒃᓴᖅ ᐸᐃᕆᕕᐅᓗᓂ ᒥᑭᓂᕐᓴᒥ ᓄᓇᓕᒻᒦᓂᐊᖅᑐᖅ ᕿᑭᖅᑕᓂ ᓄᓇᖓᓂ.

ᐅᓪᓗᒥ, ᐃᓄᐃᑦ ᐃᓐᓇᐃᑦ ᐸᖅᑭᔭᐅᒋᐊᓖᑦ ᐊᐅᓪᓚᖅᑎᑕᐅᖃᑦᑕᖅᑐᑦ ᖃᓪᓗᓈᓄᑦ ᐸᖅᑭᔭᐅᔭᖅᑐᖅᑐᑦ ᐃᖢᐊᕐᓴᖅᑕᐅᓂᕐᒧᓪᓗ

ᖃᐅᔨᒪᔪᐃᓐᓇᐅᔪᒍᑦ ᐅᓂᒃᑳᓂᒃ ᐅᖃᐅᓯᕐᒧᑦ ᐊᒻᒪᓗ ᐃᓕᖅᑯᓯᕐᒧᓪᓗ ᐊᑦᓱᕈᖃᑦᑕᕐᓂᖏᓐᓂᒃ ᐊᑦᑐᐊᔪᓂᒃ ᐃᓐᓇᖁᑎᑦᑎᓐᓄᑦ ᐊᐅᓪᓚᖅᑎᑕᐅᖃᑦᑕᖅᑐᓄᑦ ᖃᓪᓗᓈᓄᑦ ᐸᖅᑭᔭᐅᒋᐊᖅᑐᕐᓱᑎᒃ.

ᐱᖕᒪᕆᐅᔪᖅ ᐃᓐᓇᖁᑎᕗᑦ ᐊᑐᐃᓐᓇᖃᕆᐊᖃᕐᓂᖏᑦ ᐱᔨᑦᓯᕈᑎᓂᒃ ᐅᖃᐅᓯᑦᑎᒍᑦ ᐃᓄᓐᓄᑦ ᖃᐅᔨᒪᔪᓄᑦ ᓯᓚᕐᔪᐊᒥᒃ ᑕᑯᓐᓇᓂᕐᒥᒍᑦ

ᐅᑉᐱᕆᔭᕋ ᒫᓐᓇ ᐱᑉᕕᒃᓴᖃᑦᓯᐊᓂᑦᑎᓐᓂᒃ ᐃᑲᔫᑎᖃᕐᓂᐊᖅᑐᒥᒃ ᓴᖅᑮᓚᑦᑖᕆᐊᖃᕐᓂᑎᓐᓂᒃ ᐱᑕᖃᕆᐊᓕᖕᒥᒃ.

Q-STEP

ᐅᐱᒋᔭᖃᕐᒥᔪᒍᑦ ᐱᓕᕆᐊᕆᒻᒥᔭᑦᑎᓐᓂᒃ ᐃᓄᓐᓂᒃ ᐃᖅᑲᓇᐃᔭᖅᑎᑦᓯᓂᕐᒥᒃ ᐅᔭᕋᓐᓂᐊᕕᒻᒥ. $19 ᒥᓕᔭᓐ ᐱᓕᖕᒪᒃᓴᖅᑎᑦᓯᒍᑎᕗᑦ Q-STEP, ᕿᑭᖅᑕᓂ ᐊᔪᕈᓐᓃᓴᕐᓂᕐᒧᑦ ᐱᓕᒻᒪᓴᕐᓂᒧᓪᓗ ᐃᖅᑲᓇᐃᔮᓄᑦ ᐱᓇᓱᐊᖃᑎᒌᓐᓂᖓ ᒪᑭᒪᓪᓗᓂ ᐊᐅᓚᓕᕐᓂᖓᓂᒃ ᐃᓄᐃᑦ ᒫᓐᓇ ᐱᓕᖕᒪᒃᓴᓕᕐᓂᖏᓐᓄᑦ ᐊᔾᔨᒌᓐᖏᑦᑐᓂ ᐃᖅᑲᓇᐃᔮᓂ ᐅᔭᕋᓐᓂᐊᕕᖕᒥ.

ᑕᓪᓗᕈᑎᐅᑉ ᐃᒪᖓ

ᓇᓗᓇᐃᕐᓯᒪᔪᖅ, ᐃᓚᖓ ᐊᖏᓂᕐᐹᖑᖃᑕᐅᔪᖅ ᐱᓕᕆᐊᕗᑦ ᐊᕐᕌᒍᑦᑎᓐᓂ ᐋᔩᕋᕈᑎᖃᕐᓂᖅ IIBA−ᓂᒃ ᑕᓪᓗᕈᑎᐅᑉ ᐃᒪᖓᓄᑦ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᓂᖓᓄᑦ ᒫᑦᓯ 2019-ᒥ ᐱᐊᓂᒃᑐᒃᓴᒫᖅ.

ᑖᓐᓇ ᐊᖏᖃᑎᒌᒍᑦ ᐊᑎᓕᐅᖅᑕᐅᑉᐸᑦ ᐃᓄᐃᑦ ᒥᑦᑎᒪᑕᓕᒻᒥ, ᑲᖏᕐᖢᒑᐱᒃ, ᐃᑉᐱᐊᕐᔪᒃ, ᖃᐅᓱᐃᑦᑐᖅ ᐊᒻᒪᓗ ᐊᐅᓱᐃᑦᑐᖅ ᓄᓇᖃᕐᓂᐊᖅᑐᑦ ᑕᕆᐅᑉ ᓯᓈᓂ ᑲᓇᑕᒥ ᐊᖏᓂᕐᐹᖓᓂ ᑕᕆᐅᕐᒥᒃ ᓴᐳᔾᔭᐅᓯᒪᔪᓂ, ᐊᒻᒪᓗ ᒪᕐᕈᐃᓱᖅᑐᒥᒃ ᐊᖏᓂᓕᒃ ᓅᕙ ᓯᑰᓴᑎᑐᑦ.

ᑖᑦᓱᒧᖓ ᐊᖏᖃᑎᒌᒍᑎᒧᑦ, ᕿᑭᖅᑕᓂᒃᑯᑦ ᓇᓗᓇᐃᕐᓯᒪᔪᒥᒃ ᐱᕕᒃᓴᖃᖅᑎᑦᓯᒍᒪᓂᐊᖅᑐᑦ, ᐃᖅᑲᓇᐃᔮᓂᒃ ᐊᒻᒪᓗ ᐱᖁᑎᕐᔪᐊᓂᒃ ᐃᓄᓐᓄᑦ ᖁᑦᑎᑦᑐᒥ.

ᐃᓚᖏᑦ ᐊᐅᓚᓯᒪᔭᕗᑦ ᐃᖅᑲᓇᐃᔮᕆᓪᓗᒋᑦ ᐃᓚᓕᐅᔾᔭᐅᖃᑕᐅᖁᓪᓗᒋᑦ IIBA-ᒧᑦ ᐅᑯᓄᓐᖓᖓᔪᑦ:

  • ᐅᒥᐊᕋᓛᖑᓂᕐᓴᓄᑦ ᑐᓚᑦᑕᕐᕖᑦ ᐊᑐᓂᑦ ᑕᓪᓗᕈᑎᐅᑉ ᐃᓚᖓᓂ ᓄᓇᓕᖕᓄᑦ.
  • ᐊᑕᐃᓐᓇᓂᐊᖅᑐᑦ ᐱᓕᖕᒪᒃᓴᐅᑏᑦ ᓇᓗᓇᐃᕐᓯᒪᒍᑎᒃᓴᑦ ᐃᓄᐃᑦ ᐃᖅᑲᓇᐃᔮᖃᖁᓪᓗᒋᑦ ᑕᑉᕙᖔᕐᓯᒪᔪᒥᒃ NMCA ᓴᖅᑭᖅᑕᐅᓂᖓᓂᒃ.
  • ᐊᐅᓚᓂᐅᔪᑦ ᓯᕗᓕᖅᑕᐅᓗᑎᒃ ᐃᓄᓐᓄᑦ ᓯᕗᓕᖁᓪᓗᑕ ᐃᓱᒪᓕᐅᕈᑕᐅᒋᐊᓕᓐᓄᑦ ᐱᖕᒪᕆᐅᔪᓄᑦ ᐱᓇᓱᐊᒐᑦᓴᓂ ᓴᐳᔾᔨᓯᒪᓂᕐᒧᑦ.

ᒐᕙᒪᓕᒫᒥᒃ ᐊᐅᓚᑦᓯᒍᑏᑦ

ᕿᑭᖅᑕᓂᒃᑯᑦ ᐊᔪᐃᓐᓇᕐᒥᔪᑦ ᐱᓇᓱᐊᖃᑕᐅᒍᒪᓂᕐᒥᒃ ᐅᓄᖅᑐᓂᒃ ᒐᕙᒪᑐᖃᒃᑯᑦ ᐱᓕᕆᒡᕕᖏᓐᓂᒃ, ᐊᓯᖏᓐᓂᒃ ᒥᕐᖑᐃᓯᕐᕕᓕᕆᔨᕐᔪᐊᒃᑯᑦ ᑲᓇᑕᒥ.

ᕿᑭᖅᑕᓂᒃᑯᑦ ᑎᑎᖅᑲᐅᓯᐅᓚᐅᕐᓯᒪᔪᑦ ᑲᓇᑕᒥ ᐊᖓᔪᖅᑳᕐᔪᐊᖅ ᑲᓇᑕᒥ ᐊᓪᓚᑉᕕᖓᓂ ᐊᐅᒡᒍᓯ 2017−ᒥ ᐊᖏᕈᑎᒋᓯᒪᔭᖏᓐᓂᒃ ᒐᕙᒪᓕᒫᒥᒃ ᐊᐅᓚᑦᓯᒍᑎᒃᓴᓂᒃ.

ᕿᑭᖅᑕᓂᒃᑯᑦ ᑐᒃᓯᕋᐅᑎᖓ ᐅᑭᐅᖅᑕᖅᑐᒥ ᐊᑐᐊᒐᕐᓄᑦ ᐋᖅᑭᑦᓯᒪᒍᑎᓄᑦ

ᑕᓪᓗᕈᑎᐅᑉ ᐃᒪᖓᓄᑦ IIBA ᐊᖏᓂᕐᐸᐅᑎᓪᓗᒍ ᐱᓕᕆᐊᕆᔭᑦᑎᓐᓂ, ᖃᐅᔨᓇᓱᐊᕐᓂᙵᒍᑦ ᐊᓯᖏᓐᓂᒃ ᐊᖅᑯᑎᒃᓴᓂᒃ ᑎᒍᓯᕙᓪᓕᐊᒍᑎᒃᓴᓂᒃ ᐱᐅᓂᕐᓴᒥᒃ ᑐᓴᐅᒪᖃᑕᐅᑎᔾᔪᑎᒃᓴᒥᒃ ᐊᒻᒪᓗ ᐃᖅᑲᓇᐃᔭᖃᑎᖃᕐᓂᕐᒥᒃ ᑲᓇᑕ ᐊᖓᔪᖅᑳᕐᔪᐊᖓᓂᒃ ᑐᕉᑐ ᒐᕙᒪᖓᓂᒃ.

ᑏᓰᒻᕙ 2016−ᒥ ᑲᓇᑕ ᐊᖓᔪᖅᑳᕐᔪᐊᖓ ᐊᖏᕈᑎᖃᓚᐅᖅᑐᖅ ᐋᖅᑭᑦᓱᐃᖃᑎᖃᕐᓂᐊᓂᕐᒥᒃ ᓄᑖᒥᒃ ᐅᑭᐅᖅᑕᖅᑐᒥ ᐊᑐᐊᒐᕐᓄᑦ ᐋᖅᑭᑦᓯᒪᔾᔪᑕᐅᓂᐊᖅᑐᒥᒃ ᐃᓇᖏᐅᑎᓂᐊᖅᑐᒥᒃ ᑲᓇᑕ ᐅᑭᐅᖅᑕᖅᑐᒥ ᑐᑭᒧᐊᒍᑎᒃᓴᖓᓂᒃ ᐊᒻᒪᓗ ᓇᓗᓇᐃᖅᑕᐅᓯᒪᔪᒥᒃ ᑲᓇᑕ ᐅᑭᐅᖅᑕᖅᑐᖓᓄᑦ ᐅᖓᓯᑦᑐᒦᑦᑐᓄᑦ ᐊᑐᐊᒐᖅ.

ᐅᑭᐅᖅᑕᖅᑐᒥ ᐊᑐᐊᒐᕐᓄᑦ ᐊᖅᑭᑦᓯᒪᔾᔪᑦ ᑐᑭᒧᐊᒍᑎᒃᓴᐅᓂᐊᖅᑐᖅ ᑲᓇᑕ ᒐᕙᒪᖓᓄᑦ ᓯᕗᓪᓕᐅᔾᔭᐅᒋᐊᓕᓐᓄᑦ, ᐊᐅᓚᑕᐅᔪᓄᑦ ᐊᒻᒪᓗ ᑮᓇᐅᔭᓕᐅᕈᑎᒃᓴᓄᑦ ᐅᑭᐅᖅᑕᖅᑐᒥ 2030-ᒧᓄᑦ.

ᑲᑎᒪᔪᓃᓚᐅᕐᑐᖓ ᐋᑐᕚᒥ ᔭᓐᓄᐊᓕ 2018 ᑲᑎᒪᑎᑦᓯᖃᑕᐅᕕᖓᓂ ᒥᓂᔅᑕ ᑭᐅᕈᓕᓐ ᐱᐊᓂᑦ ᐊᒻᒪᓗ ᐃᑦᑑᑎᓂ ᑲᑎᒪᔨ ᑎᓂᔅ ᐹᑐᓴᓐ ᐋᔩᕋᕈᑎᖃᕐᓂᕐᒧᑦ ᑖᑦᓱᒥᖓ ᓄᑖᓂᒃ ᐅᑭᐅᖅᑕᖅᑐᒥ ᐋᖅᑭᑦᓯᒪᓂᐅᓂᐊᖅᑐᒥᒃ.

ᓴᖅᑮᒍᑎᒋᓚᐅᖅᑕᕗᑦ ᐃᓚᒋᔭᐅᓂᕆᔭᑦᑎᒍᑦ ᑎᑎᕋᕐᓯᒪᔪᒃᑯᑦ ᑐᒃᓯᕋᐅᑎᕗᑦ ᓴᖅᑭᓚᐅᖅᑕᕗᑦ ᒐᕙᒪᑐᖃᒃᑯᓐᓄᑦ ᔭᓐᓄᐊᓕ 31, 2018-ᒥ.

ᑕᐃᒎᓯᓕᒃ: ᓄᑖᖅ ᐊᐅᓚᔾᔪᑎᒃᓴᖅ ᐱᕙᓪᓕᐊᔪᓕᕆᓂᕐᒧᑦ ᓄᓇᕗᒻᒥ.

ᐃᓚᖏᑦ ᐅᖃᐅᓯᕆᓪᓗᐊᑕᓚᐅᖅᑕᕗᑦ ᐅᓂᒃᑳᓂ ᐃᓚᒋᔭᐅᓪᓗᑎᒃ:

  • ᑲᓇᑕ ᒐᕙᒪᒃᑯᖏᑦ ᐃᖅᑲᓇᐃᔭᖃᑎᖃᕆᐊᖃᕐᓂᖏᓐᓂᒃ ᐃᓄᓐᓂᒃ ᑖᒃᑯᓄᓐᖓᖓᔪᓂᒃ ᓄᓇᓕᓐᓄᑦ ᐋᖅᑭᑦᓱᐃᒍᑎᒃᓴᓂᒃ ᓵᓐᖓᑦᓯᓂᕐᒥᒃ ᐋᖅᑭᑦᓱᐃᓂᕐᒥᓪᓗ ᐱᔭᕆᐊᑐᔪᓂᒃ ᐅᑭᐅᖅᑕᖅᑐᒥ
  • ᐊᑯᓂᐅᔪᒧᑦ−ᐋᖅᑭᑦᓯᒪᔪᒥᒃ ᐋᖅᑭᑦᓱᐃᓇᓱᐊᕈᑎᒃᓴᖅ ᐋᖅᑭᐅᒪᑦᓯᓂᕐᒧᓪᓗ ᐱᖁᑎᕐᔪᐊᖑᒋᐊᓕᓐᓂᒃ ᐃᑲᔫᑎᒃᓴᓂᒃ ᐃᓕᖅᑯᓯᑦᑎᓐᓄᑦ ᐊᒻᒪᓗ ᖃᓄᐃᓐᖏᑦᓯᐊᖁᑎᒃᓴᖏᓐᓄᑦ ᓄᓇᓕᖁᑎᑦᑕ
  • ᑐᐊᕕᕐᓇᕐᓂᖓᓂᒃ ᑮᓇᐅᔭᓕᑕᐅᒋᐊᖃᕐᓂᖅ ᐊᑯᓂᐅᔪᒧᑦ−ᐃᓕᖓᔪᒥᒃ ᓱᕐᕌᖏᑦᑐᒥᒃ ᐊᕐᕌᒍᕋᓴᓐᓄᑦ ᑮᓇᐅᔭᓕᑕᐅᓂᕐᒃᒥ ᐅᓄᕐᓯᒋᐊᕈᑎᒃᓴᓂᒃ ᑎᒥᐅᔪᑦ ᐊᐅᓚᑦᓯᒍᓐᓇᕈᑎᒃᓴᖏᓐᓂᒃ ᐊᐅᓚᑦᓯᓂᕐᒥᒃ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᐊᒃᓴᓂᒃ ᓄᓇᕗᒻᒥ
  • ᒐᕙᒪᑐᖃᒃᑯᑦ ᐃᖅᑲᓇᐃᔭᖃᑎᖃᕆᐊᖃᕐᓂᖏᓐᓂᒃ ᕿᑭᖅᑕᓂᒃᑯᓐᓂᒃ ᓄᑖᓐᖑᕆᐊᕈᑎᒃᓴᖓᓄᑦ ᐱᓇᓱᐊᖃᑎᖃᕐᓂᖓ ᕿᑭᖅᑕᓂ ᐃᓄᖏᓐᓂᒃ ᐊᓂᒍᐃᒍᑎᒃᓴᒥᒃ ᓴᐃᒻᒪᖃᑎᒌᓐᓂᕐᒧᑦ ᐃᓚᐅᑎᑦᓯᓗᑎᒃ ᐅᕙᑦᑎᓐᓂᒃ QTC-ᑯᓐᓂᒃ ᐱᓇᓱᐊᒐᐅᔪᓂᒃ.

ᖃᐅᔨᒃᑲᓚᐅᖅᑕᕗᑦ ᑲᓇᑕ ᐊᖓᔪᖅᑳᕐᔪᐊᖓ ᓇᓗᓇᐃᕐᓯᒪᔪᒃᑯᑦ ᒪᒥᐊᒋᐊᖃᕐᓂᖓᓂᒃ ᐱᕋᔭᑕᐅᖃᑦᑕᕐᓯᒪᓂᐅᔪᓂᒃ ᐊᓪᓗᕆᐊᕈᑎᒃᓴᒥᒃ ᓯᕗᒧᑦ ᑎᑭᐅᑎᕙᓪᓕᐊᒍᑎᒃᓴᒧᑦ ᓴᐃᒻᒪᖃᑎᒌᓐᓂᕐᒧᑦ.

•           ᑮᓇᐅᔭᓕᑕᐅᒍᑎᒋᔪᒪᓚᐅᖅᑕᕗᑦ ᐃᓕᓐᓂᐊᕐᓂᖅ, ᐱᓕᖕᒪᒃᓴᐅᑎᓄᑦ ᐊᑐᕋᑦᓴᑦ ᐊᔪᓐᖏᓯᐊᖅᑐᓂᒃ ᐃᖅᑲᓇᐃᔭᖅᑎᑦᓴᓕᐅᕈᑎᒃᓴᓂᒃ ᐃᓄᓐᓂᒃ.

Recent Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ