ᐅᖃᐅᓯᕆᔭᐅᔪᑦ ᒪᒥᐊᓈᖅᓯᒪᔪᑦ ᐱᔾᔪᑎᖃᖅᑐᑦ ᖃᐅᔨᔭᐅᓯᒪᔪᓄᑦ ᕿᑭᖅᑖᓂ ᓱᓕᔪᓄᑦ ᑲᒥᓴᓇᒃᑯᑦ

ᐅᖃᐅᓯᕆᔭᐅᔪᑦ ᒪᒥᐊᓈᖅᓯᒪᔪᑦ ᐱᔾᔪᑎᖃᖅᑐᑦ ᖃᐅᔨᔭᐅᓯᒪᔪᓄᑦ ᕿᑭᖅᑖᓂ ᓱᓕᔪᓄᑦ ᑲᒥᓴᓇᒃᑯᑦ

 In blog-inuk

ᑲᔪᓯᕙᓪᓕᐊᒍᓐᓇᓚᒐᒍᑦᑕ ᑲᓇᑕᒥᐅᑕᐅᓪᓗᑕ ᐃᓅᐃᓗ ᑕᒫᓂ, ᑐᑭᓯᐅᒪᓗᒍᓗ ᑲᓇᑕᐅᑉ ᓇᓃᓐᓂᖓ ᐊᒻᒪᓗ ᓇᒧᑦ ᑐᕌᖓᕙᓪᓕᐊᓂᖓ, ᐱᒻᒪᕆᐅᕗᖅ ᐃᓕᑕᖅᓯᔭᕆᐊᖃᕐᓂᖅ ᐱᕙᓪᓕᐊᓯᒪᓂᑎᓐᓂᒃ ᐊᒻᒪᓗ ᓇᑭᖔᕐᓂᕕᓂᑦᑎᓐᓂᒃ.

ᐊᒥᓱᐊᖅᑎᖅᑐᓂᒃ, ᑕᒪᓐᓇ ᑲᒪᒋᔭᐅᓂᖓ ᐱᔾᔪᑎᖃᓲᖑᕗᖅ ᐊᑦᓱᕈᕐᓇᖅᑐᑰᕈᑕᐅᔪᕕᓂᕐᓂᒃ ᑕᑯᑦᓯᐊᕆᐊᕐᑲᕐᓂᕐᒥᒃ, ᐃᓕᑕᕆᓗᒋᓪᓗ ᐊᑦᓱᕈᕐᓇᕈᑕᐅᕙᓚᐅᕐᓂᖏᑦ ᓱᓕᔪᑦ ᑕᐃᑦᓱᒪᓂ ᐊᑐᖅᑕᐅᓚᐅᕐᓂᖏᑦ.

ᐃᓄᐃᓪᓗ-ᑲᓇᑕᐅᓪᓗ ᒐᕙᒪᖏᑦ ᐱᓕᕆᖃᑎᒌᒑᓱᐊᖃᑕᖅᓯᒪᓂᖏᓐᓂ, ᐊᑯᓂᐅᓗᐊᖅᑐᒥᒃ ᓇᓕᖅᑲᒌᖏᓂᕐᒥᒃ, ᓈᒻᒪᖃᑦᑕᓐᖏᑐᓂᒃ ᐊᒻᒪᓗ ᓱᒃᑰᑎᑦᑎᖃᑦᑕᖅᓯᒪᓂᕐᒥᒃ ᐊᐅᓚᑦᑎᖃᑕᕐᓂᑰᒻᒪᑕ ᐃᓄᓐᓂᒃ.

ᐅᓪᓗᒥ, ᑭᒡᒐᑐᕐᓗᒋᑦ ᑲᓇᑕᐅᑉ ᒐᕙᒪᐃᑦ, ᑕᒫᓃᓕᖅᑯᒍᑦ ᐃᓱᒪᒋᓪᓗᒋᑦ ᐃᖅᑲᒋᓗᒋᑦ “ᓴᐃᒪᖃᑎᒌᓐᓂᖅ” ᑐᑭᖃᖅᑎᑕᐅᓂᖓ; “ᐊᑭᕌᕆᖃᑦᑕᖅᓯᒪᔫᒃ ᐊᑐᕋᐃᒐᒥᒃ, ᐊᑯᓐᓂᖓᓂᓕᖅᓱᑎᒃ ᕿᑎᐊᓂ ᑲᑎᑐᓇᕐᓂᖏᓐᓂᒃ, ᓴᐃᒪᓂᕐᒦᓕᕈᓐᓇᓱᖑᕗᑦ.” ᖃᐃᓯᒪᔪᖓ ᓱᓕᓂᕐᒥᒃ ᐊᒻᒪᓗ ᓴᐃᒪᖃᑎᒌᒎᒪᓂᕐᒥᒃ ᓯᕗᓕᐅᑎᑎᓪᓗᖓ ᐃᓱᒪᖃᕐᓂᖅ, ᓂᕆᐅᓐᓂᖃᖅᓱᖓ ᓄᑖᕈᕆᐊᕈᓐᓇᕐᓂᖏᓐᓂᒃ ᐱᓕᕆᖃᑎᖃᕈᓐᓇᓂᖅᐳᑦ ᕿᑭᖅᑕᓂ ᐃᓄᓐᓂᒃ.

ᑲᓇᑕ ᓴᕿᑎᑦᓯᕙᓪᓕᐊᓕᕐᒪᑦ ᐋᓐᓂᓇᖅᑐᐊᓗᓐᓂᒃ ᓱᓕᔪᓂᒃ ᐱᕙᓪᓕᐊᓚᐅᖅᓯᒪᔪᓂ ᐊᑦᓱᕈᕐᓇᖅᑐᒃᑰᕈᑕᐅᕙᓚᐅᖅᑐᓂᒃ ᓱᒃᑰᓗᑕᐅᖃᑦᑕᖅᓯᒪᔪᓂᒃ ᐊᑐᐊᒐᕆᔭᐅᕙᓚᐅᖅᑐᓂᒃ ᐊᒻᒪᓗ ᐱᐅᓯᕆᔭᐅᕙᓚᐅᖅᑐᓂᒃ, ᐊᖏᔪᐊᓗᒻᒥᒃ ᐅᖁᒪᐃᑦᑐᓂᒃ ᐊᑦᑐᐃᓂᖃᖅᑐᓂᒃ ᕿᑭᖅᑕᓂ ᐃᓄᖕᓂᒃ. ᑕᒪᓐᓇ ᐊᑐᖅᑕᐅᕙᓕᐊᔪᖅ ᐃᓱᒪᑦᓴᖅᓯᐅᕈᑎ ᐱᕕᑦᓴᓕᐅᕈᑕᐅᓚᖓᔪᖅ ᖃᓄᖅᑑᕈᑕᐅᒍᓐᓇᕐᓂᖅ ᐊᒃᑐᖅᑕᐅᓯᒪᓂᕕᓂᖏᓐᓄᑦ ᐃᓄᐃᑦ ᑕᐃᔅᓱᒪᓂ ᖃᓄᐃᓕᐅᖅᑕᐅᕙᓚᐅᕐᓂᖏᓐᓄᑦ ᐊᒻᒪᓗ ᓴᓇᕙᓪᓕᐊᓕᕈᓐᓇᕐᓂᕐᒧᑦ ᓄᑖᖑᓂᐊᖅᑐᓂᒃ ᐱᓕᕆᖃᑎᒌᓐᓂᐅᔪᓐᓇᖅᑐᓂᒃ.

ᑕᒪᓐᓇ ᐊᕐᕌᒎᔪᖅ ᐱᕙᓪᓕᐊᓕᓴᕐᓂᖓᓂ, ᑲᓇᑕᐅᑉ ᐊᖓᔪᖃᖓᑦ ᑐᕉᑑ ᐃᓕᑕᖅᓯᓚᐅᖅᑐᖅ ᐊᒥᓱᒐᓴᓐᓂᒃ ᐊᑐᐊᒐᕆᔭᐅᖃᑦᑕᓯᒪᔪᓂᒃ ᐊᖏᔪᐊᓗᒻᒥᒃ ᐊᑦᑐᐃᓂᖃᖅᑐᓂᒃ ᐃᓄᐃᑦ ᐃᓅᓯᖏᓐᓂᒃ, ᐊᒥᓱᓂᒃ ᖁᓕᒐᓴᐅᓯᒪᔪᓂᒃ ᑭᖑᓕᕇᑦᑐᓂᒃ ᐊᕐᕋᒍᓂᒃ ᑕᐃᒪᖓᑦ 1940-ᖏᓐᓂᒃ ᐊᑐᖅᑕᐅᓕᓚᐅᖅᑐᓂᒃ. ᑲᓇᑕᒥᐅᑦ ᒫᓐᓇ ᓵᖑᓕᖅᑐᖅ ᑐᑭᓯᕙᓪᓕᐊᓕᓵᖅᐳᑦ ᖃᓄᐃᓕᐅᖅᑕᐅᖃᑕᔅᓯᒪᓂᖏᓐᓂᒃ ᐋᓐᓂᐊᖅᑐᓕᕆᓂᒃᑯᑦ, ᐃᓕᓐᓂᐊᖅᑐᓕᕆᓂᒃᑯᑦ, ᐃᒡᓗᓕᕆᓂᒃᑯᓪᓗ ᐊᑐᐊᒐᕆᔭᐅᕙᑦᑐᓄᑦ ᐊᒻᒪᓗ ᐊᑐᒐᑦᓴᐅᑎᑕᐅᓯᒪᓂᖏᓐᓄᑦ ᐃᓄᖕᓄᑦ ᑐᕌᖓᑎᑕᐅᕙᓚᐅᖅᑐᑦ, ᖃᓄᕐᓗ ᑕᒪᒃᑯᐊ ᑐᑭᓕᐅᖅᓯᒪᑦᑎᐊᕋᑎᒃ ᑮᓇᐅᔭᖃᖅᑎᑕᐅᓯᒪᖏᓗᐊᖅᓱᑎᓪᓗ ᐱᓕᕆᐊᖑᕙᓚᐅᕐᓂᖏᓐᓂᒃ, ᐊᑯᓂᐊᓗᒃ ᐊᑦᑐᖅᓯᓯᒪᒻᒪᑕ ᐃᓄᖕᓂᒃ, ᐅᓪᓗᒥᒧᑦ ᑎᑭᓪᓗᒍ ᓱᓕ ᑕᑯᑦᓴᐅᔪᓂᒃ.

ᐃᓕᑕᕆᔭᕗᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐱᓕᕆᐊᖑᖃᑦᑕᖅᓯᒪᔪᑦ ᓴᕿᑎᑦᓯᓂᖏᓐᓂ ᕿᑭᖅᑕᓂ ᓱᓕᔪᖅᓯᐅᖅᑏᑦ ᑭᓪᓕᓯᓂᐊᖅᑏᑦ ᑲᒥᓯᓇᐅᔪᓂᒃ, ᑕᐃᒃᑯᐊ ᕿᒥᕐᕈᐊᓚᐅᕐᒪᑕ ᐊᑐᖅᑕᐅᕙᓚᐅᖅᑐᓂᒃ ᐱᓕᕆᖃᑎᖐᓂᕕᓂᖏᓐᓂ ᕿᑭᖅᑕᓂ ᐃᓄᐃᑦ ᑲᓇᑕᐅᓪᓗ ᒐᕙᒪᖏᓐᓄᑦ. ᑲᒥᓯᓇᒃᑯᑦ ᑎᓕᔭᐅᓚᐅᖅᐳᑦ ᑕᑯᓇᒋᐊᖁᔭᐅᓂᖅ ᐱᓗᐊᖅᑐᒥᒃ ᐱᔾᔪᑎᓕᓐᓂᒃ ᑕᐃᑦᓱᒪᓂ ᐃᓄᐃᑦ ᓅᑕᐅᓚᐅᖅᓯᒪᓂᕕᓂᖏᓐᓂ ᐊᒻᒪᓗ ᑐᖁᕋᖅᑕᐅᓚᐅᕐᓂᖏᓐᓂ ᕿᒻᒦᑦ, ᐊᒻᒪᓗ ᑭᓪᓕᓯᓂᐊᖅᑏᑦ ᑎᓕᔭᐅᓯᒪᓂᖏᑦ ᐊᖏᓪᓕᕙᓪᓕᐊᑐᐃᓐᓇᓕᓚᐅᖅᑐᑦ ᖃᐅᔨᒋᐊᖁᔭᐅᓕᓚᐅᖅᑐᓂᒃ, ᑐᑭᓯᓇᖅᓯᒐᒥ ᖃᓄᑎᒋ ᐊᒃᑐᖅᑕᐅᓯᒪᕐᔪᐊᕐᓂᖏᓐᓂ ᐃᓄᐃᑦ ᐃᓅᓯᕐᒥᓂᒃ, ᖃᓪᓗᓈᓄᑦ ᐊᐅᓚᑕᐅᒋᐊᓕᕋᒥᒃ, ᐊᒻᒪᓗ ᐊᖏᔪᐊᓗᒻᒥᒃ ᖁᐊᖅᓵᕐᓇᖅᑐᑰᕈᑕᐅᖃᑦᑕᖅᓯᒪᔪᓂᒃ ᐸᒡᕕᓴᑦᑕᐅᖃᑕᖅᓯᒪᓂᖏᓐᓄᑦ ᐃᓱᒪᖅᓱᑕᐅᓪᓗᑎᒃ ᐃᓄᐃᑦ, ᐃᓕᖅᑯᓯᑐᖃᖏᓪᓗ ᐊᕐᕋᒍᐃᑦ ᐊᑯᓐᓂᖏᓐᓂᒃ ᐱᒋᐊᓚᐅᖅᑐᓂᒃ 1950-ᖏᓐᓂᒃ ᑎᑭᓪᓗᒍ 1975-ᒧᑦ, ᐊᒻᒪᓗ ᐊᖏᔪᒥᒃ ᑕᐃᒪᐃᓕᖓᓕᕐᓂᑰᓪᓗᑎᒃ ᑲᓇᑕᐅᑉ ᒐᕙᒪᖓᑕ ᖃᓄᐃᓕᐅᐳᖃᑕᖁᔭᖏᓐᓂᒃ ᒪᓕᖁᔭᐅᕙᓚᐅᕐᓂᖏᓐᓄᑦ.

ᕿᑭᖅᑕᓂ ᓱᓕᔪᖅᓴᓂᕐᒧᑦ ᑭᓪᓕᓯᓂᐊᖅᑏᑦ ᑲᒥᓯᓇᐃᑦ ᑭᖑᓪᓕᖅᐹᒥ ᐅᓂᒃᑳᓕᐊᖏᑦ ᐅᖃᐅᓯᖃᖅᐳᑦ ᐃᓚᒌᑦᑐᓂᒃ ᐳᐃᒍᒐᑦᓴᐅᖏᑦᑐᓂᒃ ᐋᓐᓂᕐᓇᒻᒪᕆᑦᑐᓂᒃ ᐊᑐᖅᑕᐅᓚᐅᖅᓯᒪᔪᓂ ᐅᓂᒃᑳᓂᒃ ᕿᒦᔭᖅᑕᐅᓚᐅᖅᓯᒪᓂᖏᓂᒃ; ᓄᓇᓕᓐᓄᖓᐅᓗᑎᒃ ᐊᐃᑦᓯᖃᑕᕐᓂᕐᒥᓄᑦ ᐊᒻᒪᓗ ᓂᐅᕕᕆᐊᖅᐸᓚᐅᕐᓂᕐᒥᓄᑦ ᐊᑐᖅᐸᓚᐅᖅᑕᖏᓐᓂᒃ, ᖃᐅᔨᓕᓵᖅᓱᑎᒃ ᑕᒪᕐᒥᒃ ᕿᒥᖏᑦ ᑐᖁᕋᖅᑕᐅᓚᐅᕐᓂᖏᓐᓂᒃ. ᐊᓱᐃᓛᒃ ᐅᑎᕈᓐᓇᐃᓕᐅᖅᓕᖅᓱᑎᒃ ᐃᓚᒥᓄᑦ, ᓄᓇᓕᒥᓄᓪᓗ ᑕᐃᒪᐃᓕᐅᕐᕕᒋᔭᒥᓂᒃ ᓅᑦᑐᓐᓇᐃᓪᓕᒐᒥᒃ, ᓇᒧᖓᐅᔪᓐᓇᐃᓕᓪᓗᑎᒃ, ᐊᖑᓇᓱᒋᐊᕈᓐᓇᐃᓪᓕᓗᑎᒃ, ᖃᐅᔨᒪᔭᒥᓂᒃ ᐊᑐᕈᓐᓇᐃᓪᓕᓗᑎᒃ ᐊᒻᒪᓗ ᐊᔪᖏᑕᖏᓐᓂᒃ ᐊᔪᓕᖅᓱᑎᒃ. ᓂᕿᑦᓴᓂᒍᓐᓇᐃᓕᓯᒪᓂᕐᒥᓂᒃ ᐃᓚᒥᓂᒃ, ᐃᓄᐃᑦ ᐅᓂᑳᖅᐸᓚᐅᖅᑐᑦ ᖃᓪᓗᓈᑦ ᒪᓕᒐᓕᐊᕆᓯᒪᔭᖏᑦ ᖃᓄᑐᐃᓐᓇᖅ ᐊᔾᔨᒌᖏᑐᓂᒃ ᐊᑐᓕᖅᑎᑕᐅᕙᓚᐅᕐᓂᖏᓐᓂᒃ, ᐅᓂᒃᑳᕐᕕᐅᕙᓚᐅᖏᓂᖏᓐᓂᓗ ᓄᑖᓂᒃ ᒪᓕᒐᕆᔭᐅᓕᕐᒥᔪᓂᒃ, ᖃᓪᓗᓈᖏᓐᓇᐃᑦ ᐱᒻᒪᕆᐅᑎᑕᖏᓐᓂᒃ ᐃᓱᒪᑦᓴᖅᓯᐅᕈᑎᖃᖅᓯᒪᔪᓂᒃ, ᖃᓄᐃᓕᖓᓗᑕᐅᓕᕈᓐᓇᕐᓂᖏᑦ ᐃᓄᖕᓄᑦ ᕿᒻᒥᕆᔭᖏᓄᓪᓗ ᐃᓱᒪᒋᔭᐅᒐᑎᒃ.  ᑕᒪᒃᑯᐊ ᐅᓂᒃᑳᖅᑕᐅᕙᓚᐅᖅᑐᑦ ᑕᐃᔅᓱᒪᓂᑐᖃᒻᒪᕆᐊᓘᓂᖔᖅᓯᒪᖏᓚᑦ; ᓇᒻᒥᓂᖅ ᐊᑐᖅᓯᒪᔪᑦ ᐃᓄᐃᑦ ᐃᓅᓯᕐᒥᓂᒃ ᐊᒥᓱᐊᓘᕗᑦ ᓱᓕ ᐃᓅᔪᑦ, ᑕᐃᒃᑯᐊ ᐃᓚᖏᓪᓗ ᓱᓕ ᐃᑉᐱᓂᖅᑕᐅᓯᒪᕗᑦ ᐅᓪᓗᒥᒧᑦ ᑎᑭᓪᓗᒍ. ᕿᒻᒦᔭᖅᑕᐅᓂᕕᓂᖏᑦ ᐱᒻᒪᕆᐊᓗᖕᒥᒃ ᐃᓚᒋᔭᐅᓚᐅᖅᓯᒪᔪᑦ ᐊᓯᖏᓐᓄᑦ ᐊᓯᔾᔨᕈᑕᐅᕙᓪᓕᐊᓚᐅᖅᑐᓄᑦ ᓱᒃᑲᓕᔪᐊᓗᖕᒥᒃ ᐃᓄᐃᑦ ᐃᓄᓯᕆᕙᓚᐅᑦᑕᖏᓐᓄᑦ.

ᐃᓐᓇᑐᖃᕆᔭᐅᔪᑦ ᐅᖃᐅᓯᖃᓲᖑᔪᑦ ᑕᐃᔅᓱᒪᓂ ᓱᓕ ᓄᑕᕋᐅᓂᖏᓐᓂᒃ ᐃᖅᑲᐅᒪᔭᒥᓂᒃ, ᐋᓐᓂᓇᖅᑐᐊᓗᓐᓂᒃ ᐃᖅᑲᐅᒪᔭᒥᓂᒃ. ᐅᖃᐅᓯᖃᓲᑦ ᖃᓄᖅ ᐃᓅᓯᖃᖅᐸᓚᐅᕐᓂᖏᓐᓂ ᑕᒪᐃᓐᓂᒃ ᓄᓇᓕᑐᖃᖏᓐᓂ ᐊᒻᒪᓗ ᓄᓇᓕᒻᒥᐅᑕᐅᕙᓚᐅᕐᓂᖏᓐᓂ. ᐊᒥᓱᑦ ᐅᖃᐅᓯᖃᖅᐸᓚᐅᖅᑐᑦ ᐊᓯᔾᔨᖅᐸᓪᓕᐊᓕᓚᐅᖅᑐᓂᒃ ᐊᑦᑐᖅᑕᐅᓂᕕᓂᖏᓐᓂᒃ ᑕᒪᒃᑯᓄᖓ. ᐱᓗᐊᖅᑐᒥᒃ ᑐᑭᓯᓇᖅᑐᐊᓘᓚᐅᖅᑐᖅ, ᑕᐃᑦᓱᒪ ᐃᓅᑉ ᐃᒪᓕ ᑕᑲᑕᐅᑉ ᐅᓂᒃᑳᓚᐅᖅᑕᖏᑦ ᐱᔾᔪᑎᖃᖅᑐᑦ ᐅᖓᓯᑦᑐᒧᑦ ᓅᑕᐅᓚᐅᕐᓂᖓᓂᒃ. ᐄᒪᓕ ᐅᓂᑳᓚᐅᕐᒪᑦ ᑭᓪᓕᓯᐊᓂᖅᑏᑦ ᑲᒥᓯᓇᒃᑯᖏᓐᓄᑦ ᑐᑭᓯᐅᑎᑕᐅᓚᐅᓐᖏᓂᕐᒥᓂᒃ ᐱᔾᔪᑕᐅᓂᖏᓐᓂᒃ ᐅᕝᕙᓗᓐᓃᑦ ᐊᑯᓂᐊᓘᓚᖓᓂᖏᓐᓂᒃ ᓅᑎᑕᐅᓂᖏᓐᓂᒃ. ᐅᖃᐅᓯᖃᓚᐅᕐᒥᔪᖅ ᓇᑦᓴᕈᓐᓇᖅᑎᑕᐅᓚᐅᓐᖏᓂᕐᒥᓂᒃ ᐱᖁᑎᒥᓂᒃ ᓇᒻᒥᓂᖅ, ᑕᐃᒃᑯᓂᖓᓘᓐᓃᑦ ᕿᑐᕐᖓᒥᓄᑦ ᐊᑐᖅᑕᐅᔭᕆᐊᓕᖕᓂᒃ ᐃᒃᑮᕐᓇᖅᑎᓪᓗᒍ ᐊᒻᒪᓗ ᐃᒻᒥᓂᒃ ᐊᔪᖅᑐᐊᓘᔮᕆᓚᐅᕐᓂᕐᒥᓂᒃ ᑲᒪᑦᓯᐊᕈᓐᓇᕐᓂᖅ ᕿᑐᕐᖓᒥᓂᒃ. ᑭᖑᓪᓕᕐᒥᓗ, ᐄᒪᓕ ᐅᖃᐅᓯᖃᓚᐅᖅᑐᖅ ᖃᐅᔨᓚᐅᕐᓂᕐᒥᓂᒃ ᑭᖑᓂᐊᒍᑦ ᐊᖏᕐᕋᒥᓃᑦᑐᑦ ᕿᒪᑦᑕᐅᓚᐅᖅᑐᑦ ᐱᖁᑎᓕᒫᑦᓯᐊᖏᑦ ᐃᑯᐊᓪᓚᑦᑎᑕᐅᓂᕐᒪᑕ ᑲᒪᔨᐅᓚᐅᖅᑐᓄᑦ ᐊᐅᓚᑦᑎᔨᐅᔪᓄᑦ.

ᑲᔪᓯᕙᓪᓕᐊᒍᒥᓇᖅᐳᖅ ᕿᒪᐃᓗᑕ ᑕᒪᒃᑯᓂᖓ ᓈᒻᒪᖏᑦᑐᓂᒃ ᐊᑐᖅᑕᐅᓚᐅᖅᓯᒪᔪᓂᒃ ᑕᐃᔅᓱᒪᓂ ᐱᕙᓪᓕᐊᑎᑕᐅᓚᐅᖅᓯᒪᔪᐊᓗᓐᓂᒃ, ᐊᒻᒪᓗ ᐅᕙᒎᓗᑕ ᐊᑕᐅᑎᒃᑯᑦ, ᓯᕗᕙᖅᐸᓪᓕᐊᒋᐊᕈᓐᓇᖁᓪᓗᑕ. ᑭᓪᓕᓯᓂᐊᖅᑎᑦ ᑲᒥᓯᓇᐃᑦ ᑭᖑᓪᓕᒥ ᐅᓂᒃᑳᓕᐊᕆᓚᐅᖅᑕᖏᑦ, ᐊᑐᓕᖁᔭᓕᐊᕆᓚᐅᖅᑕᖏᑦ, ᐊᖅᑯᑎᒃᓴᐅᓕᖅᐳᑦ ᑲᔪᓯᒋᐊᕈᓐᓇᓂᕐᒧᑦ ᐱᑦᑎᐊᖃᑕᐅᑎᔪᓐᓇᕐᓂᕐᒥᒃ ᐊᑐᕐᓗᑕ ᓯᕗᓂᑦᓴᕆᔪᓐᓇᖅᑕᑦᑎᓐᓂᒃ ᐱᓕᕆᔪᓐᓇᕐᓂᖅ, ᑭᖑᒧᓪᓗ ᑕᑯᒋᐊᖃᑦᑕᕐᓗᑕ ᐃᓱᒪᑦᓴᖅᓯᐅᕈᑎᒋᑦᓯᐊᖃᑕᕐᓗᒋᑦ ᐊᑐᖅᑕᐅᕌᓂᒃᓯᒪᓕᖅᑐᑦ.  

ᐱᓇᓱᐊᑦᓯᐊᕈᒪᓪᓗᑕ ᐊᑦᓱᕉᑎᖃᕐᓗᑕ ᐊᑐᒃᑲᓂᖁᔨᖏᓇᑦᑕ ᑕᐃᔅᓱᒪᓂ ᐱᕙᓪᓕᐊᓚᐅᖅᓯᒪᔪᓂᒃ, ᐃᓚᒌᓪᓗᑕ ᐊᑕᐅᑎᒃᑯᑦ ᐊᓂᒎᑎᒋᐊᕈᓐᓇᖅᑐᒍᑦ ᐊᑐᖅᑕᐅᕙᓚᐅᖅᑐᓂᒃ ᓈᒻᒪᖏᑦᑐᓂᒃ ᖃᓗᓈᓄᖓᔪᓂᒃ ᐱᐅᓯᕆᔭᐅᕙᓚᐅᖅᑐᓂᒃ, ᑕᐃᒪᐃᓕᖓᑎᑕᐅᑐᐃᓇᖅᐸᓚᐅᖅᑐᓂᓪᓗ, ᐱᒋᐊᕈᑎᖃᖔᕈᒪᕗᒍᑦ ᐅᐱᒋᔭᐅᓗᑎᒃ ᐃᓕᑕᕆᔭᐅᓂᖏᑦ ᕿᑭᖅᑕᓂ ᓱᓕᔪᓂᒃ ᑭᓪᓕᓯᓂᐊᖅᑏᑦ ᑲᒥᓯᓇᐃᑦ ᐱᒻᒪᕆᐅᓂᖅᐹᖑᔪᓂᒃ ᐊᑐᓕᖁᔭᓕᐊᕆᓚᐅᑕᖓᓂᒃ ᐊᑐᕐᓗᒍ: ᑲᓇᑕᐅᑉ ᒐᕙᒪᖏᑦ ᓯᕗᓪᓕᕐᒥ ᑐᑭᓯᓇᑦᑎᐊᕐᓗᑎᒃ ᐅᖃᕈᒪᕗᑦ ᒪᑐᒥᖓ: ᐃᓕᑕᖅᓯᕗᒍᑦ ᐱᐅᓯᕆᕙᓚᐅᖅᑕᑎᓐᓂᒃ ᑕᐃᔅᓱᒪᓂ, ᐊᒻᒪᓗ ᑕᐃᒃᑯᓄᖓ ᓱᓕᔪᒥᒃ ᒪᒥᐊᔾᔪᑎᖃᖅᐳᒍᑦ.

ᐅᖃᐅᓯᓕᐅᖑᐊᑐᐃᓐᓇᕈᒪᖏᓐᓇᑕ, ᑭᓯᐊᓂ ᐊᑯᓂᐅᓂᐊᖅᑐᒧᑦ ᑐᕌᖓᔪᓂᒃ ᐱᓇᓱᐊᕈᒪᔪᒍᑦ ᓇᒻᒪᖏᓐᓂᐅᓚᐅᖅᑐᓂᒃ ᓈᒻᒪᓕᖅᑎᑦᓯᖏᐊᕈᒪᓂᕐᒥᒃ ᐊᑐᖃᑦᑕᖅᓯᒪᔭᑦᑎᓐᓂᒃ. ᐅᖃᐅᓯᕆᒃᑲᓐᓂᓕᖅᑕᑲ ᓯᕗᓂᐊᒍᑦ ᒪᒥᐊᓲᑕᐅᓚᐅᖅᓯᒪᔪᑦ ᐅᓪᓗᒥ ᐃᓕᑕᕆᔭᐅᓗᑎᒃ ᖃᓄᐃᓕᐅᖅᑎᐅᕙᓚᐅᕐᓂᖏᑦ ᑲᓇᑕᐅᑉ ᒐᕙᒪᒃᑯᖏᑦ ᑕᐃᑦᓱᒪᓂ ᓅᑎᕆᓚᐅᕐᓂᖏᓐᓂᒃ ᐃᓄᓐᓂᒃ ᐃᓚᒌᑦᑐᓂᒃ ᐊᖏᕐᕋᖏᓐᓂᒃ, ᐃᓚᒥᓂᒃ, ᐃᓕᖅᑯᓯᑐᖃᕐᒥᓂᒡᓗ, ᐊᒥᓲᓗᐊᖅᑐᓂ ᐃᓅᔪᓐᓃᕈᑕᐅᓯᒪᔪᓂᒃ ᐅᕝᕙᓗᓐᓃᑦ ᑐᖁᕋᕈᑕᐅᖃᑦᑕᖅᓯᒪᔪᓂᒃ.

ᕿᑭᖅᑕᓂ ᓱᓕᔪᖅᓯᐅᖅᑏᑦ ᑭᓪᓕᓯᓂᐊᖅᑎᖏᓐᓄᑦ ᑲᒥᓯᓇᐃᑦ ᑭᖑᓪᓕᖅᐹᒥ ᐅᓂᒃᑳᓕᐊᕆᓚᐅᖅᑕᖏᓐᓂ ᐅᖃᖅᓯᒪᒋᕗᑦ ᓱᒃᑲᓕᔪᐊᓗᒻᒥᒃ ᐊᓯᔾᔨᖅᑕᐅᓕᓚᐅᕐᓂᖏᑦ ᐃᓄᐃᑦ ᐃᓅᓯᕆᕙᓚᐅᖅᑕᖏᑦ ᑕᐃᑲᖓᑦ ᐱᒋᐊᖅᑐᓂᒃ 1950-ᖏᓐᓂᒃ ᑎᑭᓪᓗᒍ 1975-ᒧᑦ ᐊᒻᒪᓗ ᐊᑦᓱᕈᕐᓇᖅᑐᒻᒪᕆᐊᓪᓗᑰᕈᑕᐅᓚᐅᖅᓱᑎᒃ. ᐅᓂᒃᑳᓕᐊᖏᓐᓂ ᑎᑎᕋᖅᓯᒪᔪᑦ ᖃᓄᖅ ᑲᓇᑕᐅᑉ ᒐᕙᒪᒃᑯᖏᑦ ᐱᓂᖅᐹᒻᒪᕆᒻᒥᒃ ᐱᒋᐊᖅᑎᑦᑎᔨᐅᓚᐅᕐᓂᖏᓐᓂᒃ ᓱᕋᑦᑎᕆᓂᕐᒥᒃ ᐃᓅᖃᑎᒌᖕᓂᖏᓐᓂᒃ ᐊᓯᔾᔨᖅᑐᐃᓪᓗᑎᒃ, ᑐᑭᓯᓂᐊᕐᕕᖃᑦᑎᐊᓚᐅᕋᑎᒃ ᐃᓄᖕᓂᒃ, ᒪᓕᑉᐸᑦᓱᑎᒃ ᐸᕐᓇᐅᑎᓕᐊᕆᔭᒥᓂᒃ ᑐᑭᓕᐅᑦᑎᐊᔾᔮᖏᑦᑐᓂᒃ ᐅᕝᕙᓗᓐᓃᑦ ᑮᓇᐅᔭᒃᓴᓂᒃᑕᐅᓯᒪᖏᓗᐊᖃᑕᓚᐅᖅᑐᓂ ᐃᓄᖕᓄᑦ ᑐᕌᖓᔪᓂᒃ.

ᐊᒃᑐᖅᑕᐅᓯᒪᖃᑕᐅᕗᖓ ᐅᓂᒃᑳᖃᑦᑕᓚᐅᖅᑕᔅᓯᓐᓂᒃ ᓱᓕᔫᑎᑕᐅᒐᒥᒃ, ᖃᓄᕐᓗ ᐊᑦᓱᕈᕐᓇᖅᑐᑰᖃᑦᑕᖅᓯᒪᓂᔅᓯᓐᓂᒃ ᐱᔾᔪᑕᐅᓗᑎᒃ ᑐᑭᓕᐅᖅᓯᒪᔭᖏᑦ ᐊᑐᐊᒐᕆᔭᐅᑎᑕᐅᕙᓚᐅᖅᑐᑦ; ᓱᕋᑦᑎᖅᑕᐅᓯᒪᓂᖏᓄᓪᓗ ᐊᑕᖃᑎᒌᓐᓂᖏᓐᓄᑦ ᐃᓄᐃᑦ ᕿᒥᖏᓪᓗ, ᐳᕙᓪᓗᑦᑐᓄᓪᓗ ᐅᓗᕆᐊᓇᕈᑕᐅᕙᓚᐅᕐᓂᖏᓐᓄᑦ, ᓅᑦᑎᑕᐅᖃᑕᓚᐅᕐᓂᖏᑦ ᐃᓄᐃᑦ, ᓈᒻᒪᖏᑦᑐᓂᒃ ᐃᒡᓗᑦᓴᖃᖅᑎᑕᐅᕙᓐᓂᖏᓐᓄᑦ, ᐊᒻᒪᓗ ᕿᑐᖓᖏᑦ ᐊᐅᓪᓚᖅᑎᑕᐅᕙᓚᐅᕐᓂᖏᓐᓄᑦ ᐃᓕᓐᓂᐊᕆᐊᖅᑎᑕᐅᓪᓗᑎᒃ. ᑕᒪᒃᑯᐊᒐᓵᓗᐃᑦ ᐃᓄᖕᓄᑦ ᐊᑐᖅᑕᐅᓯᒪᕗᑦ. ᐋᓐᓂᖅᑕᐅᓯᒪᓂᖏᓐᓂᒃ ᐃᓅᖏᓐᓇᖅᓱᑎᒃ ᐊᑐᕐᓂᑰᕗᑦ ᑕᐃᔅᓱᒪᓂ ᐊᑐᐊᒐᓕᐊᕆᔭᐅᕙᓚᐅᖅᑐᓂᒃ, ᑐᓵᖃᑦᑕᓚᐅᕆᕗᖓ ᓂᐱᖏᓐᓂᒃ ᐃᓄᐃᑦ ᓴᖏᓂᖏᓐᓂᒃ; ᐱᒻᒪᕆᐅᓂᖏᓐᓂᒃ ᐃᓕᖅᑯᓯᑐᖃᖏᑦ, ᐊᑕᓂᖏᓪᓗ ᓄᓇᒥᓄᑦ, ᐃᓚᖃᓲᖑᓂᖏᑦ ᐃᓚᒥᓂᒃ ᑕᐃᒪᓐᓂᒃ ᐊᒻᒪᓗ ᐃᓅᖃᑎᒥᓂᒃ ᓄᓇᓕᖏᓐᓂ.

ᔮᓐ ᐊᒪᕈᐊᓕᒃ ᐅᖃᓚᐅᖅᓯᒪᔪᖅ “ᐃᓱᒪᒋᔭᐅᔪᓐᓃᕐᕕᐅᔪᖃᕐᓂᐊᖅᐸᑦ ᓱᓕᔫᔭᕆᐊᖃᖅᐳᑦ ᐊᒻᒪᓗ ᐃᓕᑕᖅᓯᓯᒪᓗᑎᒃ ᖃᓄᐃᓕᐅᓚᐅᖅᓯᒪᓂᕐᒥᓂᒃ.”

ᐅᓪᓗᒥ, ᑲᓇᑕᐅᑉ ᒐᕙᒪᐃᑦ ᐃᓕᑕᖅᓯᕗᑦ ᑕᐃᒃᑯᓂᖓ ᐃᒻᒥᓃᓐᓇᖅ ᐱᐅᓯᕆᕙᓚᐅᖅᑕᖏᓐᓂ ᐊᑐᐊᒐᓕᐊᕆᕙᓚᐅᖅᑕᖏᓐᓂᓪᓗ – ᑕᒪᕐᒥᒃ ᑲᑎᓪᓗᒋᑦ ᐊᑐᖅᑕᐅᓂᕕᓂᖏᑦ ᐊᑕᐅᑎᒃᑯᑦ – ᐊᖅᓵᖅᑕᐅᓯᓯᒪᖕᒪᑕ ᐃᓄᐃᑦ ᓇᒻᒥᓂᖅ ᐊᐅᓚᑦᑎᔨᐅᔪᓇᕐᓂᖏᓐᓂᒃ ᐊᒻᒪᓗ ᓄᓇᑐᖃᕐᒥᓂᒃ ᐅᔾᔨᑐᑦᓯᐊᖃᑦᑕᐃᓐᓇᕐᓂᕐᒥᒃ ᐱᐅᓯᑐᖃᖏᓂᒃ ᐊᑐᕈᓐᓇᕐᓂᖅ ᐊᑐᖅᐸᓚᐅᖅᑕᑐᖃᖏᓐᓂᒃ. ᑕᒪᒃᑯᐊ ᐱᐅᓯᕆᔭᐅᓂᑯᐃᑦ ᐃᓄᖕᓄᑦ ᐊᒻᒪᓗ ᒐᕙᒪᒃᑯᓐᓄᑦ ᐊᔪᓕᕈᑕᐅᓯᒪᒻᒪᑕ, ᐃᒃᐱᒍᓲᑦᑎᐊᕈᓐᓇᕐᓗᑎᒃ, ᑐᖓᕕᖃᕈᓐᓇᑦᑎᐊᕐᓗᑎᓪᓗ ᐱᓕᕆᖃᑎᒌᒎᓐᓇᕐᓂᖏᓐᓄᑦ, ᑕᒪᒃᑯᐊ ᑐᖓᕕᐅᓲᖑᒐᓗᐊᕐᒪᑕ ᐱᑕᖃᕆᐊᓕᒻᒪᕆᐊᓘᓗᑎᒃ ᐱᕙᓪᓕᐊᓕᕈᓐᓇᕐᓂᕐᒧᑦ ᖃᓄᐃᖏᓂᖅᓴᐅᓕᕈᓐᓇᖅᑐᓂᒃ ᐃᓅᖃᑎᒌᕝᕕᐅᔪᓐᓇᖅᑐᓄᑦ.

ᑐᑭᓯᓂᐊᕐᕕᐅᓯᒪᖏᑦᓯᐊᖅᓱᑎᒃ, ᐊᒻᒪᓗ ᐊᒥᓱᐊᓗᓐᓂᒃ ᑐᑭᓯᓇᑦᑎᐊᖅᑐᓂᒃ ᐅᓂᒃᑳᕐᕕᐅᕙᓚᐅᕋᑎᒃ, ᑲᓇᑕᐅᑉ ᒐᕙᒪᐃᑦ ᓱᓕᓂᕋᖅᐸᒃᓱᑎᒃ ᕿᑭᖅᑕᓂ ᐃᓄᓐᓂᒃ ᖃᐅᔨᑎᑦᑎᕙᓚᐅᖅᑐᑦ “ᐱᐅᓂᖅᓴᒥᒃ ᐃᓅᓯᖃᓚᖓᓕᕐᓂᕋᐃᕙᖕᓂᕐᒥᒃ” ᐊᑐᖅᐸᓪᓕᐊᓕᕋᒥᒃ ᖃᓪᓗᓈᑦ ᓄᓇᖏᓐᓂ ᖃᓄᐃᓕᐅᕈᑕᐅᓲᖑᔪᓂ ᐃᓄᐃᑦ ᓄᓇᖏᓐᓂ, ᑕᒫᓂ ᐅᑭᐅᖅᑕᖅᑐᖅᐸᓯᐅᓂᕐᒥ. ᑭᓯᐊᓂᓕ, ᐱᓪᓚᕆᑦᑐᒥ ᐃᓅᓯᕐᒥ ᐊᑐᖅᓯᒪᔪᐊᓘᕗᒍᑦ, ᐊᐅᓪᓚᖅᑎᑦᑎᖃᑦᑕᖅᓯᒪᓂᕐᒥᒃ ᕿᑐᖓᔅᓯᓐᓂᒃ, ᐊᖅᓵᖅᓯᓯᒪᓂᖅ ᐃᒻᒥᓂᒃ ᐊᐅᓚᑦᑎᔨᐅᔪᓐᓇᕐᓂᖏᓐᓂᒃᒃ ᐃᓅᓯᕐᒥᓂᒃ ᐃᓄᐃᑦ ᐊᒻᒪᓗ ᐱᑦᓯᐊᖅᑕᐅᖃᑦᑕᖅᓯᒪᖏᓐᓂᓯᓐᓂᒃ, ᐱᑦᓯᐊᖅᑕᐅᔭᕆᐊᖃᕋᓗᐊᖅᑎᓪᓗᓯ. ᐱᓗᐊᖅᑐᒥᒃ ᒪᒥᐊᓇᓗᐊᖅᑐᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᑐᖅᑕᐅᓚᐅᖅᓯᒪᔪᑦ ᕿᒻᒦᔭᐃᑎᑦᓯᓚᐅᕐᓂᖏᑦ ᐃᓄᓐᓂᒃ, ᐊᑑᑎᖃᕐᓂᖅᐹᑦᓯᐊᖑᓚᐅᖅᑐᓂᒃ ᐃᓕᖅᑯᓯᔅᓯᓐᓄᑦ, ᐃᓅᔾᔪᑎᒃᓴᔅᓯᓄᑦ, ᓄᓇᓕᖕᓄᓪᓗ ᖃᓄᐃᖏᓗᑕᐅᔪᓐᓇᕐᓂᕐᒧᑦ ᑕᐃᒪᖓᓗ ᐊᑐᖅᓯᒪᔭᔅᓯᓐᓂᒃ. ᐃᓕᔅᓯᓐᓂᒃ ᑐᑭᓯᐅᒪᑦᑎᐊᕐᓂᖅᓴᐅᒐᓱᐊᕆᐊᖃᓕᕋᓗᐊᕋᑦᑕ, ᐱᓕᕆᖃᑎᖃᑦᑎᐊᕐᓗᑕ ᓴᕿᑎᑦᑎᒐᓱᐊᕈᓐᓇᕐᓂᖅ ᐊᑐᒐᑦᓴᐅᓂᐊᖅᑐᓂᒃ ᖃᓄᐃᓂᕐᓘᑕᐅᓂᐊᖏᑦᑐᓂᒃ ᐊᒻᒪᓗ ᐃᑲᔫᑎᖃᕈᓐᓇᖅᑐᓂᒃ; ᑕᐃᒪᐃᓕᐅᖃᑦᑕᓚᐅᕐᓂᑦᑎᓐᓄᑦ, ᐊᖏᔪᐊᓗᒻᒥᒃ ᐊᑦᓱᐊᓗᒃ ᐋᓐᓂᕐᓇᖅᑐᒃᑰᖅᓯᒪᕗᓯ, ᐅᕙᒍᓪᓗ ᐊᖏᔪᒥᒃ ᒪᒥᐊᑉᐳᒍᑦ.

ᐱᑕᖃᓕᖅᑎᑦᓯᓯᒪᖏᑦᑐᒍᑦ ᓈᒪᔪᓂᒃ ᐃᒡᓗᑦᓴᓂᒃ, ᓈᒪᔪᓂᒃ ᐋᓐᓂᐊᖅᑐᓕᕆᔾᔪᑎᑦᓴᓂᒃ, ᐃᓕᓐᓂᐊᕈᑎᑦᓴᓂᒃ, ᐃᓅᔾᔪᑎᑦᓴᖃᕈᑕᐅᔪᓐᓇᖅᑐᓂᒃ ᐃᖃᓇᐃᔮᑦᓴᑎᒍᓗᓐᓃᑦ, ᐱᐅᓯᑐᖃᖅᑎᒍᓗᓃᑦ ᐊᑐᕈᓐᓇᕐᓂᕐᒥᒃ. ᐊᔪᓕᖅᑎᑦᓯᓯᒪᔪᒍᑦ ᐃᓕᑦᓯᓐᓂᒃ ᐃᒻᒥᓂᒃ ᐊᐅᓚᑦᑎᔨᐅᔪᓐᓇᕐᓂᖅ ᓇᒻᒥᓂᖅ ᓯᕗᓕᐅᖁᔭᑦᓴᓂᒃ ᐃᓱᒪᓕᐅᕈᓐᓇᕐᓂᕐᒥᒃ, ᐊᔭᐅᖅᑕᐅᓯᒪᓪᓗᓯᓗ ᐃᓅᒐᓱᐊᕆᐊᖃᕐᓂᖅ ᐊᑦᓱᕈᕐᓇᖅᑐᐊᓗᒻᒥ ᐊᕙᑎᓕᒻᒥ, ᓅᑎᑕᐅᖃᑦᑕᖅᓯᒪᓪᓗᓯᓗ ᓂᕈᐊᖅᓯᒪᖏᑕᔅᓯᓐᓂᒃ, ᓄᓇᑐᖃᕆᓐᖏᑕᔅᓯᓐᓄᑦ.

ᑕᒪᓐᓇ ᒪᒥᐊᓐᓂᕆᔭᕗᑦ ᐱᒋᐊᕈᑕᐅᓂᐊᓕᖅᐳᖅ ᖃᓄᐃᓕᐅᕐᓂᕆᓂᐊᓕᖅᑕᑦᑎᓐᓄᑦ. ᓂᕆᐅᑦᑐᒍᑦ ᐃᓚᖃᑦᓯᐊᕈᒪᓂᕐᒥᒃ ᐃᓕᑦᓯᓐᓂ, ᐃᓕᑕᕆᔭᐅᓗᑎᒃ ᓈᒻᒪᖏᑦᑐᓂᒃ ᐊᑐᖃᑦᑕᖅᓯᒪᓂᑎᓐᓂᒃ ᓴᖏᓂᑖᕈᑕᐅᖁᓇᕐᒪᑕ ᐃᓄᐃᑦ ᐃᓕᖅᑯᓯᑐᖃᖏᓐᓄᑦ, ᐊᐅᓚᑦᑎᓂᕆᕙᑦᑕᖏᓐᓄᑦ ᐊᒻᒪᓗ ᖃᓄᐃᖏᓂᖅᓴᐅᓕᕈᓐᓇᕐᓂᖏᓐᓄᑦ ᐃᓄᐃᑦ ᓄᓇᒥᓂ. ᐱᓕᕆᖃᑎᒋᓂᐊᖅᐸᑦᑎᒋ ᖃᓄᐃᓕᐅᕈᑕᐅᒍᓐᓇᖁᓪᓗᒋᑦ ᐃᓄᐃᑦ ᕿᑐᕐᖓᕆᔭᖏᓄᓪᓗ ᑎᑭᐅᒪᔪᓂᒃ ᖁᐊᖅᓴᕐᓇᑦᑐᒃᑰᕈᑕᐅᖃᑦᑕᓯᒪᔪᓂᒃ ᓄᓇᔅᓯᓐᓄ ᓵᖓᔭᐅᖃᑦᑕᓯᒪᔪᓂᒃ ᑲᓇᑕᐅᑉ ᐊᑐᐊᒐᓕᐊᕆᕙᓪᓕᓚᐅᖅᑕᖏᑦ ᐱᔾᔪᑕᐅᓗᑎᒃ. ᐊᑐᕐᓗᑕ ᓴᐃᒪᖃᑎᒌᒐᓱᐊᕈᓐᓇᕐᓂᕐᒥᒃ, ᑲᑎᒪᒋᐊᕐᓗᑕ ᐊᑯᓐᓂᖓᓂ ᐊᑭᕋᕇᓂᐅᔪᓐᓇᕐᓂᐅᑉ ᐊᒻᒪᓗ ᐃᓚᒌᓕᕐᕕᐅᔪᓐᓇᕐᓂᐅᑉ, ᐃᑲᔪᕈᓐᓇᖅᑐᒍᑦ ᐃᓄᖕᓂᒃ ᖃᐅᔨᒪᔪᓐᓇᕐᓂᖏᓐᓂᒃ ᑕᐃᔅᓱᒪᓂ ᖃᓄᐃᓕᖓᕙᓚᐅᕐᓂᖏᓐᓂᒃ, ᖃᓄᖅᑑᕈᑕᐅᒋᐊᕈᓐᓇᖅᑐᓂᓗ ᐊᑯᓂᐊᓗᒃ ᐊᑦᑐᖅᑕᐅᓯᒪᓂᖏᓐᓄᑦ ᐊᑐᐊᒐᖃᖅᑎᑕᐅᕙᓕᓚᐅᕐᓂᖏᓐᓄᑦ ᐃᓄᐃᑦ ᑕᒫᓂ ᐊᕕᑦᑐᖅᓯᒪᓂᕐᒥ, ᐊᑐᒐᑦᓴᓂᑦᑕᐅᓗᑎᒃ ᐃᑲᔪᖅᓱᖅᑕᐅᓗᑎᓪᓗ ᕿᑭᖅᑕᓂ ᐃᓄᐃᑦ ᐃᒻᒥᓂᒃ ᐊᐅᓚᑦᑎᔨᐅᓕᕈᓐᓇᕐᓂᖏᓐᓄᑦ ᖃᓄᐃᖏᓐᓂᖅᓴᐅᓕᕈᓐᓇᕐᓂᖏᓄᓪᓗ ᑐᕋᖓᔪᓂᒃ ᓄᓇᖏᓐᓂ.

ᑕᒪᒃᑯᐊ ᐱᐅᓯᔭᐅᕙᑦᑐᕕᓂᐊᓗᐃᑦ ᐊᑐᖅᑕᐅᖃᑦᑕᓚᐅᕐᓂᖏᓐᓂ, ᑲᓇᑕᐅᑉ ᒐᕙᒪᒋᕙᓚᐅᖅᑕᖏᓐᓄᑦ ᐃᒻᒥᓃᓐᓇᖅ ᐃᓱᒪᓕᐅᖅᑎᐅᕙᓚᐅᖅᐳᖅ ᐱᔾᔪᑎᖃᖅᑐᓂᒃ ᐃᓄᐃᑦ ᐃᓅᓯᕆᔭᖏᓐᓂᒃ, ᖃᐅᔨᒪᔪᑑᓱᕆᓂᖏᓐᓄᑦ ᒐᕙᒪᐅᒐᒥᒃ ᖃᓄᐃᓕᐅᖅᑎᑦᓯᒍᓐᓇᕐᓂᕐᒥᓂᒃ ᐃᓄᖕᓂᒃ, ᐱᐅᓂᖅᐹᖑᓂᐊᕋᓱᒋᔭᑐᐊᕆᔭᖏᓐᓂ. ᑕᒪᑦᑕ ᐃᓕᑦᑎᓯᒪᓕᖅᑐᒍᑦ, ᐃᓕᑦᑎᓂᐊᕆᓪᓗᑕᓗ ᑕᒪᒃᑯᓇᖔᓗ ᐊᖏᔪᐊᓗᒥᒃ ᑕᒻᒪᖃᑦᑕᖅᓯᒪᓂᖏᓐᓂᒃ. ᐱᓂᐊᕐᓂᖃᓪᓚᕆᓕᖅᑐᒍᑦ ᐅᔾᔨᖅᑐᑦᓯᐊᕈᒪᓂᖅ ᓯᕗᓂᑦᓴᐅᔪᖅ ᐊᔾᔨᒋᔭᐅᓂᐊᕈᓐᓃᕐᒪᑦ ᑭᖑᓂᕆᓯᒪᓕᖅᑕᑦᑎᓐᓂᒃ.   

ᐃᓕᑕᕆᔭᕗᑦ ᐅᐱᒋᔭᐅᖁᓪᓗᒋᓪᓗ ᐃᓄᐃᑦ ᐊᓂᒎᑎᖃᑕᕈᓐᓇᕐᓂᖏᑦ. ᓂᕆᐅᓂᖃᖅᑐᖓ ᑐᖓᕕᑦᓴᐅᓕᐅᑦᓯᐊᒃᑲᓂᕈᓐᓇᕐᓂᖅ ᐱᓇᓱᐊᖃᑎᒌᒍᓐᓇᕐᓂᐊᕋᑦᑕ ᐱᓪᓚᕆᓗᑕ ᑎᑭᐅᑎᔪᓐᓇᕐᓂᖅ “ᓴᐃᒪᖃᑎᒌᖕᓂᕐᒧᑦ”.

ᐊᖀᖃᑎᒌᒐᓱᐊᕈᑕᐅᓂᐊᓕᖅᐳᑦ ᐊᑐᐊᓂᑦᓯᒪᔪᑦ ᑕᒻᒪᖃᑦᑕᕐᓂᕐᒥᒃ, ᖁᕕᐊᓲᑕᐅᓗᑎᒃ ᓄᓇᓕᒋᔭᓯ, ᐅᐱᒋᔭᐅᓗᑎᒃ ᐃᓕᖅᑯᓯᕆᔭᓯ, ᐃᑉᐱᒋᔭᐅᑦᓯᐊᕐᓗᑎᒃ ᐅᖃᐅᓯᑐᖃᕆᔭᓯ ᐊᒻᒪᓗ ᐃᓕᑕᕆᔭᐅᓗᑎᒃ ᑕᐃᒪᖓᑦ ᐃᑲᔪᖃᑦᑕᐃᓐᓇᕐᓂᖏᑦ ᐃᓄᐃᑦ ᑲᓇᑕᒥᒃ. ᐱᓂᐊᕐᓂᖃᖅᐳᒍᑦ ᐱᓕᕆᖃᑎᕈᒪᓂᖅ ᐃᓄᓐᓂᒃ, ᐃᑲᔪᖅᓱᐃᔪᒪᓂᕐᒥᒃ ᓯᕗᓕᐅᖅᑎᒋᔭᔅᓯᓐᓂᒃ, ᐃᓕᖅᑯᓯᕆᔭᐅᔪᑦ ᓴᖏᓂᖅᓴᐅᓕᕐᓂᐊᕐᒪᑕ ᐊᒻᒪᓗ ᐱᑕᖃᓕᕈᓐᓇᕐᓂᐊᕐᒪᑕ ᖃᓄᐃᖏᑦᑐᑦ ᓄᓇᓖᑦ ᐃᓅᓂᐊᕐᒥᔪᓂ ᓯᕗᓂᑦᓴᒥ. ᑕᐃᒪᐃᒪᑦ, ᑕᒡᒐ ᑕᒫᓂ ᐅᓪᓗᒥ, ᑲᓇᑕᐅᑉ ᒐᕙᒪᐃᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᕿᑎᑦᑎᓕᖅᐳᑦ ᐃᓕᑕᕆᔭᐅᓯᒪᔪᓂᒃ ᐱᓕᕆᖃᑎᒌᓐᓂᕆᓂᐊᖅᑕᖏᓐᓂᒃ, ᐊᑐᕐᓗᑎᒃ ᑐᑭᓯᐅᒪᖃᑦᑕᐅᑎᓂᕐᒧᑦ ᐊᖏᕈᑎᓂᒃ, ᐱᓕᕆᖃᑎᒌᓪᓗᑎᒃ ᐊᑯᓂᐅᓂᐊᖅᑐᒧᑦ-ᓯᕗᓂᑦᓴᒧᑦ ᑲᔪᓰᓐᓇᕈᓐᓇᓚᖓᔪᓂᓪᓗ ᐋᕿᐅᒪᓗᑎᒃ ᑎᑭᐅᑎᔪᓐᓇᕐᓂᐊᕐᒪᑕ ᓴᐃᒪᖃᑎᒌᒍᓐᓇᕐᓂᕐᒧᑦ, ᒪᓕᓪᓗᑎᒃ ᑕᐃᒃᑯᓂᖓ ᖃᐅᔨᔭᐅᓚᐅᖅᑐᓂᒃ ᕿᑭᖅᑕᓂ ᓱᓕᔪᓂᒃ ᑭᓪᓕᓯᓂᐊᖅᑎᒃᑯᑦ ᐱᓕᕆᐊᕆᓚᐅᖅᓯᒪᔭᖏᓐᓂᒃ. ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑕᐅᑐᒐᖃᕐᒪᑎᒃ ᓴᐃᒪᖃᑎᒌᓐᓂᕐᒥᒃ, ᐱᐅᓂᖅᓴᐅᓂᐊᖅᑐᒥᓗ ᓯᕗᓂᑦᓴᖃᕈᓐᓇᓂᕐᒥᒃ ᐊᒻᒪᓗ ᓄᑕᖑᓂᐊᓕᖅᑐᓂᒃ ᐱᓕᖃᑎᒌᑦᓯᐊᕈᓐᓇᕐᓂᖏᓐᓂᒃ. ᐃᓚᒌᓪᓗᑕ, ᐱᓕᕆᕙᓪᓕᐊᓂᐊᖅᑐᒍᑦ ᓴᕿᑎᑦᑎᓂᕐᒥᒃ ᐊᑐᖅᑕᐅᖏᓐᓇᕈᓐᓇᖅᑐᓂᒃ ᐊᑐᒐᑦᓴᖏᓐᓂᒃ ᕿᑭᖅᑕᓂ ᐃᓄᐃᑦ ᐱᐅᓯᑐᖃᖏᓐᓄᑦ, ᒪᒥᓴᕈᑎᔅᓴᖏᓐᓄᑦ, ᖃᓄᐃᑦᑐᓐᓃᕈᑎᑦᓴᖏᓐᓄᓗ ᒫᓐᓇᐅᔪᖅ ᐃᓄᖁᑎᖏᓐᓄᑦ ᓯᕗᓂᑦᓴᒥᓗ ᐃᓅᔪᒫᕐᒥᔪᓄᑦ.  

ᐅᓪᓗᒥ ᒪᒥᓐᓂᐊᕆᔭᕗᑦ ᓱᓕᓂᕋᐃᓗᑕᐅᕗᖅ. ᐃᓄᓐᓄᑦ ᕿᑭᖅᑕᓂ ᐊᕕᑦᑐᖅᓯᒪᓂᕐᒥ, ᓱᓕᓂᕋᐃᓂᐅᕗᖅ ᑕᒪᓐᓇ ᐃᓕᔅᓯᓐᓄᑦ ᖃᓄᐃᓕᐅᖅᑕᐅᓚᐅᖅᓯᒪᓂᕆᔭᔅᓯᓐᓄᑦ ᐳᐃᒍᕇᒃᑯᑕᐅᓂᐊᖅᐳᖅ, ᓂᐱᒋᔭᔅᓯᓗ ᑐᓴᖅᑕᐅᕙᖏᑦᑑᓂᐊᕈᓐᓃᖅᓱᓂ. ᓱᓕᔫᓂᕋᐃᓂᖅ, ᑲᓇᑕᐅᑉ ᒐᕙᒪᒃᑯᖏᓐᓂᖓᖅᑐᖅ, ᑲᔪᓯᕕᐅᓂᐊᖅᑐᑦᓴᕿᑎᑦᑎᔪᒪᓂᕐᒧᑦ ᐱᐅᓂᖅᓴᐅᓂᐊᖅᑐᓂᒃ ᓯᕗᓂᑦᓴᖃᖁᔨᓂᕐᒧᑦ, ᑐᖓᕕᐅᑦᑎᐊᕈᓐᓇᖅᓯᓗᑎᒃ ᐃᓚᒌᓕᕈᑕᐅᓂᖏᓐᓄᑦ, ᐊᑐᕐᓕᕐᓗᑎᒃ ᓴᐃᒪᖃᑎᒌᖕᓂᕐᒥᒃ.

ᐊᑕᐅᑎᒃᑯᒃ, ᐅᕙᒍᑦ ᓴᕿᑎᑦᑎᒍᓇᕋᑦᑕ ᓴᖏᓂᖅᓴᐅᔪᓂᒃ ᐃᓚᐅᑎᑦᓯᓂᖅᓴᐅᕙᑦᑐᓂᒃ ᓯᕗᓂᑦᓴᖃᑦᑎᐊᕈᑕᐅᖔᕈᓐᓇᖅᑐᓂᒃ ᑲᓇᑕᒥᐅᓄᑦ ᐃᓄᖕᓄᓪᓗ. ᖁᔭᓐᓇᒦᒃ.

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ