QIA ELECTIONS - Our homeland, our future, our vote. Remember to cast your ballot. Learn More

ᕿᑭᖅᑕᓃᒃᑯᑦ ᓂᕈᐊᕐᓂᖓ - ᐊᖏᕐᕋᕗᑦ, ᓯᕗᓂᒃᓴᕗᑦ ᐊᒻᒪᓗ ᓂᕈᐊᕐᓂᕗᑦ. ᓂᕈᐊᕆᐊᖅᑐᕐᓂᐊᖅᐳᑎᑦ. ᑐᑭᓯᒃᑲᓐᓂᕆᑦ

ᐅᖃᐅᓯᒃᓴᑦ ᕿᑭᖅᑕᓃᒃᑯᑦ ᐊᖓᔪᖅᑳᖓᑕ ᑐᖏᓕᐊᓄᑦ: ᐃᓅᒐᑦᑕ ᑲᑎᒪᓂᖓᓄᑦ

ᐅᖃᐅᓯᒃᓴᑦ ᕿᑭᖅᑕᓃᒃᑯᑦ ᐊᖓᔪᖅᑳᖓᑕ ᑐᖏᓕᐊᓄᑦ: ᐃᓅᒐᑦᑕ ᑲᑎᒪᓂᖓᓄᑦ

 In blog-inuk, blog-inuk, Uncategorized

ᑲᔪᖏᖅᓴᖅᑕᐅᓯᒪᔪᖓ ᐃᓅᒐᑦᑕ ᑲᑎᒪᓂᖓᓄᑦ − ᑖᓐᓇ ᓇᓗᓇᐃᒃᑯᑕᐅᕗᑦ ᑕᒪᑦᑎᓐᓄᑦ ᐃᓚᒋᔭᐅᓂᑦᑎᓐᓂᒃ ᐊᒻᒪᓗ ᓇᓗᓇᐃᖅᓯᓯᒪᓪᓗᑕ ᐃᖅᑲᓇᐃᔭᖃᑎᒌᒍᒪᓂᑦᑎᓐᓂ ᐱᐅᖅᓱᐊᖅᑕᐅᓂᑐᐃᓐᓇᖓᓂᐅᓐᖏᑦᑐᒥᒃ ᑭᓯᐊᓂᑦᑕᐅᖅ ᓴᐳᔾᔨᔭᐅᓯᒪᓗᓂ ᐊᒻᒪᓗ ᓴᓐᖏᔫᓗᓂ  ᐅᖃᐅᓯᕗᑦ.  

ᐅᖃᐅᓯᕗᑦ ᐱᐅᔪᒻᒪᕆᒃ. ᐅᖃᐅᓯᑐᐃᓐᓇᐅᓐᖏᑦᑐᑦ ᐅᕝᕙᓘᓐᓃᑦ ᐅᖃᐅᓯᕐᓂᑦ ᐋᖅᑭᒃᓱᖅᓯᒪᓂᑐᐃᓐᓇᐅᓐᖏᓪᓗᑎᓪᓗ.  ᑭᓇᐅᓂᑦᑎᓐᓄᑦ ᐊᑕᔪᖅ.   ᓂᐱᒋᔭᐅᖕᒥᔪᖅ ᐃᓕᖅᑯᓯᑦᑎᓐᓂᒃ ᐊᒻᒪᓗ ᓂᐱᒋᔭᐅᓪᓗᓂ ᖃᒧᑎᒃ ᐃᖏᕐᕋᑎᓪᓗᒍ ᐊᐳᑎᒃᑯᑦ, ᐅᕝᕙᓘᓐᓃᑦ ᖁᕕᐊᒋᔭᐅᓂᖓᓂᒃ ᐊᖑᓇᓱᖕᓂᕐᒥᒃ ᐊᒻᒪᓗ ᓇᑦᓯᐅᑉ ᓂᕿᐊᓂᒃ ᒥᓇᖅᓯᓂᕐᒧᑦ.

ᐊᓯᔾᔨᖅᐸᓪᓕᐊᓪᓗᓂ ᐊᒻᒪ ᐱᕈᖃᑕᐅᕙᓪᓕᐊᓪᓗᓂ ᐅᕙᑦᑎᓐᓂ, ᓴᖅᑭᔮᖅᑎᑦᑎᓪᓗ ᖃᓄᖅ ᐊᑑᑎᒋᔭᐅᓂᖓᓂᒃ ᐃᓅᓯᕐᒥᒃ ᖃᐅᑕᒫᖅᓯᐅᑎᓂᒃ.  ᓂᐱᒋᔭᐅᔪᖅ ᓄᓇᑦᑎᓐᓂ ᐃᓕᖅᑯᓯᑦᑎᓐᓂ ᐊᒻᒪ ᐃᓚᒌᖑᔪᓄᑦ.  ᓴᓐᖏᔫᖃᑕᐅᔪᖅ ᐅᕙᑦᑎᑐᑦ.  

ᑖᓐᓇ ᓄᓇᕐᔪᐊᕐᒥ ᐊᕐᕌᒍᒋᔭᐅᖕᒪᑦ ᓄᓇᖃᖅᑐᑐᖃᐃᑦ ᐅᖃᐅᓯᖏᓐᓂᒃ.  ᐃᓄᒃᑎᑐᑦ, ᐅᖃᐅᓯᑐᖃᕗᑦ, ᐅᖃᐅᓯᑐᖃᐅᖕᒪᑦ ᑲᓇᑕᒥ.  ᐃᓕᓴᕆᔭᐅᓯᒪᓪᓗᓂ ᐅᖃᐅᓯᐅᓂᖓᓂᒃ ᓄᓇᕗᒥ ᓄᓇᑦᓯᐊᕐᒥᓗ.  ᐅᖃᐅᓯᕗᑦ ᑲᓇᑕᐅᑉ ᐃᓅᖃᑎᒌᖑᔪᓄᑦ ᑐᓂᓯᓯᒪᖃᑕᐅᔪᖅ ᖃᓄᖅ ᐱᒻᒪᕆᐅᑎᒋᖕᒪᖔᑦ.  

ᓄᓇᕗᒥ, 89%ᑎᖏᑦ ᐃᓄᐃᑦ ᐃᓄᒃᑑᖅᑐᑦ.  ᑖᓐᓇ ᐅᖓᑖᓃᑦᑐᖅ 26,000ᖑᔪᓂᒃ ᐅᖃᐅᓯᖃᖅᑐᑦ 30,000ᖑᑎᓪᓗᒋᑦ ᐃᓄᐃᑦ. ᐅᖃᐅᓯᕗᑦ ᐱᒻᒪᕆᐅᕗᖅ ᐊᒻᒪᓗ ᖁᕕᐊᓲᑎᒋᔭᐅᒋᐊᖃᖅᖢᓂ.

ᐱᒻᒪᕆᐅᑎᓪᓗᒍ ᖁᕕᐊᓲᑎᒋᓗᒍ ᐅᖃᐅᓯᕗᑦ, ᐃᖅᑲᐅᒪᒋᐊᖃᕐᒥᔭᕗᑦ ᒫᓐᓇᓵᖑᓚᐅᖅᑐᒥᒃ ᑕᐃᔅᓱᒪᓂ ᖃᓄᐃᓕᐅᕐᓂᑰᓯᒪᔪᓂᒃ, ᐃᖅᑲᐅᒪᓪᓗᖓ ᖃᓄᖅ ᐱᐅᓐᖏᑦᑐᒥᒃ ᐊᒃᑐᐃᓚᐅᖅᓯᒪᑎᓪᓗᒋᑦ ᒐᕙᒪᒃᑯᑦ ᐊᑐᐊᒐᖏᑦ ᐊᒻᒪᓗ ᑲᓇᑕᒥ ᐅᕙᑦᑎᓄᑦ ᐊᑐᖅᓕᖅᑕᐅᓇᓱᓛᐅᖅᓯᒪᔪᓂᒃ ᐃᓄᒃᑎᑑᕐᓂᖅ ᐱᔾᔪᑎᒋᓪᓗᒍ ᓄᓇᑦᑎᓐᓂ.  ᑕᒪᒃᑯᐊ ᐱᐅᓐᖏᑦᑐᒥᒃ ᐊᒃᑐᕈᑎᒋᔭᐅᓚᐅᖅᑐᑦ ᑎᑎᕋᖅᑕᐅᓯᒪᔪᑦ ᐱᓕᕆᐊᖏᓐᓂᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓂ, ᐊᒻᒪᓗ ᑕᒪᒃᑯᐊ ᑕᐃᒪ ᐅᓂᒃᑳᖑᖃᑦᑕᖅᑎᓪᓗᒋᑦ ᐊᑐᖅᑕᐅᕙᓚᐅᖅᑐᓂᒃ ᑐᓐᖓᕕᒋᔭᐅᕗᑦ ᕿᑭᖅᑕᓃᒃᑯᑦ ᐱᓕᕆᐊᕆᔭᖏᓐᓄᑦ.  

ᐅᐱᒍᓱᒻᒪᕆᒃᑐᖓ ᒫᓐᓇᓵᖅ ᑲᔪᓯᒍᑎᒋᓯᒪᔭᑦᑎᓐᓂᒃ ᕿᑭᖅᑕᓃᒃᑯᓐᓂ, ᐱᓗᐊᖅᑐᒥᒃ ᑖᒃᑯᐊ ᐱᓕᕆᐊᕗᑦ ᐃᑲᔪᕈᑎᒋᔭᐅᔪᓐᓇᖅᑐᓂᒃ ᓴᓐᖏᓕᖅᑎᑦᑎᓂᕐᒥᒃ ᐅᖃᐅᓯᑦᑎᓐᓂ ᐃᓕᖅᑯᓯᑦᑎᓐᓂᓗ.

ᐋᔩᕋᕋᓗᐊᖅᑎᓪᓗᑕ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᒃᓴᖏᓐᓄᑦ ᐊᖏᕈᑎᒥᒃ ᓴᖅᑭᑎᑦᑎᓇᓱᐊᖅᖢᑕ ᑲᓇᑕᒥ ᐃᒪᕐᒥᐅᑕᓂ ᓴᐳᔾᔨᕕᖕᒥ, ᐅᕝᕙᓘᓐᓃᑦ ᐋᖅᑭᒋᐊᖅᑕᐅᓇᔭᖅᐸᑦ ᐊᖏᕈᑎᐅᔪᑦ ᐅᔭᕋᕐᓂᐊᕐᕕᓕᕆᔨᒃᑯᓐᓂᑦ, ᐃᖅᑲᐅᒪᐃᓐᓇᖃᑦᑕᖅᑐᒍᑦ ᖃᓄᖅᑑᕈᑎᖃᕆᐊᖃᕐᓂᖓᓂᒃ ᓴᓐᖏᓕᖅᑎᑦᑎᓂᐊᖅᑐᒥᒃ ᐅᖃᐅᓯᑦᑎᓐᓂ ᐃᓕᖅᑯᓯᑦᑎᓐᓂᓗ.  

ᐊᕐᕌᒍᑦ 4ᓂ ᖄᖏᖅᓯᒪᔪᓂᒃ, ᕿᑭᖅᑕᓃᒃᑯᑦ ᐱᓕᕆᐊᖃᖅᓯᒪᔪᑦ ᓱᕈᓯᓛᓂ ᐃᓕᓐᓂᐊᖅᑎᑦᑎᓂᕐᒥᒃ ᐊᒻᒪᓗ ᐸᐃᕆᕕᓕᓂᕐᒥᒃ ᐅᖃᐅᓯᑦᑎᓐᓂ ᐊᑐᕐᓗᑎ ᐅᑭᐅᑭᓐᓂᖏᓐᓂᒃ ᐱᒻᒪᕆᐅᕗᖅ ᐆᒪᑎᑕᐅᓂᖏᓐᓂ ᓄᓇᓕᕗᑦ ᐃᓕᖅᑯᓯᕗᓪᓗ.

ᓱᕈᓯᓛᑦ ᐅᑭᐅᑭᑦᑑᓗᑎᒃ ᐃᓕᓐᓂᐊᖃᑦᑕᖅᑎᓪᓗᒋᑦ ᐱᒻᒪᕆᐅᔪᖅ ᐱᕙᓪᓕᐊᔾᔪᑎᒋᓂᐊᖅᑕᖏᓐᓂᒃ ᐱᕈᖅᐸᓪᓕᐊᑎᓪᓗᒋᑦ ᐃᓅᓯᖏᓐᓂᒃ ᐊᑐᐃᓐᓇᕈᓐᓇᕐᓂᐊᖅᑕᖏᓐᓂᒃ, ᓱᕐᓗ ᐅᖃᓕᒫᕐᓂᖅ, ᐃᓚᐅᑦᑎᐊᖃᑦᑕᕐᓂᖅ ᐃᓕᓐᓂᐊᕐᓂᕐᒥᒃ, ᐊᒻᒪᓗ ᐋᓐᓂᐊᖅᑕᐃᓕᓂᒃᑯᑦ ᐃᓅᓯᖃᕋᓱᐊᕐᓂᕐᒥᒃ.  ᑕᐃᒫᒃ, ᑕᒪᒃᑯᐊ ᐃᓕᔭᐅᔪᑦ ᓱᕈᓯᓚᓄᑦ ᐅᑭᐅᓂᐊᖅᑐᒥᒃ ᐃᑲᔫᑎᒋᔭᐅᔪᓐᓇᖅᑐᓄᑦ ᓱᕐᓗ ᐃᓕᓐᓂᐊᕐᓂᕐᒥᒃ ᑲᔪᓯᑦᑎᐊᕈᓐᓇᕐᓂᖅ ᐊᒻᒪᓗ ᓯᕗᓂᕐᒥᒃ ᐃᖅᑲᓇᐃᔮᒃᓴᖃᑦᑎᐊᕈᓐᓇᕐᓂᖅ.  

ᖁᕕᐊᓱᑦᑐᖓ ᓂᓪᓕᐊᔾᔪᑎᒋᒍᒃᑭᑦ ᐃᓕᔅᓯᓐᓂ ᕿᑭᖅᑕᓃᒃᑯᑦ ᐱᓕᕆᐊᕆᓯᒪᔭᖏᓐᓂᒃ ᐊᕐᕌᒍᓂ ᖄᖏᖅᓯᒪᔪᓂᒃ, ᐱᓗᐊᖅᑐᒥᒃ ᐱᓕᕆᐊᒃᓴᕗᑦ ᓴᖅᑭᑎᓯᒪᔭᕗᑦ ᑐᕌᖓᔪᓂᒃ ᓱᕈᓯᓛᑦ ᐃᓕᓐᓂᐊᕐᓂᖏᓐᓄᑦ ᐊᒻᒪᓗ ᐸᐃᕆᕕᓕᕆᓂᖅ, ᐊᒻᒪᓗ ᐅᖃᐅᓯᕆᓚᐅᓐᖏᑎᓪᓗᒋᑦ, ᐅᖃᐅᓯᖃᖃᐃᓐᓇᕈᒪᓪᓗᖓ ᐱᓕᕆᐊᕆᔭᑦᑎᓐᓂᒃ ᐱᓪᓗᒍ ᐅᖃᐅᓯᓕᕆᓂᕐᒥᒃ ᐃᑲᔪᖅᑐᓂᒃ.  

ᒫᓐᓇ, ᕿᑭᖅᑕᓃᒃᑯᑦ ᑮᓇᐅᔭᓂᒃ ᐊᑐᕐᓂᖅᓴᐅᕙᓪᓕᐊᔪᑦ ᑮᓇᐅᔭᓂᒃ ᐱᓕᕆᐊᓄᑦ ᐃᑲᔪᖅᑐᓂᒃ ᐃᓕᖅᑯᓯᑦᑎᓐᓂᒃ ᐅᖃᐅᓯᑦᑎᓐᓂᓗ.

ᑮᓇᐅᔭᖃᖅᑎᑦᑎᕙᑦᑐᒍᑦ ᓄᓇᓕᖕᓂᑦ ᐊᐅᓚᑦᑎᔪᓐᓇᕐᓂᐊᕐᒪᑕ ᓇᖕᒥᓂᖅ ᐱᓕᕆᐊᕆᔪᒪᔭᖏᓐᓂᒃ, ᐃᓅᓱᒃᑐᑦ ᐃᓕᓐᓂᐊᖅᑎᑕᐅᓪᓗᑎᒃ ᐃᓕᖅᑯᓯᐅᑉ ᒥᒃᓵᓄᑦ ᐊᒻᒪᓗ ᐅᖃᐅᓯᕐᒥᒃ ᐃᓐᓇᕐᓂᑦ.  

ᑮᓇᐅᔭᓂᒃ ᐊᑐᖅᑐᒍᑦ ᐱᓕᕆᐊᒃᓴᓄᑦ ᐱᔭᐅᔪᒪᔪᓄᑦ ᕿᑭᖅᑕᓂᕐᒥᐅᓂ ᐃᓄᖕᓄᑦ.  

ᐊᓯᖏᑦᑎᑐᑦ ᑮᓇᐅᔭᓕᐅᖅᑎᐅᓐᖏᑦᑐᓂᒃ ᓄᓇᖃᖅᑐᑐᖃᓂ ᑭᒡᒐᖅᑐᐃᓲᓂᒃ ᑎᒥᐅᔪᓂᒃ ᑲᓇᑕᒥ, ᑐᒃᓯᕋᐅᑎᓕᐅᖃᑦᑕᖅᑐᒍᑦ − ᐊᒥᓱᓂᒃ ᑐᒃᓯᕋᐅᑎᓕᐅᖅᖢᑕ − ᑮᓇᐅᔭᖅᑖᕋᓱᒃᖢᖓ ᐃᑲᔪᕈᑎᒋᔭᐅᔪᓐᓇᖅᑐᓂᒃ ᐃᓕᖅᑯᓯᕐᒥᒃ ᐅᖃᐅᓯᕐᒥᓗ.  

ᐃᓛᒃ ᑮᓇᐅᔭᓂᒃ ᐊᑐᒃᑲᓐᓂᕐᓂᖅᓴᐅᑎᓪᓗᑕ ᑕᐃᔅᓱᒪᓂᐅᖓᓐᓂᑦ, ᓱᓕ ᐊᒥᒐᓗᐊᖅᑐᑦ.  

ᒥᓕᔭᓂᒃ ᑮᓇᐅᔭᓂᒃ ᐊᕐᕌᒍᑕᒫᑦ ᐊᑐᖅᑕᑦᑎᓐᓂ ᐱᓕᕆᐊᒃᓴᓄᑦ ᒥᑭᔪᑯᓗᒃ ᐃᓱᒪᒋᓪᓗᒍ ᒐᕙᒪᒃᑯᑦ ᑮᓇᐅᔭᖅᑑᑎᒃᓴᕆᔭᖏᓐᓂᑦ, ᐊᒻᒪᓗ ᒥᑭᔪᑯᓘᓪᓗᓂ ᐊᑐᖅᑕᐅᒋᐊᖃᕋᓗᐊᖅᑐᓂᒃ ᐊᓯᔾᔨᖅᑕᐅᒋᐊᖃᕋᔭᖅᑐᓂᒃ ᐅᖃᐅᓯᕐᒥ ᐸᐸᑦᑏᓐᓇᕈᓐᓇᕐᓂᕐᒥᒃ.  ᑮᓇᐅᔭᕗᑦ ᓈᒻᒪᓐᖏᑦᑐᑦ ᓇᓗᓇᐃᖅᓯᒍᑎᖃᕐᓂᐊᕐᓗᓂ ᑖᒃᑯᐊ ᕿᑐᕐᖓᕗᑦ ᐱᕈᖅᐸᓪᓕᐊᔪᓐᓇᕐᓂᐊᕐᓗᑎᒃ ᐅᖃᕈᓐᓇᑦᑎᐊᕐᓗᑎᒃ ᐅᖃᐅᓯᑦᑎᓐᓂ.  

ᑕᐃᒪᐃᒃᑲᓗᐊᖅᑎᓪᓗᒍ, ᐊᑐᑦᑎᐊᕋᓱᖃᑦᑕᖅᑕᕗᑦ ᑮᓇᐅᔭᖁᑎᒋᔭᕗᑦ, ᖃᓄᓕᒫᖅ ᐃᑲᔪᕋᓱᒃᑎᓪᓗᑕ ᐃᓄᐃᑦ ᐅᖃᐅᓯᖓᓂ ᐃᓕᖅᑯᓯᖓᓂᓗ.

ᕿᑭᖅᑕᓃᒃᑯᑦ ᑲᑎᒪᔨᖏᑦ ᐃᖅᑲᓇᐃᔭᖅᑎᖏᓪᓗ ᓯᕗᓪᓕᖅᐸᐅᑎᑦᑎᒍᒪᓚᐅᕐᒪᑕ ᐃᑲᔪᖅᑐᐃᖁᔨᓪᓗᑎᒃ ᐸᐃᕆᕕᓕᕆᓂᕐᒥᒃ ᐱᔾᔪᑎᖃᖅᖢᑎᒃ ᐱᒻᒪᕆᐅᓂᖓᓄᑦ ᐃᓅᓯᕐᒧᑦ, ᐃᓕᖅᑯᓯᕐᒧᑦ ᐊᒻᒪᓗ ᐃᓕᓐᓂᐊᕐᓂᕐᒧᑦ ᐱᕙᓪᓕᐊᓂᖏᓐᓄᑦ ᓱᕈᓰᑦ.  ᑕᒪᒃᑯᐊ ᑕᕝᕙ ᐱᔾᔪᑎᒋᔭᐅᓪᓗᑎᒃ, ᓇᓗᓇᐃᖅᓯᓯᒪᔪᒍᑦ ᓴᓂᕐᕙᐃᓯᒪᓪᓗᑕ ᑮᓇᐅᔭᓂᒃ ᐃᑲᔪᕈᑎᒋᔭᐅᓂᐊᖅᑐᓄᑦ ᐸᐃᕆᕕᓕᕆᓂᕐᒧᑦ ᐊᒻᒪᓗ ᐃᓚᒌᓂ ᒥᑭᔪᓂᒃ ᕿᑐᕐᖓᓕᖕᓄᑦ ᕿᑭᖅᑕᓂ ᓄᓇᓕᖕᓂ.  

2017ᒥ, ᕿᑭᖅᑕᓃᒃᑯᑦ ᓴᖅᑭᑎᑦᑎᓚᐅᕐᒪᑕ ᐃᑲᔫᓯᐊᒃᓴᓄᑦ ᑮᓇᐅᔭᓂᒃ, ᐃᑲᔫᑎᒃᓴᕆᔭᐅᓂᐊᖅᖢᑎᒃ ᐃᓅᓯᕐᒧᑦ ᐃᓕᖅᑯᓯᕐᒧᓗ ᐱᓕᕆᐊᒃᓴᓄᑦ.  ᑖᒃᑯᓇᓐᖓᑦ ᑮᓇᐅᔭᖅᑖᖅᑎᓪᓗᒋᑦ, ᕿᑭᖅᑕᓃᒃᑯᑦ ᓴᖅᑎᑦᑎᔪᓐᓇᓚᐅᖅᑐᑦ ᕿᑐᕐᖓᓕᖕᓄᑦ ᐃᑲᔫᑎᒥᒃ.   2017ᒥᑦ 2020ᒧᑦ, ᑖᒃᑯᐊ ᕿᑐᕐᖓᓕᖕᓄᑦ ᐃᑲᔫᑎᑦ ᑮᓇᐅᔭᓂᒃ ᐊᑐᖅᓯᒪᓂᐊᖅᑐᑦ $1.5 ᒥᓕᔭᓂᒃ ᑮᓇᐅᔭᓂᒃ ᕿᑐᕐᖓᓕᖕᓄᑦ ᓚᐃᓴᓐᓯᓕᖕᓂᑦ ᐸᐃᕆᕕᖕᒦᑎᑦᑎᕙᒃᑐᓂᒃ ᐃᒃᐱᐊᕐᔪᒥᓅᖅᓯᓂᐊᖅᑐᑦ. ᕿᑭᖅᑕᓃᒃᑯᑦ ᑲᑎᒪᔨᖏᑦ ᒫᓐᓇᓵᖅ ᓂᕈᐊᓚᐅᖅᑐᑦ ᐅᐃᒍᒋᐊᖅᓯᖁᔨᓪᓗᑎᒃ ᑕᔅᓱᒥᖓ ᐱᓕᕆᐊᕐᒥ ᑎᑭᓪᓗᒍ 2022ᒧᑦ.

2017ᒥ, ᕿᑭᖅᑕᓃᒃᑯᑦ ᑐᓴᓚᐅᕐᒥᔪᑦ ᐸᐃᕆᕕᖕᓂᑦ ᐊᐅᓚᑦᑎᔨᓂᑦ ᐃᖅᑲᓇᐃᔭᖅᑎᒋᔭᐅᔪᓂᓗ ᐃᑲᔫᑎᒃᓴᖅᑖᒃᑲᓐᓂᕈᒪᓪᓗᑎᒃ ᐃᓕᖅᑯᓯᓕᕆᓂᕐᒧᑦ ᐊᑐᕈᓐᓇᕐᓂᐊᖅᑐᓂᒃ.  ᑕᐃᒪᐃᒻᒪᑦ ᖃᓄᖅᑑᕆᐊᓕᓚᐅᖅᐳᒍᑦ ᐃᖅᑲᓇᐃᔭᖃᑎᒋᓪᓗᒋᑦ ᑲᑐᔾᔨᖃᑎᒋᔭᕗᑦ ᐃᓐᕼᐋᐱᑦ ᒦᑎᐊᒃᑯᑦ ᓄᑖᓂ ᐅᖃᓕᒫᒐᓂᒃ ᐊᒻᒪᓗ ᐱᓐᖑᐊᓂᒃ ᓴᖅᑭᑎᑦᑎᖁᓪᓗᒋᑦ ᖁᕕᐊᓲᑎᒋᔭᐅᓂᐊᕐᒪᑕ ᐃᓕᖅᑯᓯᑦᑎᓐᓂ.

ᑮᓇᐅᔭᖃᖅᑎᑦᑎᓚᐅᕐᒥᔪᒍᑦ ᐱᕙᓪᓕᐊᑎᑦᑎᒍᑕᐅᓂᐊᖅᑐᓂᒃ ᐅᖃᓕᒫᕆᐅᖅᓴᕈᑎᓂᒃ ᑎᑎᕋᕆᐅᖅᓴᕈᑎᓂᓗ, ᓱᕈᓰᑦ ᑐᓐᖓᕕᖃᑦᑎᐊᕈᓐᓇᕐᓂᐊᕐᒪᑕ ᐅᖃᐅᓯᓕᕆᓂᕐᒥᒃ.  ᑖᒃᑯᐊ ᓄᑖᑦ ᐃᑲᔫᑎᑦ ᐸᐃᕆᕕᖕᓅᖅᑕᐅᓂᐊᖅᑐᑦ ᑕᖅᑭᐅᔪᓂᒃ ᖃᐃᔪᓄᑦ.

ᕿᑭᖅᑕᓃᒃᑯᓐᓂ, ᐱᒻᒪᕆᐅᑎᑕᕗᑦ ᑲᑐᔾᔨᖃᑎᒋᓂᕆᔭᕗᑦ ᐊᒻᒪᓗ ᐃᓱᒪᓕᐅᑦᑎᐊᓲᖑᓪᓗᑕ ᑭᓇᒃᑯᓐᓂ ᑲᑐᔾᔨᖃᑎᖃᕐᓂᐊᕆᐊᒃᓴᑦᑎᓐᓂ ᑕᒪᒃᑯᐊ ᐱᕕᓴᕗᑦ ᑮᓇᐅᔭᕗᓪᓗ ᐊᖏᓂᖅᐹᒃᑯᑦ ᐃᑲᔪᕐᓂᖃᖁᓪᓗᒋᑦ ᕿᑭᖅᑕᓂ ᓄᓇᓕᖕᓂ ᐃᓄᖕᓄᑦ ᐊᒻᒪᓗ ᑲᔪᓯᑦᑎᐊᕈᓐᓇᖁᓪᓗᒋᑦ.

ᐊᑯᓂᐅᔪᒥᒃ ᑲᑐᔾᔨᖃᑎᒋᓯᒪᓕᖅᑕᕗᑦ ᑖᒃᑯᐊ ᐃᓐᕼᐊᐱᑦ ᒦᑎᐊᒃᑯᑦ.  ᖁᓕᓂ ᐊᕐᕌᒍᓄᑦ ᑲᑐᔾᔨᖃᑎᒋᓕᖅᑕᕗᑦ ᐱᒋᐊᕈᑎᑦᑎᐊᕙᐃᑦ ᐱᓕᕆᐊᖏᓐᓂᒃ.  ᐃᑲᔪᖅᑐᐃᖏᓐᓇᖅᓯᒪᔪᑦ ᑕᑯᓐᓇᓐᖑᐊᖅᑕᑦᑎᓐᓂ ᐊᒻᒪᓗ ᐃᑲᔪᖅᓯᒪᓪᓗᑎᒃ ᐃᓱᒪᒋᔭᕗᑦ ᐱᓐᖑᖅᑎᑕᐅᓂᖏᓐᓄᑦ.  

ᐅᖃᓕᒫᒐᐃᑦ ᓴᖅᑭᑕᐅᖃᑦᑕᑕᖅᓯᒪᔪᑦ ᐱᒋᐊᕈᑎᑦᑎᐊᕙᐃᑦ ᐊᑐᖅᖢᒍ − ᑮᓇᐅᔭᖃᖅᑎᑕᐅᓯᒪᔪᑦ ᒐᕙᒪᑐᖃᒃᑯᑦ ᓄᓇᖃᖅᑐᑐᖃᐃᑦ ᐅᖃᐅᓯᖏᓐᓂᒃ ᐱᒋᐊᕈᑎᓂᒃ − ᐃᓕᓐᓂᐊᕐᕕᓕᒫᓄᑦ ᐸᐃᕆᕕᓕᒫᓄᓪᓗ ᑐᓂᔭᐅᓯᒪᔪᑦ ᕿᑭᖅᑕᓂ ᓄᓇᓕᖕᓂᑦ.  ᑖᒃᑯᐊ ᐅᖃᓕᒫᒐᐃᑦ ᐊᑐᐃᓐᓇᐅᖕᒥᔪᑦ ᖃᕆᓴᐅᔭᒃᑯᑦ ᐳᖅᑲᖅᑕᐅᕙᓪᓕᐊᒍᓐᓇᖅᑐᓂᒃ ᑕᕝᕙᓐᖓᑦ ᓄᓇᕗᒥ ᐊᑕᐅᓯᐅᓐᖏᑦᑐᒥᒃ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᕐᓂᓕᕆᓂᐅᑉ ᐃᑭᐊᖅᑭᕕᐊᓂᑦ.

ᐱᒻᒪᕆᐅᔪᖅ ᐅᕙᓐᓄᑦ ᐃᑲᔪᖅᑐᐃᓂᑦᑎᓐᓂᒃ ᓄᓇᓕᖕᓂᑦ ᐱᕙᓪᓕᐊᑎᑦᑎᓂᕐᒥᒃ ᐃᓄᐃᑦ ᐱᔪᒪᔭᖏᓐᓂᒃ.  ᑕᕝᕘᓇ ᐱᒋᐊᕈᑎᑦᑎᐊᕙᒃᑯᑦ, ᕿᑭᖅᑕᓃᒃᑯᑦ ᐃᑲᔪᖅᓯᒪᒻᒥᔪᖅ ᓄᓇᕗᒥ ᐅᖃᓕᒫᒐᓕᐅᖅᑎᑐᐊᖓᓐᓄᑦ ᐊᒻᒪᓗ ᐃᑲᔪᖃᑦᑕᖅᓯᒪᓪᓗᑎᒃ ᐅᖃᓕᒫᒐᓕᐅᖅᑎᐅᔪᓂᑦ ᐅᖃᐅᓯᑦᑎᓐᓂ ᓄᓇᕗᒥ.

ᐃᓚᒋᔭᖓᑦᑕᐅᖅ ᑲᑐᔾᔨᖃᑎᒋᔭᕗᑦ ᑖᒃᑯᐊ ᒪᑭᒋᐊᖅᑕᒃᑯᑦ.  ᒪᕐᕉᓂᒃ ᐊᕐᕌᒍᓂ ᖄᖏᖅᓯᒪᔪᓂᒃ ᒪᑭᒋᐊᖅᑕᒃᑯᑦ ᑮᓇᐅᔭᖃᖅᑎᑦᑎᔪᓐᓇᓚᐅᖅᑐᖅ ᕿᑭᖅᑕᓃᒃᑯᓐᓂ, ᑮᓇᐅᔭᐃᑦ ᐊᑐᖅᑕᐅᓂᐊᖅᖢᑎᒃ ᐊᔾᔨᒌᓐᖏᑦᑐᓂᒃ ᐱᓕᕆᐊᒃᓴᓄᑦ ᓴᓐᖏᓕᖅᑎᑦᑎᒍᑕᐅᓂᐊᖅᑐᓂᒃ ᐃᑲᔪᕐᓂᐊᖅᑐᓂᓗ ᐸᐃᕆᕕᖕᓂ ᕿᑭᖅᑕᓂ ᓄᓇᓕᖕᓂᑦ.  ᑖᒃᑯᐊ ᐱᓕᕆᐊᒃᓴᑦ ᐱᕈᖅᐸᓪᓕᐊᒍᓐᓇᖅᓯᖁᔭᕗᑦ ᐊᒻᒪᓗ ᐅᐃᒍᒋᐊᖅᑕᐅᓗᑎᒃ ᐊᕐᕌᒍᓂ ᖃᐃᕙᓪᓕᐊᓂᐊᖅᑐᓄᑦ.  

ᑖᒃᑯᐊ ᒪᑭᒋᐊᖅᑕᒃᑯᓐᓂᑦ ᑮᓇᐅᔭᐃᑦ ᐅᑯᓂᖓ ᐊᑐᖅᓯᒪᔪᑦ, ᕿᑭᖅᑕᓃᒃᑯᑦ

ᕿᑭᖅᑕᓃᒃᑯᑦ ᐱᓕᕆᐊᖏᑦ ᑲᑐᔾᔨᖃᑎᒋᔭᐅᑎᓪᓗᒋᑦ ᐃᓐᕼᐊᐱᑦ ᒦᑎᐊᒃᑯᑦ ᐊᒻᒪ ᒪᑭᒋᐊᖅᑕᒃᑯᓪᓗ ᐃᑲᔪᖅᑕᐅᓯᒪᒻᒥᔪᖅ ᒐᕙᒪᒃᑯᑦ ᐃᓕᓐᓂᐊᖅᑐᓕᕆᔨᒃᑯᖏᓐᓄᑦ, ᐃᑲᔪᖅᖢᑎᒃ ᑐᓂᐅᖅᑲᐃᓂᕐᒥᒃ ᑖᒃᑯᓂᖓ ᐃᑲᔫᑎᓂ ᕿᑭᖅᑖᓗᖕᒥ ᓄᓇᓕᐅᔪᓂᒃ ᐊᒻᒪᓗ ᓄᓇᕗᒥ ᐊᕕᒃᑐᖅᓯᒪᔪᖁᑎᖏᓐᓄᑦ.  

ᑕᒪᓐᓇ ᐊᖏᔪᒥᒃ ᐊᓯᔾᔨᖅᓯᒪᔪᖅ ᑕᐃᔅᓱᒪᓂᐅᖓᓐᓂᑦ, ᑖᒃᑯᐊ ᒐᕙᒪᒃᑯᑦ ᐱᓕᕆᕕᖏᑦ ᐃᑲᔪᖃᑦᑕᓗᐊᓚᐅᖅᓯᒪᓐᖏᑎᓪᓗᒋᑦ ᐃᓕᓐᓂᐊᕐᓂᓕᕆᓂᕐᒧᑦ ᐃᑲᔫᑎᓂᒃ, ᐊᒻᒪᓗ ᐅᐱᒍᓱᒃᑐᖓ ᑕᒪᒃᑯᐊ ᐱᓕᕆᐊᖑᔪᑦ ᑲᔪᓯᑎᓯᒪᔭᕗᑦ ᑲᑐᔾᔭᐅᓪᓗᑎᒃ ᐃᑲᔪᕐᓂᖃᕐᓂᐊᖅᑐᒃᓴᐅᕗᑦ ᖃᑭᒋᐊᖅᑎᑦᑎᓂᕐᒥᒃ ᐅᖃᐅᓯᑦᑎᓐᓂ ᐃᓕᖅᑯᓯᑦᑎᓐᓂᓗ ᓄᓇᕗᒥ.

ᐅᖃᐅᓯᖃᒃᑲᓐᓂᕈᒪᔪᖓ ᑲᑐᔾᔨᖃᑎᒋᔭᑦᑎᓐᓂᒃ − ᑖᒃᑯᐊ ᐱᕈᕐᕕᒃ ᐃᓕᓐᓂᐊᕐᓂᐊᓕᓵᖅᑐᓄᑦ ᐱᒋᐊᖅᑕᐅᓚᐅᖅᑐᒥᒃ ᒥᑦᑎᒪᑕᓕᖕᒥ.  ᕿᑭᖅᑕᓃᒃᑯᑦ ᐱᒋᐊᓕᓵᖅᑎᓪᓗᒋᑦ ᑖᒃᑯᐊ ᐱᕈᕐᕕᒃᑯᑦ ᑮᓇᐅᔭᑎᒍᑦ ᐃᑲᔪᓚᐅᖅᓯᒪᔪᑦ, ᐱᔾᔪᑎᖃᖅᖢᑎᒃ ᐊᑑᑎᖃᕐᓂᐊᕐᓂᖓᓄᑦ ᐃᔾᔨᐊᕆᔭᒃᓴᐅᔪᓐᓇᖅᖢᓂ ᐱᓪᓗᒍ ᐱᖃᓯᐅᑎᓯᒪᓂᖏᓐᓂᒃ ᐃᓄᐃᑦ ᖃᐅᔨᒪᔭᖏᓐᓂᒃ, ᐃᓄᐃᑦ ᐃᓕᖅᑯᓯᐊᓂᒃ, ᐊᒻᒪᓗ ᓱᕈᓯᓛᓂ ᐃᓕᓐᓂᐊᖅᑎᑦᑎᓂᕐᒧᑦ.  

ᕿᑭᖅᑕᓃᒃᑯᑦ ᑮᓇᐅᔭᖃᖅᑎᑦᑎᓚᐅᖅᑐᑦ ᑖᒃᑯᐊ ᐱᕈᕐᕕᒃᑯᑦ ᐱᓕᕆᐊᕆᓂᐊᖅᑕᖏᓐᓂᒃ ᓴᖅᑭᑎᑦᑎᑎᓪᓗᒋᑦ.

ᐃᑲᔪᓚᐅᕐᒥᔭᕗᑦ ᐃᓕᓴᖅᓯᕕᒃᑯᑦ ᑲᑐᔾᔨᖃᑎᒌᖏᑦ ᑲᖏᖅᑐᒑᐱᖕᒥ ᑕᒪᑐᒥᖓ ᐱᒋᐊᖅᐸᓪᓕᐊᒍᒪᓯᒪᑎᓪᓗᒋᑦ ᓄᓇᓕᖓᓂᒃ.  

ᐊᒻᒪᓗ, ᒫᓐᓇᒫᖅ ᑮᓇᐅᔭᖃᖅᑎᑦᑎᓯᒪᑎᓪᓗᑕ ᑲᑐᔾᔨᖃᑎᒋᓪᓗᒋᑦ, ᐃᑲᔪᖅᑐᓚᐅᕐᒥᔭᕗᑦ ᑖᒃᑯᐊ ᐱᕈᕐᕕᒃ ᑐᓂᓯᓯᒪᑎᓪᓗᒋᑦ ᐃᓱᒪᒋᔭᐅᖃᑕᐅᔪᒪᓪᓗᑎᒃ ᐅᑭᐅᖅᑕᖅᑐᒥ ᓵᓚᖃᐅᓯᐊᖑᔪᒥᒃ.

ᐱᕈᕐᕕᒃ ᐆᑦᑑᑎᑦᑎᐊᕙᐅᕗᖅ ᓄᓇᓕᖕᒥ ᓯᕗᒃᑲᐃᓂᕐᒥᒃ ᐊᒻᒪᓗ ᐊᔾᔨᐅᓐᖏᑦᑐᒃᑯᑦ ᐃᓱᒪᒋᔭᐅᓯᒪᓂᖓᓂᓪᓗ ᐊᒃᑐᐃᓂᖃᖅᓯᒪᖕᒪᑦ ᕿᑭᖅᑖᓗᓕᒫᒥ ᐊᒻᒪᓗ ᒫᓐᓇ, ᐃᓄᐃᑦ ᓄᓇᒋᔭᓕᒫᖏᓐᓄᑦ.  

ᕿᑭᖅᑕᓃᒃᑯᑦ ᐊᑐᖃᑦᑕᕐᒥᔪᑦ ᖃᕆᓴᐅᔭᒃᑯᑦ ᖃᐅᔨᒪᑎᑦᑎᓇᓱᐊᖅᖢᑎᒃ ᐃᓄᒃᑎᑐᑦ.  ᑖᓐᓇ ᐅᖃᐅᓯᓕᕆᔾᔪᑎᕗᑦ ᖃᐅᑕᒫᒃᑯᑦ ᓴᖅᑭᑕᐅᕙᑦᑐᒥᒃ ᕙᐃᔅᐳᒃᑯᑦ, ᐃᓐᓯᑎᒍᕌᒻᒪᒃᑯᑦ ᐊᒻᒪ ᑐᕕᑐᒃᑯᑦ, ᐱᕕᖃᖅᑎᑦᑎᔪᑦ ᓴᖅᑭᑎᑦᑎᔪᓐᓇᕐᓂᑦᑎᓐᓂᒃ ᐅᖃᐅᓯᕆᔭᒃᑯᑦ ᐃᓚᖃᖅᖢᑎᒃ ᓴᓇᓐᖑᐊᖅᑕᐅᓯᒪᔪᓂᒃ ᐃᓄᖕᓄᑦ ᑕᒪᒃᑯᐊ ᐊᒥᓱᓄᑦ ᐊᔾᔨᒌᓐᖏᑦᑐᓄᑦ ᑕᑯᔭᐅᕙᒃᖢᑎᒃ ᑲᓇᑕᒥ.  ᐃᓚᖏᑦ ᐃᓕᓯᒪᔭᕗᑦ ᖃᕆᓴᐅᔭᒃᑯᑦ ᐊᒥᓱᓄᑦ ᐱᐅᒋᔭᐅᓯᒪᔪᑦ, ᓇᓗᓇᓐᖏᑦᑐᖅ ᑖᓐᓇ ᖁᕕᐊᒋᔭᐅᓯᒪᓂᖓᓂᒃ.  ᓂᕆᐅᒋᔭᖃᓕᕐᒥᔪᒍᑦ ᐊᒥᓲᓂᖅᓴᓄᑦ ᐃᓄᖕᓄᑦ ᑕᑯᔭᐅᔪᓐᓇᖅᓯᓂᐊᕐᒪᑦ − ᐱᓗᐊᖅᑐᒥᒃ ᐃᓅᓱᒃᑐᓂ.  

ᐊᖅᑯᑎᒋᓪᓗᒍ ᑕᖅᑭᐅᓚᐅᖅᑐᒥᒃ ᐃᓄᒃᑎᑐᑦ ᐅᖃᐅᓯᐊ ᓵᓚᖃᖅᑎᑦᑎᒐᓱᐊᓚᐅᕋᑦᑕ ᐅᖃᓗᕋᐅᑎᓕᐅᕐᓂᕐᒥᒃ ᑕᒪᒃᑯᐊ ᖁᕕᐊᓲᑎᒋᒋᐊᖃᖅᖢᒋᑦ ᐃᓄᐃᑦ ᕿᑭᖅᑕᓂ ᓄᓇᓕᖕᓂᑦ ᐊᑕᐅᑦᓯᒃᑯᓪᓗ ᑲᔪᖏᖅᓴᐃᓂᕐᒥᒃ ᐃᓅᓱᒃᑐᓂ ᐊᑐᖃᑦᑕᖁᓪᓗᒋᑦ ᐅᖃᐅᓯᐊᓂ.

ᐃᓄᑑᔾᔨᒍᓐᓇᓐᖏᑦᑕᕗᑦ ᑖᒃᑯᐊ ᐱᓕᕆᐊᒃᓴᑦ.  ᑲᑐᔾᔨᒍᑕᐅᒋᐊᖃᖅᑐᖅ, ᑎᒥᐅᔪᓕᒫᑦ ᐱᓕᕆᕕᓕᒫᓪᓗ, ᐱᕙᓪᓕᐊᑎᑦᑎᓗᑎᒃ ᑎᒥᖁᑎᒋᔭᐅᔪᑦ ᓴᓐᖏᓂᕆᔭᖏᓐᓂᒃ, ᓯᕗᒧᐊᕈᑎᒋᔭᐅᑦᑎᐊᕈᓐᓇᕐᓂᐊᕐᒪᑦ ᐅᖃᐅᓯᑦᑎᓐᓂᒃ ᓴᐳᔾᔨᓂᕐᒥᒃ.

ᐱᔭᕇᖅᐸᓪᓕᐊᒍᑎᒋᓗᒍ, ᐊᑕᐅᓯᒃᑲᓐᓂᕐᒥᒃ ᐅᓂᒃᑳᒥ ᐅᖃᐅᓯᖃᕈᒪᕗᖓ ᐃᓕᔅᓯᓐᓄᑦ, ᑐᕌᖓᔪᓂᒃ ᑮᓇᐅᔭᐃ ᕿᑭᖅᑕᓃᒃᑯᑦ ᐱᕙᒃᑕᖏᓐᓂᒃ  ᐅᖃᓕᒫᒐᓂᒃ ᐊᒥᓱᓕᐅᖅᑎᑦᑎᒍᑕᐅᕙᒃᑐᓂᒃ.

ᐊᒃᓱᐊᓗᒃ ᐅᐱᒋᔭᕗᑦ ᑖᓐᓇ ᐱᒋᐊᕈᑎᑦᑎᐊᕙᓂ ᐱᓕᕆᐊᓂ, ᑭᓯᐊᓂ ᓈᒻᒪᓐᖏᓗᐊᖅᑐᒥᒃ ᐱᓕᕆᐊᖃᕋᓱᐊᖅᑐᒍᑦ ᑭᓪᓕᖃᖅᑎᑦᑎᔪᒥᒃ ᑮᓇᐅᔭᑎᒍ ᐊᒻᒪ ᐱᔪᓐᓇᕐᓂᕆᔭᑦᑎᒍᓪᓗ.  .

ᕿᑭᖅᑕᓃᒃᑯᑦ ᐱᓇᓱᖃᑦᑕᕐᒪᑕ ᑮᓇᐅᔭᓂᒃ, ᐊᒻᒪᓗ ᑐᓂᔭᐅᕙᒃᖢᑎᒃ ᓄᓇᖃᖅᑐᑐᖃᐃᑦ ᐅᖃᐅᓯᖓᓐᓂᒃ ᐱᒋᐊᕈᑎᒋᔭᐅᔪᓐᓇᖅᑐᓂᒃ ᖁᓕᓂ ᐊᕐᕌᒍᓂ.

ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᕙᒃᑐᑦ ᐃᑲᔪᕈᑎᒋᔭᐅᓪᓗᑎᒃ ᓄᑖᓂᒃ ᐅᖃᓕᒫᒐᓕᐅᕈᑕᐅᓪᓗᑎᒃ, ᐃᓚᒋᓪᓗᒍ ᓯᕗᓪᓕᖅᐹᖑᔪᒥᒃ ᐃᓄᒃᑎᑑᖅᑐᒥᒃ ᖃᓄᐃᓕᐅᕈᑕᐅᔪᓐᓇᖅᑐᓄᑦ ᐅᖃᓕᒫᒐᓂᒃ ᐱᐊᕋᕐᓄᑦ ᑐᕌᖓᔪᓂᒃ.  

ᑲᔪᓯᓯᒪᒐᓗᐊᖅᑐᒍᑦ ᑭᓯᐊᓂ ᑭᓪᓕᖃᕐᒥᔪᖅ ᐱᓪᓗᒍ ᑖᒃᑯᐊ ᑲᑐᔾᔨᖃᑎᒋᔭᕗᑦ, ᐊᒻᒪᓗ ᖃᓄᐃᓕᐅᕐᓂᕗᑦ ᐱᑦᑎᐊᖅᖢᑎᒍᑦ; ᑭᓯᐊᓂ ᑕᒪᓐᓇ ᐋᖅᑭᒋᐊᖅᑕᐅᒋᐊᖃᖅᑐᖅ.  

  • ᑖᓐᓇ ᐱᓕᕆᐊᖅ ᐊᐅᓚᑕᐅᓐᖏᑦᑐᖅ ᐃᓄᖕᓄᑦ.  .
  • ᐱᓇᓱᓲᖑᔪᑦ ᐊᕐᕌᒍᑕᒫᑦ ᖃᓪᓗᓈᓃᑦᑐᓄᑦ ᐊᒻᒪᓗ ᐅᑕᖅᑭᔭᐅᒋᐊᖃᓕᖅᖢᑎᒃ ᑐᓴᕐᕕᐅᓂᖏᓐᓄᑦ ᐊᖏᖅᑕᐅᒻᒪᖔᑦ.   
  • ᐊᓯᖏᓐᓂᑦ ᓄᓇᖃᖅᑐᑐᖃᐃᑦ ᑎᒥᖁᑎᖏᓐᓂᑦ ᓱᕐᓗ ᓵᓚᖃᕋᓱᐊᖃᑦᑕᐅᑎᔪᖅᑎᑐᑦ ᒥᑭᔪᓂᒃ ᑮᓇᐅᔭᖃᑎᒋᔭᐅᔪᓂᑦ.
  • ᐊᒻᒪᓗ  10ᓂ ᐊᕐᕌᒍᑦ ᖄᖏᖅᓯᒪᔪᓂᒃ, ᐊᖏᓂᖅᐹᖑᔪᓂᒃ ᑮᓇᐅᔭᖅᑖᕈᓐᓇᕐᓂᖅ ᐊᑕᐅᓯᕐᒧᑦ ᐱᓕᕆᐊᕐᒧᑦ ᐊᔾᔨᒌᓐᖏᓗᐊᖃᑦᑕᖅᓯᒪᖕᒪᑕ.  

ᑖᓐᓇ ᒫᓐᓇ ᐊᑐᖅᑕᐅᔪᖅ ᖃᓄᐃᓕᖓᓂᖓ ᓈᒻᒪᓐᖏᓗᐊᖅᑐᖅ, ᓇᓗᓇᖃᑦᑕᖅᖢᓂ ᐊᒻᒪᓗ ᐊᓯᔾᔨᕆᐊᖃᖅᖢᓂ.  

ᑮᓇᐅᔭᑎᒍᑦ ᐱᑕᖃᓐᖏᓈᕐᓂᐅᔪᑦ ᐃᓄᒃᑎᑑᒻᒧᑦ ᐱᔪᒪᔭᐅᔪᓂᒃ ᐊᒻᒪᓗ ᐃᑲᔪᑎᒋᔭᐅᔪᓐᓇᖅᑐᓂᓗ ᐊᔾᔨᒌᑎᑦᑎᓐᖏᓗᐊᕐᒪᑕ.

ᑖᒃᑯᐊ ᐃᓄᐃᑦ ᑕᐱᕇᒃᑯᑦ ᐊᒻᒪ ᓄᓇᕗᑦ ᑐᓐᖓᕕᒃᑯᓪᓗ ᓇᓗᓇᐃᖅᓯᑎᓪᓗᒋᑦ, ᒪᓕᒃᖢᒋᑦ ᐊᖑᕈᑎᒋᔭᐅᓯᒪᔪᑦ 2017-2020ᒧᑦ, ᑲᓇᑕ − ᓄᓇᕗᑦ ᐊᖏᕈᑎᖓ ᐅᐃᕖᑎᑐᒻᒥ ᐊᒻᒪᓗ ᐃᓄᒃᑎᑐᑦ ᐅᖃᓯᖓ, ᒥᑭᓐᓂᖅᓴᐅᔪᖅ ᑐᓂᔭᐅᕙᒃᑐᓂ ᐅᐃᕖᑦ ᐅᖃᐅᓯᐊᓄᑦ ᓱᕐᓗ  $8,000ᖑᔪᑦ ᑐᓂᔭᐅᕙᑦᑐᑦ ᐊᑐᓂ ᐅᐃᕖᑎᑐᑦ ᐅᖃᓕᒫᓱᓄᑦ ᐃᓱᒪᒋᓪᓗᒍ ᐅᖃᓕᒫᓱᓂᑦ ᐃᓄᒃᑐᑦ  $186 ᑕᓚᑐᐃᓐᓇᖅ ᐊᑕᐅᓯᕐᒧᑦ ᐃᓄᒃᑑᖅᑐᒥᒃ ᐊᕐᕌᒍᑕᒫᖅ ᑐᓂᓯᕙᒃᖢᑎᑦ.

ᑕᒪᓐᓇ ᓈᒻᒪᓐᖏᓗᐊᖅᑐᖅ ᐊᔾᔨᒌᓐᖏᑎᑦᑎᓗᐊᖅᑐᖅ.  ᐱᔨᑦᓯᓐᖏᑦᑐᖅ ᐃᓄᖕᓂ. ᑕᒪᓐᓇ ᐋᖅᑭᐅᒪᓂᕆᔭᖓᑦ ᑮᓇᐅᔭᖃᖅᑎᑦᑎᓐᖏᓗᐊᖅᑐᖅ ᐃᓄᒃᑎᑐᒻᒥᒃ.  ᓴᓐᖐᓕᖅᑎᑦᑎᕙᓪᓕᐊᔪᖅ ᐅᖃᐅᓯᑦᑎᓐᓂ.  ᑕᐃᒪᐃᒻᒪᑦ ᑕᒪᒃᑯᐊ ᐊᓯᔾᔨᖅᑕᐅᔭᕆᐊᓖᑦ.

ᑲᓇᑕᐅᑉ ᐱᖁᔭᖓ C-91, ᐱᖁᔭᐅᔪᖅ ᐃᒃᐱᒍᓱᒃᑐᒥᒃ ᓄᓇᖃᖅᑐᑐᖃᐃᑦ ᐅᖃᐅᓯᖏᓐᓂᒃ, ᑕᒪᓐᓇ ᐱᕕᒃᓴᖃᓕᖅᑐᖅ ᐊᔾᔨᖅᑕᐅᔪᓐᓇᕐᓂᖓᓄᑦ.  ᒫᓐᓇ ᐱᖁᔭᖓ ᖃᓄᐃᓕᖓᓂᖓᑦ, ᐱᖁᔭᖅ C-91 ᐊᑐᓕᖅᑎᑦᑎᑐᐃᓐᓇᖅᑑᔭᖅᑐᖅ ᓄᓇᖃᖅᑐᑐᖃᐃᑦ ᐅᖃᐅᓯᑐᖃᖏᓐᓂ ᐱᒋᐊᕈᑎᓂᒃ.  ᑖᓐᓇ ᑲᔪᓯᑎᑦᑎᔪᓐᓇᓐᖏᑦᑐᖅ ᐱᔭᐅᔪᒪᔪᓂᒃ, ᐊᑐᕐᓇᖅᑐᖁᑎᒋᔭᐅᔪᓂᒃ ᐅᕝᕙᓘᓐᓃᑦ ᐃᓄᐃᑦ ᐱᔪᓐᓇᐅᑎᒋᔭᖏᓐᓂᒃ ᑲᓇᑕᒥ.  

ᐃᑲᔪᖅᑕᕗᑦ ᑲᑐᔾᔨᖃᑎᒋᔭᕗᑦ ᑭᒡᒐᖅᑐᐃᖃᑕᐅᓲᓂᒃ, ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᓄᓇᕗᑦ ᑐᓐᖓᕕᒃᑯᑦ, ᐊᔭᐅᖅᑐᐃᓂᕐᒥᒃ ᐅᖃᐅᓯᕗᑦ ᐱᔪᓐᓇᐅᑎᑖᕈᓐᓇᖁᓪᓗᒋᑦ ᐃᓅᓪᓗᑕ:  

  • ᐱᔪᓐᓇᐅᑎᖃᖅᑐᒍᑦ ᐃᓕᓐᓂᐊᕈᓐᓇᕐᓂᕐᒥᒃ ᐊᒻᒪᓗ ᐃᓕᓐᓂᐊᖅᑎᑕᐅᓂᕐᒥᒃ ᐃᓄᒃᑎᑐᑦ.  ᐅᑯᐊ ᐱᖁᓯᐅᑎᓗᒍᑦ ᓱᕈᓯᓛᑦ ᐃᓕᓐᓂᐊᖅᑎᑕᐅᓂᖏᑦ, ᐃᓕᓐᓂᐊᕆᐊᓕᓵᖅᑐᓄᑦ, ᐊᒻᒪᓗ ᖁᕝᕙᐅᒪᓂᖅᓴᓂ ᐃᓕᓐᓂᐊᖅᑐᓂᒃ ᐃᓄᒃᑎᑐᑦ ᐃᓕᓐᓂᐊᖅᑎᑦᑎᓂᕐᒧᑦ ᐅᖃᐅᓯᕆᔭᐅᓗᓂ.  
  • ᐱᔪᓐᓇᐅᑎᖃᖅᑐᒍᑦ ᐃᓕᒍᓐᓇᕐᓂᕐᒥᒃ ᐃᓄᒃᑎᑐᑦ ᐃᓅᓯᑦᑎᓐᓂ, ᐃᓚᒋᓗᒍ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᖃᑕᐅᔪᓐᓇᕐᓂᖏᑦ ᐃᓐᓇᐃᑦ.
  • ᐱᔪᓐᓇᐅᑎᖃᖅᑐᒍᑦ ᐊᒻᒪᓗ ᐊᐅᓚᑦᑎᓗᑕᓗ ᐃᓕᓐᓂᐊᕐᓂᓕᕆᓂᕐᒥᒃ ᐃᓄᒃᑎᑑᖅᑐᓂᒃ.  

ᑲᓇᑕᐅᑉ ᒐᕙᒪᖓ ᐊᒻᒪᓗ ᓄᓇᕗᑦ ᐱᖁᔭᕐᔪᐊᑎᒍᑦ ᐱᓕᕆᐊᒃᓴᖃᖅᑐᑦ ᐃᓄᖕᓄᑦ.  ᓂᕆᐅᒋᔭᖃᖅᑐᒍᑦ ᐅᑯᓂᖓ:

  • ᐃᓕᓴᕆᔭᐅᓂᖓᓂᒃ ᐃᓄᒃᑎᑐᑦ ᐃᓕᓴᕆᔭᐅᓯᒪᖃᑕᐅᔪᓐᓇᖅᓯᓂᐊᕐᒪᑦ ᑲᓇᑕᒥ ᐅᖃᐅᓯᕆᔭᐅᔪᓂᒃ ᐃᓄᐃᑦ ᓄᓇᖓᓂ, ᐊᒻᒪᓗ ᐱᓕᕆᖃᑎᒋᔭᐅᖃᑦᑕᖅᑐᓂᒃᓗ ᐃᓄᒃᑎᑐᑦ ᐅᖃᓕᒪᓲᓂᒃ ᓇᒥᑐᐃᓐᓇᖅ.  
    • ᐃᓄᖕᓄᑦ ᑐᕌᖓᔪᓂᒃ ᒐᕙᒪᑐᖃᒃᑯᑦ ᒪᓕᒐᕆᔭᖏᑦ ᐃᓕᑕᖅᓯᓯᒪᓂᐊᖅᑐᒥᒃ ᐃᓄᐃᑦ ᐅᖃᐅᓯᖓᓂᒃ ᐱᔪᓐᓇᐅᑎᖏᓐᓂᒃ.  .
    • ᖃᓄᖅᑑᕈᑎᖃᕐᓗᑎᒃ ᐃᑲᔫᑎᒋᔭᐅᓂᐊᖅᑐᓂᒃ ᐃᓚᒋᔭᐅᖃᑦᑕᕐᓂᐊᕐᒪᑦ ᐃᓄᒃᑎᑑᖅᑐᓂᒃ ᐱᓕᕆᐊᒃᓴᓄᑦ ᐱᔨᑦᓯᕋᕈᑎᓂᓗ ᐃᓕᓐᓂᐊᕐᓂᓕᕆᓂᕐᒥᒃ, ᐋᓐᓂᐊᖃᕐᓇᓐᖏᑦᑐᓕᕆᓂᕐᒥᒃ, ᐊᒻᒪᓗ ᐊᐅᓚᑕᐅᓂᕆᔭᖏᑦ ᐃᖅᑲᖅᑐᐃᔪᓕᕆᓂᖅ.
    • ᐊᔾᔨᒌᒃᑐᒥᒃ ᑮᓇᐅᔭᖃᖅᑎᑦᑎᓗᑎᒃ ᑐᓂᖃᑦᑕᖏᑦᑎᑐᑦ ᒐᕙᒪᑐᖃᒃᑯᑦ  ᐅᐃᕖᓄᑦ ᓄᓇᑦᑎᓐᓂ.  
    • ᓈᒻᒪᒃᑐᓂᒃ, ᓇᓗᓈᕿᖃᑦᑕᕐᓂᐊᓐᖏᑦᑐᓂᒃ, ᐊᒥᓱᓄᑦ ᐊᕐᕌᒍᓄᑦ ᑮᓇᐅᔭᖃᖅᑎᑦᑎᓗᑎᒃ ᒐᕙᒪᑐᒃᑯᑦ ᓄᓇᕘᑉ ᒐᕙᒪᖓᓗ ᐃᑲᔪᕈᑎᒋᔭᐅᓂᐊᖅᑐᓂᒃ ᐊᑯᓂᐅᓂᐊᖅᑐᒥᒃ ᐃᓄᒃᑎᑑᖅᑐᓂᒃ ᐱᓕᕆᐊᒃᓴᓄᑦ ᐱᒋᐊᕈᑎᒃᓴᓄᓗ ᓄᓇᑦᑎᓐᓂ.  

ᓱᕐᓗᑐᑦ ᐅᓪᓗᒥ ᐊᑐᖅᑕᑦᑎᓐᓂ, ᐃᖅᑲᐅᒪᔪᖓ ᔮᓐ ᐊᒪᕈᐊᓕᐅᑉ ᐅᖃᐅᓯᖏᑦ: “ᕿᑐᕐᖓᑦᑎᓐᓂ ᐃᓕᓐᓂᐊᖅᑎᑦᑎᒋᐊᖃᖅᑐᒍᑦ ᐅᖃᐅᓯᑦᑎᓐᓂ. ᐃᓕᓐᓂᐊᖅᑎᓪᓗᒋᑦ ᑭᓇᐅᓂᖏᓐᓂᒃ ᐊᒻᒪ ᓇᑭᓐᖔᖅᓯᒪᓂᖏᓐᓂᓗ.”

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ