ᐅᓪᓗᖓ ᓴᖅᑭᑕᖅ: ᒫᑦᓯ  3, 2021
ᑭᓱ: ᒪᑐᐃᕐᓂᖓ ᑐᒃᓯᕋᐅᑎᓕᐅᕐᓂᖅ; ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᙵᓱᒃᑎᑦᑎᔪᑦ ᑐᒃᓯᕋᐅᑎᓕᐅᕈᒪᔪᓄᑦ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᓂᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᙵᓱᒃᑎᑦᑎᔪᑦ ᑐᒃᓯᕋᐅᑎᓕᐅᕈᒪᔪᓂᒃ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖓᓂᑦ ᕿᑭᖅᑕᓂ ᓄᓇᓕᖕᓂᑦ.

ᐃᓄᐃᑦ ᐊᒻᒪ ᓄᓇᓕᖕᓂ ᑎᒥᐅᔪᑦ ᕿᑭᖅᑕᓂ ᓄᓇᓕᖕᓂᑦ ᑐᙵᓱᒃᑎᑕᐅᔪᑦ ᐱᓇᓱᖃᑕᐅᔪᓐᓇᕐᓗᑎᒃ ᐱᓕᕆᐊᒃᓴᖃᖅᑎᑦᑎᔪᒪᓂᕐᒧᑦ ᐊᐅᓚᓂᐊᖅᑐᒥᒃ ᐊᕐᕌᒍᒥ 2021-2022ᒥ.

ᕿᑭᖅᑕᓃᒃᑯᑦ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖓ ᓄᖅᑲᖓᑎᑕᐅᑲᐃᓐᓇᓚᐅᖅᑐᖅ ᒫᑦᓯ 2020 ᕿᑎᖓᓂᑦ ᓄᕙᓐᓇᕐᔪᐊᖅ-19 ᐱᔾᔪᑎᒋᓪᓗᒍ.  ᕿᑭᖅᑕᓃᒃᑯᑦ ᓇᓗᓇᐃᖅᓯᓯᒪᔪᑦ ᐊᑦᑕᕐᓇᖅᑐᒦᖁᔨᙱᖦᖢᑎᒃ ᐃᖅᑲᓇᐃᔭᖅᑎᖏᓐᓂᒃ ᓄᓇᕗᒥᐅᓂᓗ ᐊᒻᒪ ᓯᐊᒻᒪᒃᑎᑦᑎᑕᐃᓕᒍᒪᓪᓗᑎᒡᓗ.  ᔫᓐ 1, 2020ᒥ ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᔨᕐᔪᐊᖓ ᓇᓗᓇᐃᖅᓯᓚᐅᖅᓯᒪᑎᓪᓗᒍ ᑭᒡᓕᖃᖅᑎᑦᑎᓪᓗᓂ, ᑭᓯᐊᓂ ᐃᓚᖏᑦ ᑭᒡᓕᓕᐊᖑᓚᐅᖅᑐᑦ ᐲᔭᖅᑕᐅᕙᓪᓕᐊᔪᑦ ᐅᓄᕐᓂᖅᓴᐅᔪᓐᓇᓕᖅᖢᑎᒃ ᖃᓄᐃᓕᐅᕈᒪᔪᑦ.  ᑐᑭᓯᒃᑲᓐᓂᕈᒪᒍᕕᑦ ᓄᓇᕗᒥ ᓄᕙᓐᓇᕐᔪᐊᖅ 19 ᒥᒃᓵᓄᑦ ᒪᓕᒐᒃᓴᑦ ᐅᕙᓂ ᐃᑭᐊᖅᑭᕕᖕᒥ ᑕᑯᒋᐊᖅᑕᐅᔪᓐᓇᖅᑐᑦ awww.gov.nu.ca/health/information/nunavuts-path-guidelines.

ᐱᔾᔪᑎᒋᓪᓗᒍ ᓄᕙᓐᓇᕐᔪᐊᖅ19, ᕿᑭᖅᑕᓃᒃᑯᑦ ᑎᓕᓯᓯᒪᔪᑦ ᐱᓕᕆᐊᖑᓂᐊᖅᑐᓕᒫᑦ ᐊᑐᓕᖅᑎᑦᑎᒋᐊᖃᕐᓂᐊᖅᑐᑦ ᑎᒥᒃᑯᑦ ᖃᓄᐃᑦᑕᐃᓕᓂᕐᒥᒃ ᐊᒻᒪ ᐊᑦᑕᕐᓇᐃᔭᐃᒍᑎᓂᒃ ᐸᕐᓇᐅᑎᓂᒃ.   ᑖᒃᑯᐊ ᐸᕐᓇᐅᑎᑦ ᐅᖃᖅᓯᒪᓗᑎᒃ ᖃᓄᖅ ᐱᖃᑕᐅᓂᐊᖅᑐᑦ ᓴᐳᔾᔭᐅᓯᒪᓂᐊᕐᓂᖏᓐᓄᑦ ᐊᑐᕐᓗᑎᒃ ᐃᒻᒥᒧᑦ ᓴᐳᔾᔨᔾᔪᑎᓂᒃ ᐱᖁᑎᓂᒃ ᓱᕐᓗ ᑭᓇᕐᒧᑦ ᒪᑐᐊᕐᓂ ᐊᒻᒪᓗ ᖃᓂᒌᓗᐊᖅᑕᐃᓕᓂᕐᒥᒃ, ᐊᒻᒪᓗ ᖃᓄᖅ ᐃᓕᓐᓂᐊᕐᕕᐅᔪᖅ ᓴᓗᒻᒪᖅᓴᖅᑕᐅᖃᑦᑕᕐᓂᐊᕐᒪᑦ ᐱᓕᕆᐊᒃᓴᖃᖅᑎᑦᑎᑎᓪᓗᒋᑦ.

ᕿᑭᖅᑕᓃᒃᑯᑦ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖓ ᑮᓇᐅᔭᖃᖅᑎᑕᐅᕙᒃᑐᖅ ᕿᑭᖅᑕᓃᒃᑯᑦ ᐃᑲᔫᓯᐊᒃᓴᓄᑦ ᑮᓇᐅᔭᓂᑦ ᑐᖅᓯᒪᔪᓂᒃ ᑮᓇᐅᔭᓂᙶᖅᑐᓄᑦ, ᑖᒃᑯᐊ ᑐᖅᓯᒪᔪᑦ ᑮᓇᐅᔭᐃᑦ ᐳᕈᖅᑎᑕᐅᑎᓪᓗᒋᑦ ᑮᓇᐅᔭᐃᑦ ᐃᓯᖅᑐᑦ ᐃᓚᖓ ᐃᑲᔫᓯᐊᒃᓴᓄᑦ ᑮᓇᐅᔭᓄᑦ ᐃᓕᔭᐅᕙᒃᑐᑦ ᐃᓄᖕᓂᒃ ᐃᓚᒃᑲᓐᓂᕐᓗᑎᒃ ᐱᓕᕆᐊᒃᓴᖃᖃᑕᐅᔪᒪᔪᓂᒃ.

ᕿᑭᖅᑕᓃᒃᑯᑦ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖓ ᐃᑲᔪᖅᑐᐃᕙᒃᑐᑦ ᓄᓇᓕᖕᓂ-ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᖃᕈᒪᔪᓄᑦ.  ᐱᓗᐊᖅᑐᒥᒃ ᓄᓇᓕᐊᕈᔾᔨᓂᖅ ᓄᓇᒥ ᐃᓕᓐᓂᐊᖅᑎᑦᑎᓂᖅ ᐊᒻᒪᓗ ᒥᖅᓱᖅᑎᑦᑎᓂᖅ ᓯᕗᓪᓕᐅᑎᑕᐅᖃᑦᑕᖅᑐᑦ, ᕿᑭᖅᑕᓃᒃᑯᑦ ᐃᓱᒪᒋᔭᖃᕈᓐᓇᕐᒥᔪᑦ ᐊᓯᖏᓐᓂᑦ ᑐᒃᓯᕋᐅᑎᓂᒃ ᐃᓄᐃᑦ ᐃᓕᖅᑯᓯᖏᓐᓂᑦ ᐱᓕᕆᐊᖃᕈᒪᔪᓄᑦ.

ᑐᒃᓯᕋᐅᑎᑦ ᑕᑕᑎᖅᑕᐅᔪᓐᓇᖅᑐᑦ ᖃᕆᓴᐅᔭᒃᑯᑦ ᐅᕙᓂ https://www.qia.ca/qcap-application/

ᐃᑲᔪᖅᑕᐅᔭᕆᐊᖃᕈᕕᑦ ᖃᕋᓴᐅᔭᒃᑯᑦ ᑐᔅᓯᕋᐅᓯᐅᕐᓂᕐᒥᒃ 867-975-8438ᒧᑦ ᑎᑎᕋᕐᓗᑎᓪᓘᓐᓃᑦ ᐃᕐᖐᓈᖅᑕᐅᑎᒃᑯᑦ ᐅᕗᖓ qcap@qia.ca.

ᒪᑐᕕᔅᓴᖓ ᑐᔅᓯᕋᐅᓯᐅᕐᓂᕐᒧᑦ ᒫᑦᓯ 26, 2021 ᓯᕿᙳᔭᖅ 12:00ᒨᖅᑲᑦ ᐅᓐᓄᐊᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᐅᐃᓪ Hᐊᑉᑭᓐᔅ
ᑭᖑᕝᕕᐅᑎᓯᒪᔪᖅ ᑐᑭᒧᐊᑦᑎᑦᑎᔨᐅᓂᕐᒧᑦ ᑐᓴᐅᒪᖃᑦᑕᐅᑎᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
whopkins@qia.ca
867.975.8413
1.800.667.2742