ᑮᓇᐅᔭᓕᕆᓂᕐᒧᑦ ᐊᓪᓚᕝᕕᖓᑦ ᑲᑐᔾᔨᖃᑎᒌᒃᑯᑦ ᑲᒪᒋᔭᖃᓗᐊᕐᐸᑦᑐᖅ ᓴᐳᔾᔨᓂᕐᒥᒃ ᐊᒻᒪᓗ ᐊᑦᑕᓇᐃᕐᓯᓯᒪᓂᕐᒥᒃ ᑲᑐᔾᔨᖃᑎᒌᒃᑯᑦ ᐱᖁᑎᖏᓐᓂᒃ. ᑕᒪᑐᒥᖓ ᑲᔪᓯᑎᑦᑎᕙᑦᑐᑦ ᑲᔪᓯᑎᑦᑎᕙᓪᓕᐊᓪᓗᑎᒃ ᐊᒻᒪᓗ ᒪᓕᑉᐸᑦᑐᑎᒃ ᑮᓇᐅᔭᓕᕆᓂᕐᒧᑦ ᐊᑐᐊᒐᕐᓂᑦ ᐊᐅᓚᔾᔪᓯᐅᔭᕆᐊᓕᓐᓂᓪᓗ. ᑕᐃᒫᒃ, ᑮᓇᐅᔭᓕᕆᔨᒃᑯᑦ ᐊᓪᓚᕝᕕᖓᑦ ᖃᐅᔨᒪᒋᐊᕐᐸᑦᑐᖅ ᐱᖁᑎᖏᑦ ᑎᑎᕋᖅᑕᐅᓯᒪᑦᑎᐊᖃᑦᑕᕋᓗᐊᕐᒪᖔᑕ, ᐊᐅᓚᑕᐅᑦᑎᐊᖃᑦᑕᕋᓗᐊᕐᒪᖔᑕ ᐊᒻᒪᓗ ᓇᓗᓇᐃᕐᓯᔾᔪᑕᐅᓯᒪᑦᑎᐊᖃᓗᐊᕐᒪᖔᑕ ᐊᒻᒪᓗ, ᐊᑭᓕᕆᐊᓕᖏᑦ ᑲᒪᒋᔭᐅᑦᑕᐅᑎᒋᖃᑦᑕᕋᓗᐊᕐᒪᖔᑕ ᓈᒻᒪᓈᕐᓯᒪᔪᒥᒃ.
ᑮᓇᐅᔭᓕᕆᔨᒃᑯᑦ ᐊᓪᓚᕝᕕᖓᑦ ᐱᔨᑦᑎᕋᐅᑕᐅᒻᒪᑦ. ᑕᐃᒪᐃᒻᒪᑦ, ᐱᔨᑦᑎᕋᖃᑦᑕᖅᑐᖅ ᐃᓘᓐᓴᖏᓐᓂᒃ ᑲᑐᔾᔨᖃᓗᑎᒌᒃᑯᑦ ᐊᓪᓚᕝᕕᖏᓐᓂᒃ, ᓯᕗᓕᖅᑎᓂᑦ ᑲᑎᒪᔨᓂᑦ ᐊᒻᒪᓗ, ᑲᑐᔾᔨᖃᑎᒌᒃᑯᑦ ᑲᑎᒪᔨᖏᓐᓂᒃ. ᐊᐅᓚᓂᖃᖅᑎᓪᓗᒋᑦ, ᐊᓪᓚᕝᕕᖓᑦ ᑲᒪᒋᔭᖃᖃᑦᑕᖅᑐᖅ ᐸᕐᓇᐃᓂᕐᒥᒃ ᐅᐸᓗᖓᐃᔭᐃᖃᑦᑕᓂᕐᒥᓪᓗ ᐊᕐᕌᒍᓖᒫᖅ ᑮᓇᐅᔭᓂᑦ ᐊᑐᖅᑐᔅᓴᖁᑎᒋᓂᐊᖅᑕᖏᓐᓂᒃ, ᑕᖅᑭᑕᒫᑦ ᐊᓪᓚᕝᕖᑦ ᑮᓇᐅᔭᓕᕆᔾᔪᑎᖏᓐᓂᒃ, ᑎᓴᒪᐅᓕᖅᑲᖓᔪᓂᑦ ᐊᐅᓚᓂᖏᓐᓄᑦ ᓇᓗᓇᐃᔭᕐᓯᒪᓂᖏᓐᓂᒃ ᐊᐅᓚᓂᕆᕙᑦᑕᖏᑕ ᐊᒻᒪᓗᑦᑕᐅᖅ ᑐᑭᒧᐊᑦᑎᑦᑎᓂᕐᒥᒃ ᐊᕐᕌᒎᑉ ᓄᙳᐊᓂ ᑕᒻᒪᕐᓯᒪᔪᓯᐅᖅᑕᐅᖃᑦᑕᕐᓂᖏᓐᓂᒃ ᐊᕐᕌᒍᓕᒫᖅ ᑕᒻᒪᕐᓯᒪᔪᕐᓯᐅᖅᑕᐅᕙᑦᑐᑎᒃ ᑮᓇᐅᔭᓕᕆᔾᔪᑎᒥᓂᖏᑦ.
