ᑐᑭᓯᒋᐊᕐᕕᖃᖃᑦᑕᓚᐅᖅᑎᓪᓗᒋᑦ ᐃᓘᓐᓇᖏᓐᓂᒃ 13ᓂᑦ ᕿᑭᖅᑕᓂ ᓄᓇᓕᓐᓂᑦ 2017ᖑᑎᓪᓗᒍ, ᑲᑐᔾᔨᖃᑎᒌᒃᑯᑦ ᑐᑭᓯᔪᒻᒪᑕ ᑐᓴᖅᑐᑎᒃ ᕿᑭᖅᑕᓂ ᓄᓇᓕᓐᓂᑦ ᐃᓄᓐᓂᑦ ᐃᓕᖅᑯᓯᓕᕆᓂᕐᒨᖓᔪᓂᑦ ᐃᑲᔫᑎᔅᓴᓂᑦ ᐱᔪᒪᓂᖏᓐᓂᒃ ᐊᑐᖃᑦᑕᓂᐊᕐᖓᑕ ᐱᖅᑯᓯᖏᑎᒍᑦ ᐃᓕᓐᓂᐊᕐᓯᒪᔭᖏᓐᓂᒃ ᐊᒻᒪᓗ ᐃᓄᐃᑦ ᑭᒃᑰᔾᔪᓯᖏᓐᓂᒃ ᐊᑐᖅᑕᐅᑎᑦᑎᒋᐊᒃᑲᓐᓂᕈᒪᓪᓗᑎᒃ, ᐱᓗᐊᖅᑐᒥᑦ ᓅᓯᒪᑎᑦᑎᖃᑦᑕᓂᕐᒥᒃ ᒥᕐᓱᑎᑦᑎᖃᑦᑕᓂᕐᒥᓪᓗ.
ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᑎᒍᑦ, ᐊᑐᓂᑦ ᓄᓇᓖᑦ ᐱᓇᓱᐊᖃᑦᑕᕈᓐᓇᓂᐊᕐᖓᑕ $45,000ᓄᑦ ᑎᑭᐅᒪᔪᓂᑦ ᐱᓕᕆᐊᔅᓴᓄᑦ. ᓅᓯᒪᑎᑦᑎᖃᑦᑕᕐᓂᖅ ᒥᕐᓱᑎᑦᑎᖃᑦᑕᓂᕐᓗ ᓯᕗᓪᓕᐸᐅᑦᑎᐅᔾᔭᐅᓯᒪᓂᐊᕋᓗᐊᖅᑎᓪᓗᒋᒃ, ᑲᑐᔾᔨᖃᑎᒌᒃᑯᑦ ᐃᓱᒪᒋᔭᖃᕆᐊᖃᑦᑕᓂᐊᕐᒥᔪᑦ ᐊᓯᖏᓐᓂᒃ ᐃᓄᓐᓄᑦ ᐃᓕᖅᑯᓯᓕᕆᔾᔪᑕᐅᖃᑦᑕᓂᐊᖅᑐᓂᑦ.
ᑖᓐᓇ ᓄᑖᖅ ᐃᑲᔫᑎᑖᖅᑲᐅᒃ ᐋᖅᑭᑦᑕᐅᓯᒪᔪᖅ ᐊᑐᖅᑕᔪᓐᓇᓂᕐᓴᐅᓂᐊᕐᖓᑦ, ᐱᔭᕆᐊᑭᓪᓕᑎᑕᐅᓯᒪᓪᓗᑎᒃ ᑐᔅᓯᕋᐅᑎᖏᑦ ᐊᒻᒪᓗ ᐅᓂᒃᑳᓕᐅᖃᑦᑕᕆᐊᖃᕐᓂᕐᒧᑦ ᐊᑐᖅᑕᐅᔭᕆᐊᖃᓲᑦ.
ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ ᐃᓚᒋᔭᐅᒻᒪᑦ ᓂᕈᐊᒐᐅᔪᔪᓄᑦ ᑲᑐᔾᔨᖃᑎᒌᒃᑯᑦ ᑲᑎᒪᔨᖏᓐᓄᑦ ᐅᑐᐱᕆ 2017ᖑᑎᓪᓗᒍ ᐃᓚᒋᔭᐅᖁᓪᓗᒍ ᓄᑖᓄᑦ ᐃᑲᔫᓯᐊᔅᓴᓂᑦ ᑮᓇᐅᔭᓂᑦ ᐊᑭᓕᕐᓱᐃᔾᔪᑕᐅᖃᑦᑕᓂᐊᖅᑐᓂᑦ. ᑮᓇᐅᔭᑦ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ ᑐᕌᖃᑦᑕᓂᐊᖅᑐᑦ ᑕᕝᕙᙶᖅᑐᑦ ᑐᖅᑯᖅᑕᐅᕙᓪᓕᐊᔪᓂᑦ ᑮᓇᐅᔭᓂᑦ ᐊᒥᓱᕈᕐᐸᓪᓕᐊᓂᖏᓐᓂ ᑮᓇᐅᔭᑦ ᐃᓯᕐᐸᑦᑐᑦ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ ᐊᒥᓱᕈᒃᑲᓐᓂᕐᓂᐊᕐᖓᑕ ᐃᑲᔫᑕᕙᑦᑐᑦ ᐃᓄᓐᓄᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᙵᓱᒃᑎᑦᓯᓕᕐᒥᔪᑦ ᑐᒃᓯᕋᐅᑎᓕᐅᕈᒪᔪᓄᑦ ᕿᑭᖅᑕᓃᒃᑯᑦ ᐃᓕᖅᑯᓯᓕᕆᓂᕐᒧᑦ ᐃᑲᔫᓯᐊᒃᓴᓄᑦ ᑮᓇᐅᔭᖏᓐᓂᑦ ᐅᑯᓄᖓ ᓄᓇᓕᖕᓂᑦ: ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᓴᓂᕋᔭᒃ, ᖃᐅᓱᐃᑦᑐᖅ, ᓴᓂᑭᓗᐊᕐᓗ.
ᐃᓄᐃᑦ ᐊᒻᒪᓗ ᓄᓇᓕᖕᓂ ᑎᒥᐅᔪᑦ ᑖᒃᑯᓇᙵᑦ ᓄᓇᓕᖕᓂᑦ ᑮᓇᐅᔭᓂᒃ ᑐᒃᓯᕋᐅᑎᓕᐅᕈᒪᔪᓄᑦ ᐱᓕᕆᐊᒃᓴᐅᓂᐊᖅᑐᓂᒃ ᐊᐅᓚᑕᐅᓂᐊᖅᑐᓂᒃ ᐊᒡᒌᓯᐅᑉ ᕿᑎᐊᓂᑦ 2019ᒥᑦ ᒫᑦᓯ 31, 2020ᒧᑦ. ᐊᑐᓂ ᑖᒃᑯᐊ ᑕᓪᓕᒪᐅᔪᑦ ᓄᓇᓖᑦ ᑮᓇᐅᔭᓂᒃ ᓴᓂᕐᕙᖅᑕᐅᓯᒪᔪᑦ $25,000ᓂ.
ᒪᑐᕕᔅᓴᓕᒃ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᓄᑦ ᑐᔅᓯᕋᐅᓯᐅᕐᕕᔅᓴᖅ ᔪᓚᐃ 22, 2019ᒥ.
ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ ᒥᔅᓵᓄᑦ ᐊᑐᐊᒐᑦ ᑐᔅᓯᕋᐅᓯᐅᕈᑎᔅᓴᕐᓗ ᐱᔭᔅᓴᐅᕗᑦ ᑲᑐᔾᔨᖃᑎᒌᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓂ.
