ᐱᓕᕆᐊᑦ
ᕿᑭᖅᑕᓂᒃᑯᑦ ᐊᕐᕌᒍᑕᒫᑦ ᐱᓕᕆᐊᒃᓴᖃᖅᐳᑦ ᒪᒃᑯᒃᑐᓄᑦ ᑐᕌᖓᔪᓂᑦ: ᓱᕈᓰᑦ ᐅᓪᓗᒃᑯᑦ ᐱᓕᕆᑎᑕᐅᖃᑦᑕᕐᓂᖏᑦ, ᕿᑭᖅᑕᓃᙶᖅᑐᑦ ᒪᒃᑯᒃᑐᑦ ᑲᑎᒪᑎᑕᐅᓂᖏᑦ, ᓄᓇᒧᑦ ᐊᐅᓪᓚᖅᓯᒪᑎᑕᐅᓂᒃᑯᑦ ᒥᖅᓱᖅᑎᑕᐅᓂᒃᑯᓪᓗ ᐊᒻᒪᓗ ᐃᓄᒃᑎᑐᑦ ᐅᖃᐅᓯᕐᒥᒃ ᐱᓇᓱᐊᕈᓯᖃᕐᓂᕐᒥᒃ. ᑕᒪᒃᑯᐊᑦ ᐱᓕᕆᐊᒃᓴᐃᑦ ᐊᐅᓚᑎᑕᐅᕙᑉᐳᑦ ᑮᓇᐅᔭᖃᖅᑎᑕᐅᓂᒃᑯᑦ ᐊᓯᖏᑦ ᐊᖏᖃᑎᒌᖃᑕᐅᔪᒃᑯᑦ ᓲᕐᓗ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᓕᕆᓂᕐᒧᑦ ᐱᓕᕆᐊᖅ, ᒪᒃᑯᒃᑐᑦ ᓄᓇᖃᖅᑳᓯᒪᔪᑦ ᐃᓕᖅᑯᓯᕐᒥᒃ ᐊᑦᑐᐊᖓᓂᕐᒨᖓᔪᑦ ᐊᒻᒪᓗ ᓄᓇᖃᖅᑳᖅᓯᒪᔪᐃᑦ ᑭᒡᒐᖅᑐᐃᔩᑦ ᑲᑐᔾᔨᖃᑎᒌᓄᑦ ᑮᓇᐅᔭᐃᑦ ᐃᓕᖅᑯᓯᓕᕆᔨᕐᔪᐊᒃᑯᓐᓂ ᒐᕙᒪᑐᖃᒃᑯᓐᓂ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂᒃ ᐃᓕᖅᑯᓯᓕᕆᔨᒃᑯᑦ.
ᐃᒻᒥᒃᑯᑦ, ᕿᑭᖅᑕᓂᒃᑯᑦ ᐊᐅᓚᑦᓯᓲᖑᕗᑦ ᓄᓇᓕᖕᓂ ᐊᐅᓚᔾᔭᒋᐊᖅᑏᑦ ᐱᓕᕆᐊᖏᓐᓂᒃ ᑮᓇᐅᔭᓂᑦ ᐊᑐᖅᐸᒃᖢᑎ ᓄᓇᓯᒃᑯᓐᓃᙶᖅᑐᑦ ᕿᑭᖅᑖᓗᒃ ᑯᐊᐸᕇᓴᒃᑯᓐᓂᓗ.
ᐱᓕᕆᐊᑦ ᐊᔾᔨᐅᖏᑦᑐᑦ
ᐱᓕᕆᐊᕗᑦ ᐊᔾᔨᐅᖏᓐᓂᖏᑦ ᑐᕌᖓᓗᐊᖅᐳᑦ ᓴᖅᑭᔮᖅᑎᑦᓯᓂᕐᒥᒃ ᐃᓄᐃᑦ ᐃᓕᖅᑯᓯᖓᓂᒃ ᑕᐃᑦᓱᒪᓂᑕᓂᓗ.
ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐱᒋᐊᖅᑕᐅᓚᐅᖅᐳᖅ ᑮᓇᐅᔭᖃᖅᑎᑕᐅᓪᓗᓂᓗ ᕿᑭᖅᑕᓂᒃᑯᓐᓄᑦ 2007ᒥᒃ 2010ᒧᓄᑦ. ᓯᕗᓕᐅᖅᑕᐅᓪᓗᓂ ᐱᖁᔭᓕᕆᔨᕐᔪᐊᖅ ᔭᐃᒥᓯ ᐃᒡᓗᓕᐅᖅᑎ, ᑭᓪᓕᓯᓂᐊᖅᑏᑦ ᑐᕌᒐᖃᓚᐅᖅᐳᖅ “ᓄᐃᑎᑦᓯᓂᕐᒥᒃ ᓱᓕᔾᔫᒥᔪᓂᑦ ᑕᐃᑦᓱᒪᓂᑕᐃᑦ ᐃᓱᒪᓕᐅᕆᔭᐅᓂᖏᓐᓂᒃ ᐊᑐᖅᑕᐅᓂᑯᐃᓪᓗ ᐃᓄᓐᓄᑦ ᐊᒃᑐᐊᖓᔪᑦ ᕿᑭᖅᑖᓗᒻᒥ ᐅᑭᐅᑦ 1950 ᐊᒻᒪ 1975 ᐊᑯᓐᓂᖏᓐᓂ, ᐊᒻᒪᓗ ᑎᑎᕋᖅᐸᓪᓕᐊᓗᑎᒃ ᐊᒃᑐᖅᑕᐅᓂᐅᓚᐅᖅᑐᑦ ᐃᓄᐃᑦ ᐃᓅᓯᖏᓐᓄᑦ.”
ᑭᓪᓕᓯᓂᐊᖅᑏᑦ ᓴᖅᑭᒃᓯᓚᐅᖅᐳᑦ 2010ᖑᑎᓪᓗᒍ ᑭᖑᓪᓕᖅᐹᒥᒃ ᐅᓂᒃᑳᐊᓕᐊᒥᓂᖏᓐᓂᒃ ᑕᐃᔭᐅᓪᓗᓂ ᓴᐃᒪᖃᑎᒌᓐᓂᖅᑖᕐᓂᖅ, ᐃᓗᓕᖃᖅᖢᓂ 25ᓂᑦ ᐊᑐᓕᖁᔨᔾᔪᑎᓂᑦ.
